Luka 9 - KITAWO MALEŊ Catholic

Yesu dhiro jofonjirok apar g'ario woko

¹ Yesu olwoŋo japar g'ario kanyacel to miyo jo nyalo kodi meni ma riemo woko jwogi gi botho two.

² Gikenyo go odhiro jo fonjo kwoŋ Ker pa Were gi botho ji.

³ Owaco rijo ni, “Wikiri wikwany gimoro ma woth mewin; kada luth, kosa mugowa, kosa cemo, kosa pesa, kosa nangin ario.

⁴ Kam'ojol'iye win, bedi win kenyo kende cuka winoeye i tindi no;

⁵ kama k'ojol'iye win, ka wiay i tindi no, teŋi win woko fukefuke ma tiendi win paka ranyuth ma theko win gi jo.”

⁶ Jofonjirok jomako royo to jowotho kabedo m'omore omore munyo jofonjo Wac Manyen Maber gi botho jotwo kisi kamoro.

Nywowirok pa Herode

⁷ Herode, rwoth ma Galili, owinjo kwoŋ gigipiny m'oyido timere; gino omiyo go dhier swa, rupiri jomegi jowaco ni, “Yohana Jakibatisa osukina kendo.”

⁸ Joman ni Elia am'omenyere, aka joman jowaco ni acel kwoŋ jotuci wac Were macon am'osukina kendo.

⁹ Herode owaco ni, “Cango aŋondo woko wic Yohana; to me ŋa ma awinjo kwoŋe gigipiny me?” To cako rango neno Yesu.

Yesu pidho ji gana abic

¹⁰ Jomoor jodwoko to jowaco ri Yesu gimoro je ma jotimo. Go okwanyo jo to jokodere gicen i tindi m'ilwoŋo ni Bethsayida.

¹¹ Munyo lwak ji jowinjo ameno, joluwo jo. Yesu ojolo jo to luwo gi jo kwoŋ Ker pa Were, aka obotho joma two.

¹² Munyo piny kidho yutho, jofonjirok japar g'ario jobino bongi Yesu to jowaco ni, “Sewila ji jowokidhi iy'adec macegin kodi loka man je koro jowonwaŋ kanindo kodi gir'acama. Kole k'obedo dier thim.”

¹³ To Yesu owaco rijo ni, “Wiwegi miy win jo gir'acama.” Jodwoko ni, “Gima wanitie gine a nyaka mugat abic gi rec ario won kende. Kono bedi wanyalo kidho nyewo cemo ri lwak ji me je di watimo amanago.”

¹⁴ (Jono onwaŋo joromo cegin cwo gana abic.) Yesu owaco ri jofonjirok pere ni, “Waci win jowobedi piny i kitipa ma piero abic abic.”

¹⁵ Jotimo ameno to jooro ji je bedo piny.

¹⁶ Gikenyo Yesu okwanyo mugat abic kodi rec ario no, otiŋo waŋe malo oŋiyo polo, to miyo silwany; aka oturo to miyo jofonjirok pere jowopoki lwak ji.

¹⁷ Ji je jocemo paka joyenyo aka ocoki ŋinjeŋinje m'odoŋ to poŋo aditin apar g'ario.

Petero tuco ŋata Yesu obedo

¹⁸ Ndelo moro munyo Yesu oyido kwayo kakende aka jofonjirok pere oyido jo ni bonge, openjo jo ni, “Ji jowaco ni an a ŋa?”

¹⁹ Aka jodwoko ni, “Yohana Jakibatisa; to joman ni Elia; aka joman ni acel kwoŋ jotuci wac Were macon am'osukina kendo.”

²⁰ Yesu owaco ni, “To win wiwaco ni, an a ŋa?” Petero oluwo malo, to waco ni, “Kristo pa Were.”

Yesu luwo kwoŋ candirok kodi tho pere

²¹ Ro wac no Yesu ociko jo teltel ni kiri jowowaci ri nyatoro gime;

²² owaco ni, “Wod Dhano ripo candirok i royo kweth, aka jotel pa ji kodi jotel pa jocway ri Were i wi migam kodi Jondiko jobino kwero go to joneko go, to icerino go i ndelo mar'adek.”

²³ Gikenyo Yesu owaco rijo ni, “Ka moro mito luwan, go won kutho ripo kwerere kende, wotiŋ musalaba pere kisi ndelo, aka woluwan.

²⁴ Ato ŋata won omiti botho kwo pere bino rwenyo woko; to ŋat'orweny kwo pere ran bino botho kwo no.

²⁵ Kony aŋo ma dhano onwaŋ ka oloki piny gipi apere to rwenyo kosa bolo woko kwo pere won?

²⁶ Ŋata wiye kwot kodan gi wac paran, Wod Dhano bende wiye bino kwot kodi go k'odwoko i dwoŋ pere kodi i dwoŋ pa Bamere kodi apa jomalaika maleŋ.

²⁷ To awaco riwin adieri, kwoŋ win nitie joma jocungo ka ma jok'otho mafodi jok'oneno Ker pa Were.”

Lokirok ma cal pa Yesu

²⁸ Munyo ndelo aboro okadho cuka Yesu waci gigipiny me, go okwanyo Petero gi Yohana gi Yakobo to joidho wi got kwayo.

²⁹ Aka munyo kwayo to cal pere wire, omiyo ruk pere olokere matar cilili.

³⁰ Gikenyo cwo ario, Musa kodi Elia, joluwo gine.

³¹ Jomenyere i dwoŋ ma polo aka joluwo gi Yesu paka go cegin cowo atoŋa pa Were m'obedo tho pere i Yerusalem.

³² Petero gi wadi oyido nindo okwalo jo, to munyo jocewi, joneno dwoŋ pa Yesu kodi cwo ario ma jocungo bonge.

³³ Munyo j'ario no oyido joeye bongi Yesu, Petero owaco rigo ni, “Jadwoŋ, apaka bedo ka ber ama! Weyi wageti kayindere adek: Acel rin, acel ri Musa, acel ri Elia.” Go oyido okuya odoco gima go oyido waco.

³⁴ Munyo fodi go luwo ameno, pondeponde obino to umo jo, to lworo omako jofonjirok munyo jodonjo i pondeponde no.

³⁵ Gikenyo dwondi jo moro owaco gi i pondeponde ni, “Me Wodan, m'ayero, winji win go!”

³⁶ Munyo dwondi jo no otieko luwo, onenere ni Yesu won am'oyido odoŋ kende. Jofonjirok joliŋ gi gigipiny no ma jok'owaco ri nyatoro i hongo no kada gimoro kwoŋ gima joneno.

Yesu botho jayac ma nigi cuny m'ocido kwoŋe

³⁷ Yawere mere, munyo joloro wi got, lwak ji joromo gi Yesu.

³⁸ Gikenyo, dhano moro okoko i dier ji ni, “Jafonji, akwayin ikony'iye wodan, rupiri go a nyathi acel won m'anigine.

³⁹ Aka jwogi moro monjo go noknok, miyo go koko malo, to fum redho go piny, to gweco cuka bwoyo wok i dhoke, to futa go aka kimiti kada weyo go.

⁴⁰ Akwayo jofonjirok perin ni joworiemi woko jwogi no kwoŋe, to jok'onyalo.”

⁴¹ Yesu odwoko ni, “A luse ji ma buyeyo kendo m'omienere, anobedi gi win kiri keraŋo ma fodi anere gi win? Keli wodin ka”

⁴² Munyo jayac no kidho, jwogi owito go aka ofodo go piny to gweco. To Yesu oay kwoŋ cuny m'ocido no, to botho jayac no, to dwoko go ri bamere.

⁴³ Aka dhano je ouro meni pa Were. To munyo ji je fodi jouro gima Yesu otimo, owaco ri jofonjirok pere ni,

Yesu luwo kendo kwoŋ tho pere

⁴⁴ “Weyi wac me wodonji i ithi win; rupiri ibino ketho Wod Dhano i cingi ji.”

⁴⁵ To jok'oniaŋ dwoŋ wac no, aka opan ni kiri jowoniaŋ; kendo lworo omako kiri jo penjo go wac me.

Ŋa ma dwoŋ loyo?

⁴⁶ Piem ocakere i dier jo ni kwoŋ jo ŋa maloyo wadi gi dwoŋ.

⁴⁷ To munyo Yesu oniaŋ paro ma cuny jo, okwanyo nyathi moro to ketho go cungo kabonge.

⁴⁸ Aka owaco rijo ni, “Ŋata jolo nyathi me i nyingan meno jolan; aka ŋata jolan, meno jolo ŋat'ooran; kole ŋat'oasa thin i dier win meno a ŋatadwoŋ loyo.”

Ŋata kimon gi win meno nitie gi win

⁴⁹ Yohana odwoko ni, “Jadwoŋ, wanwaŋo nyatoro riemo jwogi i nyingin, to wacero go, rupiri go kiwothi gi wan.”

⁵⁰ To Yesu odwoko go ni, “Wikiri wicer go; kole ŋata kimon gi win meno nitie yuthenge mewin.”

Loka moro i Samaria kwero jolo Yesu

⁵¹ Munyo ndir pere orikere ma dok i polo, Yesu oridho paro ma kidho Yerusalem.

⁵² Aka odhiro jomikwenda pere yuwiye, to jokidho loka ma Samaria yiko rigo kabedo.

⁵³ To jono jok'oyeyo jolo go paka go oyido omako yo ma kidho Yerusalem.

⁵⁴ Munyo jofonjirok pere joneno ama, Yakobo gi Yohana jowaci ni, “Rwoth, imito walwoŋ mac wok i polo wowaŋ woko jo?”

⁵⁵ To Yesu owire oŋiyo jo to bwoko jo.

⁵⁶ Aka jomedere kadho yu loka man.

Joma di jobedo joma luwo Yesu

⁵⁷ Munyo jowotho, joromo gi dhano i royo m'owaco ri Yesu ni, “Abino luwin kam'inokidh'iye je.”

⁵⁸ Yesu odwoko ni, “Kibwe jonitie gi kero pajo, aka winyin ma malo bende jonitie gi od gin, to Wod Dhano ongoye kodi ka theno wiye.”

⁵⁹ To ri ŋatiman Yesu owaco ni, “Luwan.” To ŋato dwoko ni, “Jadwoŋ, weyi kutho akidhi ayiki baba, otho.”

⁶⁰ To Yesu dwoko go ni, “Weyi jom'otho jowoyiki jom'otho pajo, tic perin kidho nyayo wac kwoŋ Ker pa Were ayin.”

⁶¹ Ŋati man owaco ni, “Alaluwin Jadwoŋ, to weyi kutho akidhi asewila jopeco.”

⁶² Yesu owaco rigo ni, “Dhano je ma furo gi kwer dhok aka kethere ŋiyo cen meno kiripi gi Ker pa Were.”