Mariko 2 - KITAWO MALEŊ Catholic

Yesu botho nyatoro ma two nyaŋinya

¹ Munyo ndelo okadho manok, Yesu ogik Kapernaum, aka wac olak ni go odwoko yu peco.

² Gikenyo ji jocokere kiri i dhiot m'ongoye ka leŋo, to go fonjo jo.

³ Munyo fodi go fonjo, ji aŋwen jokelo nyatoro ma two nyaŋinya.

⁴ To paka lwak ji k'oyeyo jo baro royo ma rwako go bongi Yesu, jomwomo wiy ot kam'otitere gi Yesu, aka munyo joyawo hola ma romo, jocwayo kitanda ma janyaŋinya no oyido onind'iye cuka otundo piny.

⁵ Munyo Yesu oneno yeyo pajo, owaco ri janyaŋinya no ni, “Nyathi paran, reco perin ocwaki rin.”

⁶ Kenyo onwaŋo nitie jondiko moro, to wegi joparo kendi gin ni,

⁷ “Raŋo ma ŋatin luwo ama? Kole go luwo gima k'otire kwoŋ Were? Ŋata bende nyalo cwako reco makiweno Were won?”

⁸ Yesu oŋeyo ni meno a paro m'oyido jonigine, to waco rijo ni, “Raŋo ma wibedo gi paro no i cuny win?

⁹ Aŋo mayot waco? Waco ri janyaŋinya ni, reco perin ocwaki rin, kosa ni, ay malo, itiŋ kitanda perin iwothi?

¹⁰ Ere weyi anyuthi win ni Wod Dhano nigi meni i piny ka ma cwako reco.” Gikenyo owaco ri janyaŋinya no ni,

¹¹ “Awaco rin, ay malo, tiŋi kitanda perin idok peco.”

¹² Jalo oay malo, otiŋo kitanda pere, to wotho i waŋ ji je, aka joje jodhier to jopako Were munyo jowaco ni, “fodi oyido wakineno gima cale ama.”

Yesu lwoŋo Levi

¹³ Yesu odoko okidho dho thengi wakawaka ma Galili, aka lwak ji jocokere bonge, to fonjo jo.

¹⁴ Aka munyo wotho, oneno Levi jacoki misolo, wod pa Alfayo, obedo piny i ot ma misolo, to waco rigo ni, “Luwan.” Jalo oay malo to luwo Yesu.

¹⁵ Rumacen, Yesu okidho peco pa Levi gi jofonjirok pere, to bedo dhower. Jocoki misolo kweth kodi joreco bende joluwo go yukoro. Joje bende jocemo kanyacel gi Yesu.

¹⁶ Munyo jondiko ma dier Jofarisayo joneno Yesu cemo kodi joreco gi jocoki misolo, jopenjo jofonjirok pere ni, “Raŋo ma go cemo gi jocoki misolo kodi joreco?”

¹⁷ Munyo Yesu owinjo gino, odwoko jo ni, “Jom'olama ama jokiyeny jamilerwa, to joma two ayino: Kole akibino lwoŋo jomabeyo, t'abino lwoŋo joreco ayino.”

Penji kwoŋ riyo kec

¹⁸ Ndelo moro munyo jofonjirok pa Yohana Jakibatisa kodi apa Jofarisayo onwaŋo joriyo kec, jomoro jobino to jopenjo Yesu ni, “Raŋo ma jofonjirok pa Yohana Jakibatisa kodi apa Jofarisayo joriyo kec aka aperin jokiriy?”

¹⁹ Yesu odwoko jo ni, “To, wendo ma jonitie i kalima ma nywomirok jonyalo nedi riyo kec ma to jamweha fodi nitie gi jo? I hongo ma go fodi nigi jo jokiriy kec be.

²⁰ To ndir bino tundo ma jamweha bino ey'iye bongi jo, meno aka nyaka jocaki riyo kec.”

²¹ “Ongoye ŋata kwoyo kiremo nanga ma fodi nyen wi nanga m'oti. K'otimo ameno, kiremo manyen bino ywayo woko kasegere nanga no to medo yec malac loyo waŋe macon.

²² Ongoye ŋata konjo vini manyen i mugowa pien mere m'oti; k'otimo ameno, mugowa pien bino yec to vini oy, to go keŋ vini kiri gi mugowa no je. To vini manyen bende ikonjo i migowa pien manyen!”

Penji kwoŋ Sabato

²³ Ndelo ma Sabato moro, Yesu onwaŋo wotho i ndelo ŋano, to jofonjirok pere jocodo withi ŋano malomalo.

²⁴ Gino omiyo Jofarisayo jopenjo go ni, “Raŋo ma jofonjirok perin joturo Cik ma Sabato?”

²⁵ Go odwoko ni, “Fodi wikisoma ye gima cango Daudi otimo munyo go kodi ji pere oyido jongoye gi gir'acama:

²⁶ Paka go odonjo i Ot pa Were i ndir pa Abiatha, jadwoŋ pa jocway ri Were i wi migam aka ocamo mugat ma jocway ri Were i wi migam kende ama oyey jo camo, to miyo ji pere bende?”

²⁷ Gikenyo Yesu owaco rijo ni, “Sabato okethi ma bero pa dhano, to dhano k'ocwey ri Sabato;

²⁸ am'omiyo Wod Dhano dhumo kiri Sabato bende.”