Mariko 1 - KITAWO MALEŊ Catholic

Wac pa Yohana Jakibatisa

¹ Me a cakirok ma Wac Manyen Maber mapa Yesu Kristo Wod Were paka

² ondiki i kitawo pa Isaya jatuci wac Were ni, “Neni aoro jamikwenda paran, ma bino yiko rin royo wotelin.

³ Dwondi jo moro koko i thim ni, ‘Yik win royo pa Rwoth, tir win royin pere mathindho thindho je.’ ”

⁴ Ameno Yohana Jakibatisa onenere i thim, kareno batisa ji, aka fonjo jo ni jowoŋuti reco pajo aka ŋey Were wocwaki jo.

⁵ Ji ma wok iy'adec je ma Yuda kodi Yerusalem jokidho bonge, aka obatisa jo i jwom Yordan, munyo jotuco reco pajo.

⁶ Ruk pa Yohana oyido obedo pien ŋamia kareno tweyo piere gi del ma pien, aka camo bonyo kodi mo kic.

⁷ Yohana ofonjo ka waco ni, “Nyatoro luwan cen, ŋata loyan swa gi dwoŋ, m'akiripi kada luŋirok piny gonyo rigo thol war pere.

⁸ Abatisa win gi pi kende, to go bino kibatisa win gi Cuny Maleŋ.”

Batisimo kodi karatem pa Yesu

⁹ I hongo no ama Yesu owok'iye Nazareth i piny Galili aka Yohana obatisa go i jwom Yordan.

¹⁰ Tekin Yesu wok i pi, oneno polo oyawere, to Cuny Maleŋ pie kwoŋe i cal p'akuru.

¹¹ Aka dwondi jo moro owok i polo ma waco ni, “In i Wodan m'amaro, asangala kodin.”

¹² Gikenyo Cuny Maleŋ otero Yesu i thim kama d'ogwaŋe.

¹³ Yesu otieko kenyo ndelo piero aŋwen, munyo Sitan temo go; aka jomalaika jokonyo go.

¹⁴ Munyo otiek mako Yohana otwey go, to Yesu kidho Galili. Kenyo go ofonjo Wac Manyen Maber ma wok bongi Were.

¹⁵ Go owaco ni, “Ndiri otundo, aka Ker pa Were ocore cegin. Ŋuti win reco mewin, aka wiyeyi Wac Manyen Maber.”

Yesu lwoŋo cwo aŋwen ma jokitoga

¹⁶ Munyo Yesu wotho dho thengi wakawaka ma Galili, oneno jokitoga, Simon kodi Andereya omin go, munyo oyido jociko bwo pajo i wakawaka.

¹⁷ Yesu owaco rijo ni, “Luwan win abino loko win jokitoga ji.”

¹⁸ Piyo piyo no joweyo bwo pajo, to joluwo go.

¹⁹ Munyo owotho nyaka mathin, odoko oneno Yakobo gi Yohana wot Zebedayo m'oyido jonitie i ye pajo joyiko bwo pajo.

²⁰ Piyo no to lwoŋo jo, to joweyo ba gin Zebedayo kodi jotic pere i ye to joluwo go.

Dhano ma jwogi ni kwoŋe

²¹ Gikenyo Yesu gi jofonjirok pere jokidho Kapernaum; aka i ndelo ma Sabato, Yesu odonjo i kitipa pa jom'oyeyo pa Joyuda to fonjo.

²² Ji jouro swa, rupiri go ofonjo pa ŋata nigi meni, makiweno paka jondiko.

²³ Piyo piyo no dhano ma cuny m'ocido oyido ni kwoŋe odonjo i kitipa pa jom'oyeyo pa Joyuda ni pil, to cako koko ni,

²⁴ “Imito timo wan nedi, Yesu Janazareth? Ibino ka reyo wan woko? Aŋeyin, i ŋataleŋ pa Were.”

²⁵ Yesu obwoko go munyo waco ni, “Liŋi, aka woki woko kwoŋ go.”

²⁶ Gikenyo cuny m'ocido no oyengo ŋato gi meni to wok kwoŋe munyo koko gi derino madwoŋ.

²⁷ Gino omiyo ji je dhier tektek to wegi jopenjere kendi gin ni, “To me aŋo? Kole me fonji manyen! Go oro kiri cuny m'ocido wok aka jowinjo go!”

²⁸ Gikenyo nyinge olak iy'adec ma Galili je parom.

Yesu botho ji kweth

²⁹ Tekin jowok i kitipa pa jom'oyeyo pa Joyuda, Yesu kodi Yakobo jokidho kodi Andereya peco pa Simon.

³⁰ Or Simon madhako onwaŋo nitie i kanindo kwoŋe oowere, to jowaco ri Yesu mayot paka dhakodwoŋ no two.

³¹ Yesu okidho bonge, omako cinge, to dheno ay malo. Ameno two no oweyo go, to go cako rweyo jo.

³² Othieno no, munyo waŋceŋ otieko podho, ji jokelo ri Yesu jotwo je, kodi joma onwaŋo jwogi nikwoŋ gin.

³³ Ji ma tindi gipi to jowura rigo dhiot.

³⁴ Yesu obotho ji madit m'onwaŋo joramere gi two m'opokere opokere: Go oriemo woko jwogi bende, ma k'oyeyo jo luwo, rupiri oyido joŋeyo go.

Yesu fonjo i Galili

³⁵ Yawere mere odikin, ma piny fodi k'ocot, Yesu ocew to wok i ot no, to kidho gicen kwayo.

³⁶ To Simon gi wadi jowok rango go,

³⁷ aka munyo jonwaŋo go, jowaco rigo ni, “Dhano je dwarin.”

³⁸ Yesu odwoko ni, “Ere wakidhi win i tindi man, afonji korago bende; kole gino ama okelan.”

³⁹ Owotho Galili munyo fonjo i kitipa pa jom'oyeyo pa Joyuda, kendo munyo riemo woko jwogi kwoŋ ji.

Yesu botho jadhowo moro

⁴⁰ Gikenyo jadhowo moro obino bothi Yesu, to guro conge piny, to kwayo go ni, “K'iyeyo, inyalo bothan.”

⁴¹ Yesu omako gine wor, aka ocwayo cinge ogeyo go, to waco ni, “Ayeyo; bothi.”

⁴² Gikenyo won, dhowo no oeye kwoŋ ŋato, to kwoŋe cango m'olony.

⁴³ Yesu ociko go teltel munyo sewila go ni,

⁴⁴ “Ikir'iwaci ri nyatoro gime; kidhi inyuthere i waŋ jacway ri Were i wi migam, aka imiy go mic paka Musa oketho i cik, aka dhano je woŋey ni itieko both adieri.”

⁴⁵ To jalo ocako nyayo wac no iye je, m'omiyo Yesu odoko k'onyalo donjo i tindi kamaler, to bedo gicen kama ongoye iye ji, aka kenyo ama ji jobin'iye bonge wok kaman man je.