Malaki 3 - KITAWO MALEŊ Catholic

¹ Neni, adhiro jamikwenda paran yiko ran yo, aka Rwoth ma widwaro labino abwap i ot pere ma lamo. Go ma wimito neno labino tito cikirok paran.

² To ŋa m'ocir ndelo ma bino pere? Aka ŋa m'ocungi ka go onen? Go bino cal sabun ma cido cilo, kodi mac ma thedho nyweny.

³ Go bino thumo banja paka ŋata thedho aka lonyo feza, aka bino lonyo wot Levi to lonyo jo paka zahabu gi feza, cuka jomiyo Rwoth mic ma ripo gi go.

⁴ Kenyo nyaka mic ma Yuda gi Yerusalem jomiyo Rwoth bino kisangala go paka oyido jotimo yucen.

⁵ Rwoth pa lwak jolweny waco ama: Kenyo abino core cegin gi win thumo banja; aka abino bedo mayil kwoŋ jothieth, jocot, ji ma jokwoŋere nono, ji ma jodiyo jakipakasa cul pere, citho, nyithindho kic, kodi jopath, aka jokilworan.

Culo acel wiy apar

⁶ Rupiri An abedo Rwoth akiwire, riameno win, wot Yakobo fodi wikirere kicutho.

⁷ Wok i ndir ma wiketho cik paran gi thenge aka wikikuro. Dwoki win bongan, aka abino dwoko bongi win, Rwoth pa lwak jolweny waco. To wipenjo ni, “Wanodwoki nedi?”

⁸ Nyatoro okwal Were? Kucel wikwalan. To wipenjo ni, “Wakwalin nedi?” Iy'acel ma wi apar gi mic mewin.

⁹ Akwoŋo win rupiri wikwalan, win piny gibe.

¹⁰ Keli win acel wiy apar gikululu i ot paran ma lamo, ŋey cemo wobedi i ot paran. Teman win, Rwoth pa lwak jolweny waco, k'inen ak'oyaw dirisin ma polo riwin t'akonjo piny riwin silwany gibe.

¹¹ Akibino weyo kudin wonyeki cemo mewin, aka ndelo vini mewin bino poŋ gi nyingi vini.

¹² Kenyo ji ma piny je jobino lwoŋo win ni wijosilwany, rupiri piny mewin bino bedo maber kwo i iye.

Cikirok pa Were ma wor

¹³ Wiwaco wac mareco kwoŋan, Rwoth waco. Kucel wipenjo ni, “Aŋo ma wawaco kwoŋin?”

¹⁴ Witieko waco ni, “Ongoye kony tiyo ri Were? Bero aŋo timo gima go waco kosa temo nyutho Rwoth pa lwak jolweny ni warem ri gima watimo?

¹⁵ Paka waneno, jokwoto ama josangala. Joreco nyaka jokitim maber, to ka jotemo Were jokwale.”

¹⁶ Kenyo jom'oyido jolworo Rwoth joluwo wegi, aka Rwoth owinjo gima jowaco, aka kitawo pa ji ma jolworo Rwoth aka joworo go ondiki.

¹⁷ Rwoth pa lwak jolweny owaco ni, “Jobino bedo ji paran won, i ndelo m'anotimi gimoro, aka abino koyo jo paka ba nyathi nyutho wor ri wode ma tiyo rigo.

¹⁸ Kenyo wibino poko kwoŋ jom'otire gi jokidakana, ji ma jotiyo ri Were gi joma kitiy rigo.”