Luka 6 - KITAWO MALEŊ Catholic

Penji kwoŋ Sabato

¹ I Sabato moro, munyo Yesu wotho i ndelin ma ŋano, jofonjirok pere jofono withi ŋano, joŋinyo i cingi gin, to jocamo.

² To Jofarisayo moro jopenjo ni, “Raŋo ma witimo gima k'oyey i Sabato?”

³ Yesu odwoko jo ni, “Fodi wikisoma gima Daudi otimo munyo kec oyido neko jo kodi jom'onwaŋo ni bonge?

⁴ Paka go odonjo i Ot pa Were, okwanyo mugat ma cowirok to camo, ma to k'oyey joman camo kwanyo woko jocway ri Were i wi migam kende, aka omiyo jom'onwaŋo jonigi go bende to jocamo?”

⁵ Aka owaco rijo ni, “Kole Wod Dhano obedo Rwoth ma dhumo Sabato.”

Dhano ma cinge otho

⁶ I Sabato man, munyo Yesu odonjo i kalamo pa Joyuda to fonjo, dhano ma nyaŋinya omako cinge maracuc oyido nitie kenyo.

⁷ Jondiko kodi Jofarisayo jocomo waŋ gin kwoŋ Yesu munyo jomito neno ni kono obothi jatwo no i Sabato, ŋey kono nyaka jowonwaŋ atoŋa ma kisita Yesu.

⁸ To go oŋeyo paro pajo; am'omiyo owaco ri ŋata cinge otho no ni, “Biye cungi ka.” Ŋat'oay, obino, to cungo kenyo.

⁹ Aka Yesu owaco rijo ni, “Apenjo win, oyey timo bero i ndelo ma Sabato, kosa raco ayin; botho kwo, kosa nyeko woko ayin?”

¹⁰ Gikenyo oŋiyo joje korin gi korin, to waco ri ŋato ni, “Riey cingin.” Ŋato bende otimo ameno to cinge bedo maber.

¹¹ To nge poŋ i cuny jono, omiyo jocako cano gima di jonyalo timo ri Yesu.

Yesu yero jofonjirok apar g'ario

¹² I hongo no Yesu okidho wi got kwayo; aka obedo wor gipi i kwayo Were.

¹³ Munyo piny oyawere, olwoŋo jofonjirok pere, to yero japar g'ario i dier jo m'olwoŋo ni Jomoor;

¹⁴ Simon, m'ocwoko nyinge ni Petero, kodi Andereya omin, kodi Yakobo gi Yohana, kodi Filipo gi Batholomayo,

¹⁵ Matayo gi Toma, Yakobo wod pa Alfayo gi Simon, (m'onwaŋo ilwoŋo ni Jalweny ri piny pere), gi

¹⁶ Yuda wod pa Yakobo kodi Yuda Iskariot, m'ocamo ri Yesu sereko.

Yesu fonjo gi botho jotwo

¹⁷ Yesu oloro piny kodi japar g'ario no, to cungo kam'obipere, kama jofonjirok pere kweth jocoker'iye gi lwak ji m'owok thenge je ma Yuda, kodi Yerusalem kodi loka Tire gi Sidon m'othenere gi wakawaka,

¹⁸ m'onwaŋo jobino winjo go kodi kwayo ni wocangi two pajo; aka jom'onwaŋo cuny m'ocido cando jo joboth.

¹⁹ Ji je jotemo geyo go rupiri meni oyido wok kwoŋe aka botho joje.

Silwany kodi kumo

²⁰ Gikenyo Yesu otiŋo waŋe malo, oŋiyo jofonjirok pere, to waco ni, Josilwany a win ma wicandere i cuny win, Kole Ker pa Were obedo mewin.

²¹ Josilwany a win ma pama kec neko win, kole ibino yeŋo win. Josilwany a win ma pama wiywak, kole wibino nyero.

²² Wijosilwany ka ji jodak win, joriemo win woko, joyeto win, aka jonyeko nyingi win ni wi joreco kwoŋbedo Wod Dhano.

²³ Sangala win ro ndelo ma bino tundo, aka uci win gi miel. Kole kemba mewin bino bedo madwoŋ i polo. Me a kite ma bacere pajo jotimo ri jotuci wac Were bende.

²⁴ To kidamba otundi riwin wijoŋaŋo, rupiri witieko limo siem mewin.

²⁵ Kidamba otundi riwin ma pama wiyeŋ; kole wibino pal gi kec. Kidamba otundi riwin ma pama winyero; kole wibino winjo malith to wiywak.

²⁶ Kidamba otundi riwin ma pama piny pako win; kole meno apaka cango kwarere mewin bende jopako jotuci wac Were ma twodo.

Maro jokwor mawan

²⁷ T'awaco riwin ma wiwinjan, mari win jokwor mewin, kendo tim win maber ri joma mon kodi win.

²⁸ Miy win joma kwoŋo win silwany aka kway win ri joma yeto win.

²⁹ Ka moro ogoyo lembin acel adhoŋ, wiri rigo man bende; aka ka moro omayin kot perin, ikir'icer go sati bende.

³⁰ Nyatoro je ma kwayin gimoro miy go, aka ikir'ikway dhano ni wodwoki rin giperin m'otieko mayin.

³¹ Tim ri jowotin paka imito bende jowotimi rin.

³² Ka wimaro jom'omaro win kende, foy aŋo ma wigeno limo? Kole kiri joreco bende jomaro jom'omaro jo.

³³ Ka witimo maber ri joma timo riwin maber kende, foy aŋo ma wigeno limo? Kole kiri joreco bende jotimo ameno.

³⁴ Aka ka wimiyo joma wigeno ni jolaculo win gimoro kende, foy aŋo ma wigeno limo? Kole kiri joreco bende jomiyo joreco wadi gin gigipiny ka jogeno n'ibino dwoko rijo gima rom kodi ma jopoko.

³⁵ Kucel, mari win jokwor mewin, aka witim rijo maber. Odoko miy win ji gigipiny, ma wikigeno ni jobino culo win. Wibino limo kemba madwoŋ, aka wibino bedo nyithindho pa Ŋatadwoŋ Maloyo; kole go won cunye ber gi joma jokifoy go kodi joreco.

³⁶ Bedi win gi wor paka Bawin jawor.

Thumo banja ri joman

³⁷ Wikiri withum banja ri jowoti win, ŋey Were bende kilathumo riwin banja. Wikiri wirodhi jowoti win aka bende k'orodhi win. Cwaki win reco pa jowoti win aka bende ibino cwako mewin;

³⁸ Pok jowot win gigipiny, ŋey Were bino poko win bende. Rapor m'opoŋ, m'odile, m'oyengi to poŋ cuka oy; am'ibino ketho i cingi win. Kole rapor m'ioro ri jowotin ama Were bende bino oro ma kipima rin gine gima go dwoko rin.

³⁹ Yesu oluwo iy'ageca bende ni, “Ŋata waŋ'otho bende nyalo kodo nyawote ma waŋ'otho ma joje jok'opodho i bur?

⁴⁰ Kole ŋat'ifonjo kiloy jafonji pere gi dwoŋ, to ŋat'ofonji maber nyalo bedo marom kodi jafonji pere.

⁴¹ Raŋo ineno nyaka yath m'ocile m'ondhilo m'opodho i waŋ omerin aka ikineni k'oŋolo kasik manitie i waŋin won?

⁴² Kosa inyalo nedi waco ri omerin ni, ‘Omera, weyi akwany rin woko nyaka yath m'ocile m'ondhilo manitie i waŋin.’ T'ikinyal neno k'oŋolo kasik manitie i waŋin won? Jarendirok me, ber kutho ikwany woko k'oŋolo kasik man waŋin no, aka inonen odoco nyaka yath m'ocile m'ondhilo manitie i waŋ omerin, t'ikwanyo woko rigo.”

Yath kodi olemo mere

⁴³ Kole ongoye yath maber ma nyak gimarac, kosa yath marac ma nyak gimaber.

⁴⁴ Aka kisi yath iŋeyo ro gima nyak kwoŋe: Nyandere kifon wi kudhin, odoko vini kifon kwoŋ kudho oriaŋ.

⁴⁵ Am'omiyo dhano maber wodho tim mabeyo wok i kakano bero manitie i adundo pere; aka ŋatarac bende wodho tim mareco wok i kakano reco manitie i adundo pere. Kole wac ma dhano luwo je wok i gim'opoŋ iy'adundo pere.

Jogeto ario

⁴⁶ Raŋo ma wilwoŋan nike Rwoth, Rwoth, aka wikitim gim'awaco riwin?

⁴⁷ Dhano je ma bino bongan aka winjo wac paran to tiyo gine, abino nyutho win paka go cale:

⁴⁸ Go cale dhano ma munyo geto ot pere, okunyo tiendi ot maluth tundo i ge; aka munyo mikula opoŋ to mol kwoŋ ot no, k'onyalo yengo, rupiri ot onwaŋo ogeti matek.

⁴⁹ To ŋata winjo wac me aka kitiy gine, cale dhano ma munyo geto ot pere, k'okunyo tiende maluth m'oromo; mikula omol kwoŋ ot no, to podho piyo piyo, to nyekere kicutho.