Mariko 5 - KITAWO MALEŊ Catholic

Yesu botho dhano ma cuny m'ocido ni kwoŋe

¹ Yesu gi jofonjirok pere jopor loka man ma wakawaka ma Galili, to jodonjo i piny ma Gerasa.

² Tekin Yesu wok i ye, dhano moro m'owok i ŋungu m'iyik'iye ji oromo gi go.

³ Ŋato oyido nitie gi cuny m'ocido, aka oyido bedo i kaliele. Ongoye moro m'onwaŋo nyalo tweyo go kada gi lijegere aka bedi liŋ.

⁴ Ndiri mathoth onwaŋo itweyo cinge gi tiende, to hongo je codo woko lijegere, to ŋinyo woko okol ma tiende.

⁵ Odieceŋ gi wor je go oyido helahela i kaliele kodi wi tendere munyo hola aka yaŋere gi telin.

⁶ Munyo fodi ŋato oyido nitie gi bor bor, oneno Yesu; piyo piyo to tukere gi ŋwec, to bino guro conge piny ruwaŋ Yesu,

⁷ to koko gi derino madwoŋ ni, “Yesu, Wod Were Madwoŋ Maloyo! Iyenyo aŋo kwoŋan? Mondo aywakere rin i nyingi Were, ikir'imiyan candirok.”

⁸ (Go owaco ama rupiri Yesu oyido otieko waco rigo ni, “Cuny m'ocido, eye woko kwoŋ jame.”)

⁹ Gikenyo Yesu openjo go ni, “Nyingin ŋa?” Ana go: “Nyingan Lwak, kole wamore swa.”

¹⁰ Omedo ywakirok ri Yesu nike wokiri woriem jo woko i piny no.

¹¹ Dwol mbiji madwoŋ onwaŋo nitie kenyo i thengi tendere jocemo.

¹² Cuny m'ocido no jokwayo Yesu ni, “Dhiri wan i dwol mbiji no, iyey wadonji i jo.”

¹³ Yesu oyeyo jo. Cuny m'ocido jowok kwoŋ jalo to jodonjo i mbiji. Dwol mbiji ma romo cegin gana ario gipi jomwomere gi ŋwec wok dho thengi tendere to jomunyere i wakawaka.

¹⁴ Jokwath mbiji jokedhere gi ŋwec to jonyayo wac no i tindi kodi i ndelin kama ji onwaŋo jotiy'iye. Aka ji jokidho neno gim'otimere.

¹⁵ Jobino bongi Yesu to joneno jal ma yado lwak ma jwogi ni kwoŋe. Go oyido obedo piny kenyo, orukere maber, aka wiye onyo otire; lworo omako jo je tektek.

¹⁶ Jom'oneno gime jowaco ri joman gim'otimere kwoŋ jal ma yado jwogi opoŋ kwoŋe no, kodi gim'otimo mbiji.

¹⁷ Gikenyo jokwayo Yesu nike woeye i piny pajo.

¹⁸ Munyo Yesu donjo i ye, jal ma yado jwogi opoŋ kwoŋe no okwayo go ni, “Yeyan aluwin.”

¹⁹ To Yesu k'oyeyo go; kucel owaco rigo ni, “Dok peco thuwin iwaci ri jopeco gima Rwoth otimo rin, kendo paka go otimo rin wor madwoŋ swa.”

²⁰ Gikenyo ŋato omako royo to wotho i tindin apar (m'ilwoŋo ni Dekapoli), munyo waco ri ji gima Yesu otimo rigo; aka ji je ma jowinjo jouro tektek.

Nyar Yayiro kodi dhako m'ogeyo nanga pa Yesu

²¹ Munyo Yesu odoko opor loka man gi ye, aka oyido obedo thengi wakawaka, lwak ji jothoko go kenyo.

²² Yayiro, rwoth ma kitipa pa jom'oyeyo pa Joyuda, bende obino.

²³ Aka munyo oneno Yesu, oriewere piny dho tiende to kwayo go gi geregere ni, “Nyaran two swa, mondo bowe ikidhi ikethi cingin kwoŋe wobedi maber.”

²⁴ Yesu omako royo gi go. Aka lwak ji madwoŋ oluwo go to thoko go ni rap.

²⁵ Kenyo onwaŋo nitie dhako moro m'oyido otieko candere gi remo ma oy cowo hongo ma oro apar g'ario gipi;

²⁶ aka go onwaŋo otieko temo woth kwoŋ jomilerwa m'omore ma go fodi candere acanda. Dheno oyido otieko nyeko lim ma go oyido nitie gine je, to kabedo ma cango, two omedere ayino.

²⁷ Go oyido otieko ye winjo kwoŋ Yesu, riameno orire i dier ji yuŋeye to geyo nanga pere.

²⁸ Ato owaco g'icunye ni, “K'anogey kada nyaka nanga pere won, abino bedo maber.”

²⁹ Go ogeyo kanzu pa Yesu, to remo coki gi kenyo won, aka won bende owinjo ni two pere otieko cango.

³⁰ Munyo Yesu owinjo meni owok kwoŋe, owire piyo i dier ji to penjo ni, “Ŋat'ogeyo nangin paran?”

³¹ Jofonjirok pere jodwoko ni, “Ineno lwak ji jodire kwoŋin ama aka odoko fodi ipenjo ni, ‘ŋat'ogeyan?’ ”

³² To Yesu medo rango gi waŋe thenge gi thenge munyo mito neno ŋat'ogeyo go.

³³ Gikenyo dhako no owok kamaler gi lworo kodi kirin, rupiri oŋeyo gima go otimo; aka opodho ka tiendi Yesu to tito rigo gimoro je.

³⁴ Yesu owaco rigo ni, “Nyaran, yeyo perin obothin; dok peco i siem, aka two perin no woweyin kicutho.”

³⁵ Munyo Yesu fodi luwo, jomoro jokonjere ma jowok pa Yayiro, rwoth ma kitipa pa jom'oyeyo pa Joyuda, to jowaco ni, “Nyarin otieko tho, odoko icando jafonji raŋo?”

³⁶ To Yesu kere onwaŋo winjo, am'omiyo owaco ri rwoth ma kitipa pa jom'oyeyo pa Joyuda ni, “Ikir'ilwor, bedi gi yeyo ayin.”

³⁷ Yesu k'oyeyo moro luwo go, kwanyo woko Petero gi Yakobo kodi Yohana omin go.

³⁸ Munyo jotundo peco pa rwoth no, Yesu oneno paka jokaliel joywak gi geregere, jogoyo ndur, aka jowoy.

³⁹ Aka munyo go odonjo i ot, owaco rijo ni, “Woy gi ywak me je mar'aŋo? Nyathi me k'otho, go nindo ayin.”

⁴⁰ Gikenyo jonyero Yesu ayino, am'omiyo go oriemo joje woko, to kwanyo ba nyathi gi yokimere kodi jofonjirok pere, to donjo gi jo kam'opiel'iye nyathi no.

⁴¹ Go omako cingi nyathi no to waco rigo ni, “Talitha, kumi!” Dwoŋ mere ni, “Nyathi manyako, awaco rin, ay malo.”

⁴² Piyo piyo no nyako no oay malo ni sew to cako woth; aka nyako nago no onwaŋo romo oro apar g'ario. Ji jobedo gi dhier swa munyo gime otimere.

⁴³ Yesu ociko jo teltel ni kiri jowowaci ri nyatoro; to oro jo miyo nyano gir'acama.