Luka 24 - KITAWO MALEŊ Catholic

Cerino pa Yesu

¹ Odikin maŋic i ndelo ma cako tic, mon no jokidho i kaliel munyo jotiŋo gigipiny maŋwe kur ma joyiko no.

² Jonwaŋo tele m'oyido oum gine dhok kaliel oŋil woko,

³ to jodonj'iye; to jok'onwaŋo delkwoŋ Yesu.

⁴ Munyo fodi jocungo kenyo gi dhier kwoŋ gim'otimere, gikenyo no won cwo ario ma jorukere i nangin ma minyin jocungo kabuti jo.

⁵ Mon no joriewere piny, munyo lworo omako jo, aka cwo no jopenjo rijo ni, “Raŋo ma wirango ŋata kwo kwoŋ jom'otho?

⁶ Go ongoye ka; otieko cerino. Poyi win gima go owaco riwin munyo fodi nitie gi win i Galili ni

⁷ ibino ketho Wod Dhano i cingi ji mareco, jowoguri go kwoŋ musalaba to icerino go i ndelo mar'adek.”

⁸ Mon no jopoyo wac pere no,

⁹ jodwoko wok i kaliel, to jowaco gigipiny me je ri jofonjirok apar g'acel kodi joman je.

¹⁰ Mon no oyido obedo Maria Magadalina, Yoana kodi Maria min Yakobo; jono, kodi mon man ma jobedo bothi jo, jotero wac me ri jomoor.

¹¹ To jomoor joparo ni gima mon no jowaco oyido sisiri, to jokwero yeyo wac no.

¹² Petero oay oringo yu kaliel; oluŋere to neno nangin ma kaliel kende m'ongoye gimoro man. Gikenyo go odok peco munyo dhier kwoŋ gim'otimere.

Woth ma kidho yu loka ma Emao

¹³ I ndelo no won, jario kwoŋ jofonjirok pere oyido jokidho yu loka m'ilwoŋo ni Emao, cegin ma yiro abirio wok Yerusalem,

¹⁴ aka onwaŋo joluwo kwoŋ gigipiny je m'otimere.

¹⁵ Munyo fodi joluwo aka jopiemo, Yesu won gipi ocore cegin to wotho gi jo.

¹⁶ Joneno go, to jok'onyalo ŋeyo go.

¹⁷ Yesu openjo jo ni, “Wiliesa malomalo kwoŋ aŋo me?” To jocungo ma joliŋaliŋa munyo jonigi rem madit.

¹⁸ Gikenyo ŋat'acel kwoŋ jo, ma nyinge Kilopas, openjo go ni, “Iŋat'ibedo wendo i Yerusalem ka m'ikuya gim'otieko timirok i ndelo manok me?”

¹⁹ Go openjo jo ni, “Gigipiny aŋo?” Jodwoko ni, “Gim'otimere kwoŋ Yesu Janazareth. Ŋati me oyido jatuci wac Were, aka Were kodi ji je jotero go paka ŋata nigi meni i wac kodi i tim.

²⁰ To jotel mawan mapa jocway ri Were i wi migam kodi rwodhe, jotero go ni wothum rigo banja ma tho, to joguro go kwoŋ musalaba.

²¹ Aka onwaŋo wageno nike go ama bino botho Isiraili! Medo kwoŋ meno je, konon ndelo mar'adek cuka gino timere.

²² Aka mon moro ma kweth mawan jomiyo wan dhier madwoŋ. Nende jokidho i kaliel odikin worwor,

²³ to jok'onwaŋo delkwoŋe. Jodwoko munyo jowaco ni jomalaika moro jomenyere rijo ma jowaco nike go kwo.

²⁴ Jowoti wan megi bende jokidho i kaliel aka jonwaŋo ni obedo adieri paka mon no jowaco rijo won, to jok'oneno rigin go won.”

²⁵ Gikenyo Yesu owaco rijo ni, “A ji mamiŋ, aka wiboli i yeyo g'icuny win gimoro je ma jotuci wac Were jowaco!

²⁶ Wiparo ni onwaŋo kiripi ni Kristo wokutho wocandere i yo no aka nyaka wodonji i dwoŋ pere?”

²⁷ Yesu otito rijo gima Ndiko Maleŋ oluwo kwoŋe cako kwoŋ kitawin pa Musa tundo i ndiko pa jotuci wac Were je.

²⁸ Gikenyo munyo jotundo cegin gi loka m'onwaŋo jokidh'iye, Yesu otimo pa ŋata fodi medere gi woth pere;

²⁹ to jojuko go munyo jowaco ni, “Rwayi gi wan; kole piny oyutho aka onyo lokere macol.” Riameno Yesu odonjo to bedo gi jo.

³⁰ Munyo obedo dhower gi jo, okwanyo mugat to miyo silwany; gikenyo to turo mugat no to miyo jo.

³¹ Gikenyo waŋ jo oyawere to nyaka joŋeyo go; to go leny woko i waŋ jo ni many.

³² To wegi jocako penjirok ni, “Onwaŋo kicale pa cuny wan waŋ munyo go luwo gi wan i royo aka tito riwan Ndiko Maleŋ?”

³³ Joay mayot to jogik Yerusalem, kama jonwaŋ'iye jofonjirok apar g'acel jocokere kanyacel kodi joman

³⁴ aka onwaŋo jowaco ni, “Rwoth bende ocerino won, aka Simon otieko neno go!”

³⁵ Gikenyo jario no bende jotito rijo gim'otimere i royo, kodi paka joniaŋ kwoŋ Rwoth munyo oturo mugat.

Yesu menyere ri jofonjirok pere

³⁶ Munyo fodi jowaco rijo gime, jopoyo ka Rwoth won gipi ocungo i dier jo to waco rijo ni, “Siem wobedi gi win.”

³⁷ Lworo opoŋ kwoŋ jo gi bwok, rupiri oyido joparo nike onwaŋo joneno tipo dhano moro.

³⁸ To go owaco rijo ni, “Raŋo ma wibwok aka kiganagana bino i paro mewin?

³⁹ Neni win cingan kodi tiendan kole me an won. Mulan win, aka wibino neno, kole yamo ongoye gi riŋo gi cokin, paka wineno an gine.”

⁴⁰ Owaco gime to nyutho jo cinge gi tiende.

⁴¹ Munyo fodi jok'onyalo yeyo ro kisangala kodi dhier m'oyido oasere rijo; go openjo jo ni, “Winitie gi gir'acama moro ka?”

⁴² Jomiyo go rec m'otedi,

⁴³ ma go ojolo to camo ruwaŋ jo.

⁴⁴ Gikenyo owaco rijo ni, “Me gigipiny ma yado amaro waco riwin munyo fodi anitie gi win, ni gimoro je m'ondiki kwoŋan i Cik pa Musa, i ndiko pa jotuci wac Were, kodi i Zabuli onwaŋo ripo timirok.”

⁴⁵ Aka oyawo paro pajo ma niaŋ kwoŋ Ndiko Maleŋ,

⁴⁶ to waco rijo ni, “Me a gim'ondiki ni Kristo ripo kutho candirok t'icerino go kwoŋ jom'otho i ceŋ mar'adek,

⁴⁷ aka mikwenda ma ŋuto kodi ma cwako reco wotiti ri nonin je, cako Yerusalem.

⁴⁸ Wibedo jokony i gigipiny me.

⁴⁹ Aka abino dhiro riwin gima Baba ociko; to wiripo kuro i tindi cuka meni ma wok i polo olori riwin.”

Itero Yesu i polo

⁵⁰ Gikenyo okwanyo jo to tero jo yu Bethania kama go oriey'iye cinge to miyo jo silwany.

⁵¹ Munyo go miyo jo silwany, oeye bongi jo t'itero go i polo.

⁵² Jolamo Yesu to jogik Yerusalem ma kisangala opoŋ i cuny jo.

⁵³ To jocowo hongo pajo je i Ot pa Were munyo jopako Were.