Luka 7 - KITAWO MALEŊ Catholic

Yesu botho ŋeca pa jatic madwoŋ ma Roma

¹ Munyo Yesu ocowo waco gima go oyido yenyo ji jowowinji, okidho Kapernaum.

² Jasirikale ma Jaroma moro onwaŋo nitie gi jatic pere m'omaro swa, aka onwaŋo two tektek macegin gi tho.

³ Munyo owinjo kwoŋ Yesu, ooro jotel pa Joyuda moro bonge kwayo go nike wobin wobothi jatic pere no.

⁴ Munyo jotundo bongi Yesu joywakere rigo swa ka jowaco ni, “Ripo itimi ri jame kony,

⁵ rupiri go omaro nono mawan, aka otieko kiri geto riwan kalamo pa Joyuda.”

⁶ Gikenyo Yesu okadho gi jo aka munyo oriko peco, jasirikale no ooro merin pere bonge waco rigo ni, “Rwoth, ikir'icandere, kole kiripi ran k'idonjo i ot paran.

⁷ Aka meno am'omiyo awon akitiŋere bino bongin, to luw nyaka wac acel kende, to jatic paran bedo maber.

⁸ Kole nitie joma dhuman, aka abende adhumo jolweny man. K'awaco ri acel ni, ‘Kadhi.’ To go kadho, aka ri man ni, ‘Biye ka.’ To go bino; kendo k'awaco ri jatic paran ni, ‘Tim gimanyo.’ To go timo.”

⁹ Munyo Yesu owinjo wac me, ouro swa, to wire neno lwak ji, to waco ri joma luwo go ni, “Awaco riwin, kada i Isiraili gipi fodi akinwaŋo kiti yeyo me.”

¹⁰ Aka munyo jomikwenda jogik i ot, jonwaŋo jatic no olama.

Yesu cerino wod pa citho

¹¹ Rumacen mayot, Yesu okidho i tindi m'ilwoŋo ni Nayin, kama jofonjirok pere kodi lwak ji madwoŋ jokwaŋ'iye go.

¹² Munyo oriko waŋkac ma tindi no, oneno otiŋ ŋat'otho m'obedo wod pa citho moro, aka manago onwaŋo obedo nyathi acel no won kende. Lwak ji ma tindi oyido jowotho gi dhako no kanyacel.

¹³ Munyo Rwoth oneno dheno, wor omako go gine, to waco ni, “Ikir'iywak.”

¹⁴ Gikenyo go okidho to ketho cinge kwoŋ kitanda pa jatho, to jom'otiŋo jocungo; to waco ni, “Jayac, awaco rin, ay malo.”

¹⁵ Ŋat'otho oay obedo to cako luwo, to Yesu dwoko go i cingi yokimere.

¹⁶ Dhano je obwok to pako Were munyo jowaco ni, “Jatuci wac Were madwoŋ omenyere i dier wan: Were oliewo ji pere.”

¹⁷ Wac m'otimere kwoŋe me onyay i Yuda gipi kodi iy'adec m'othoko kenyo.

Jomikwenda pa Yohana Jakibatisa

¹⁸ Jofonjirok pa Yohana jowaco ri Yohana gigipiny me je. Aka munyo Yohana olwoŋo jofonjirok pere ario,

¹⁹ odhiro jo bongi Rwoth penjo go ni, “In a ŋata Yohana owaco ni labino kosa fodi wakur ŋatiman?”

²⁰ Aka munyo jono jobino bonge jowaco ni, “Yohana odhiro wan bongin ka penjin nike, in a ŋata ripo bino, kosa wakur ŋatiman?”

²¹ I hongo no Yesu obotho jotwo mathoth, thoyamo kodi cuny m'ocido, aka ji mathoth m'onwaŋo waŋ gin otho joneno.

²² Riameno odwoko jo ni, “Kidhi wiwaci ri Yohana gima witieko neno gi winjo: Joma waŋ gin otho joneno, jom'oŋol jowotho, jodhowo kwoŋ gin lony, joma ithi gin otho jowinjo, jom'otho jocerino, jocandi ifonjo jo Wac Manyen Maber.

²³ Aka jasilwany a ŋata kiteran marac.”

²⁴ Munyo jomikwenda pa Yohana jotieko kadho, Yesu ocako luwo gi lwak ji kwoŋ Yohana ka waco ni, “Onwaŋo wikidho neno aŋo i thim? Midole ma koyo yengo? Aŋo won m'onwaŋo wikidho neno? Dhano m'oruko nangin mabeyo?

²⁵ Neni win, kole joma rukere ma noro aka jocemo maber jonwaŋere i diedipo pa kere ayin.

²⁶ To onwaŋo wikidho neno aŋo won? Jatuci wac Were? Adieri awaco riwin, go loyo kiri jatuci wac Were!

²⁷ Me a ŋat'ondiki kwoŋe ni, ‘Neni, adhiro rin jamikwenda paran yuwiyin, ma bino kutho yiko rin royo.’

²⁸ Awaco riwin, kwoŋ joma mon onywolo je ongoye maloyo Yohana gi dwoŋ; to kucel kiri ŋatathin loyo i Ker pa Were, je loyo go gi dwoŋ.”

²⁹ (Munyo ji je kodi jocoki misolo jowinjo go, joyere gi wac pa Were rupiri Yohana obatisa jo.

³⁰ To Jofarisayo kodi Jondiko jocayo atoŋa pa Were rijo wegi, omiyo jokwero Yohana obatisa jo.)

³¹ “Anopima ji ma pama kodi aŋo, kosa jocale aŋo?

³² Jocale nyithindho ma jobedo i katale. Aka kweth acel koko ri man ni, ‘Kole wakudho riwin madundo, to wikimielo; wawero wer ywak to wikiywaki!’

³³ Yohana Jakibatisa obino ma riyo kec aka kimedhi, to wiwaco ni, ‘Go nigi jwogi kwoŋe!’

³⁴ Onyo Wod Dhano obino ma cemo aka oro gir'amadha to wiwaco ni, ‘Neni ŋato jaworo, odoko jamadhi vini, aka mere pa jocoki misolo kodi joreco!’

³⁵ To kad'ameno ji je ma joyeyo rieko pa Were jotero paka otire.”

Yesu i ot pa Simon Jafarisayo

³⁶ Jafarisayo acel olwoŋo Yesu cemo peco pere. Munyo Yesu otundo peco pa Jafarisayo no to bedo dhower,

³⁷ dhako moro odonjo, m'onwaŋo odakana swa i tindi. Munyo go owinjo ni Yesu cemo i ot pa Jafarisayo no, obino gi cupa mo maŋwe kur,

³⁸ to cungo yuŋeye dho ka tiende munyo ywak, to cako oyo pigi waŋe i tiendi Yesu, to yweyo gi ye wiye; to cwiyo tiende, to wiro gi mo maŋwe kur.

³⁹ Munyo Jafarisayo m'olwoŋo Yesu oneno ameno, won owaco kende ni, “Bedi ŋati me bedi jatuci wac Were adieri, kole d'oŋeyo kiti dhako ma geyo go me, paka go jareco”

⁴⁰ Gikenyo Yesu ogamo dhoke ka waco ni, “Simon, nitie gim'amito waco rin.” Anago ni, “Jafonji, waci ran.”

⁴¹ “Jal moro oyido nigi jobanjin pere ario; ŋat'acel obedo gi banja pere ma siringi miya abic, ŋatiman piero abic.

⁴² Munyo culo pesa no odhiero jo, jalo ocwako joje. K'ameno, ŋa kwoŋ jono ma bino maro go loyo?”

⁴³ Simon odwoko ni, “Aparo ni ŋata go ocwako banja madwoŋ loyo.” Yesu odwoko ni, “Itundo.”

⁴⁴ Gikenyo Yesu owire oŋiyo dhako no, to waco ni, “Simon, ineno dhako me? Adonjo i ot perin, to ikimiyan kada pi ma lwoko tiendan, to go owok lwoko tiendan gi pigi waŋe, aka oyweyo kiri gi ye wiye.

⁴⁵ Ikicwiyo lemban, to go k'oweyo cwiyo tiendan cuka nende adonji ka.

⁴⁶ Ikiwiro mo i wiyan, to neni go owok wiro tiendan gi mo maŋwe kur.

⁴⁷ Am'omiyo awaco rin, mar m'oasere ma go onyutho omiyo reco pere madit otiek cwako rigo. Ato ŋat'ocwaki rigo manok ama nyutho mar manok.”

⁴⁸ Gikenyo Yesu owaco ri dhako no ni, “Reco perin otiek cwako rin.”

⁴⁹ Gikenyo joman m'onwaŋo jobedo i dhower jocako waco kendi gin ni, “Me ŋa ma bende cwako reco?”

⁵⁰ To Yesu owaco ri dhako no ni, “Yeyo perin otieko bothin; kadhi i siem.”