Luka 23 - KITAWO MALEŊ Catholic

Yesu ruwaŋ Pilato

¹ Lwak ji gibe joay to jotero Yesu ruwaŋ Pilato

² kama jocako kel'iye kwoŋe wac ni, “Wanwaŋo jalin komo ji, munyo waco ri ji ni kiri jowogoy misolo ri Kayisar aka ŋoyo ni go Kristo m'obedo kere.”

³ Pilato openjo go ni, “In Kere pa Joyuda?” Yesu odwoko ni, “Eno iwaco.”

⁴ Gikenyo Pilato owaco ri jotel pa jocway ri Were i wi migam kodi lwak ji no ni, “Akinwaŋ gima miyan athum banja loyo ŋatin.”

⁵ To nyaka jomedo waco gi meni ni, “Go gi fonji pere kelo ri ji gwenyirok kwoŋ adhum! Go ocako i Galili, okidho Yuda gibe, aka pama onyo obino ka.”

Yesu ruwaŋ Herode

⁶ Munyo Pilato owinjo gino, openjo ni, “Yesu obedo Jagalili?”

⁷ Aka munyo go owinjo ni Yesu wok iy'adec ma Herode dhum'iye, odhiro go bongi Herode won, ma i hongo no oyido bende nitie Yerusalem.

⁸ Herode osangala swa munyo oneno Yesu, rupiri oyido otieko winjo kwoŋe, aka oyido otieko kiwanya neno go hongo malac; oyido geno neno Yesu ka timo gir'aura moro.

⁹ Am'omiyo Herode openjo Yesu kweth penji, to Yesu k'odwoko kada wac acel.

¹⁰ Jotel pa jocway ri Were i wi migam kodi Jondiko jocungo kenyo munyo jokelo wac madongo swa kwoŋ Yesu.

¹¹ Herode kodi jolweny pere jokelo ginyero kwoŋ Yesu to jotimo rigo gicay. Rumacen joruko rigo nanga maŋon to jodwoko go bongi Pilato.

¹² I ndelo no won ama Herode kodi Pilato jomak'iye mere; rupiri yado onwaŋo jodakere.

Ithumo ri Yesu banja ma tho

¹³ Pilato olwoŋo jotel pa jocway ri Were i wi migam kodi jodhum pa ji kodi ji je kanyacel,

¹⁴ to waco rijo ni, “Wikelo ŋatin bongan ka wiwaco ni go komo ji. Onyo atieko kikaŋasa wac m'okel kwoŋe je ruwaŋ win, t'akinwaŋ ni banja loyo go i gigipiny mareco ma wikelo kwoŋe no je.

¹⁵ Kada Herode bende k'onwaŋo kwoŋe banja moro, am'omiyo odwoko go bongi wan. Ongoye gima ŋatin otimo ma miy neki go.

¹⁶ Am'omiyo amito nike wocwadi go, t'aweyo go kadho.”

¹⁷ [I kisi hongo ma kalima ma Kadho Pilato yado omaro gonyo rijo jatwec acel.]

¹⁸ Gikenyo ji je jokoko ni, “Neki go! Gony riwan Baraba ayin!”

¹⁹ (Baraba me onwaŋo otwey ro gwenyirok kwoŋ adhum m'obedo i tindi, kodi ro neko ji).

²⁰ Pilato oyido mito gonyo Yesu, am'omiyo odoko oluwo gi jo;

²¹ to jodwoko gi koko ni, “Guri go, guri go kwoŋ musalaba!”

²² Pilato owaco rijo ma didek ni, “To raco aŋo won ma go otimo? Kole akinen raco moro ma go otimo ma di miy neki go. Am'omiyo alacwado go t'agonyo go.”

²³ To ji oyido jo ni g'arom kodi koko m'oasere ni wogur go kwoŋ musalaba. Kenyo to dwondi jo umo woko paro man je.

²⁴ Riameno Pilato otimo rijo paka oyido joyenyo.

²⁵ Ogonyo rijo ŋata jomito, ŋat'onwaŋo otwey ro gwenyirok kodi neko ji, to miyo jo Yesu ni jowotimi gine gima jomito.

Iguro Yesu kwoŋ musalaba

²⁶ Jokadho gi Yesu, aka munyo fodi jowotho, joromo gi dhano ma nyinge Simon ma wok Sireno m'onwaŋo bino i tindi. Jomako go, to jocuko go gi tiŋo musalaba yuŋey Yesu.

²⁷ Lwak ji m'oasere joluwo Yesu; kwoŋ jo oyido nitie mon moro m'onwaŋo joywako go, aka jowinjo malith swa.

²⁸ Yesu owire oŋiyo jo to waco ni, “Mon ma Yerusalem! Wikiri wiywakan, to wiwegi ywakere win kodi nyithindho mewin.

²⁹ Kole ndelo odiedere bino ma ji jobino wac'iye ni, ‘Josilwany a mon ma jok'onywol, ma jok'olimo nyithindho, ma jok'omiyo nyithindho dhoth!’

³⁰ Meno a hongo ma ji bino wac'iye ri gote ni, ‘Podhi win kwoŋ wan.’ Gi ri tendere ni, ‘Riewere win kwoŋ wan.’

³¹ Rupiri ka gigipiny ma kite no itimo munyo yen fodi numu, aŋo m'obedi ka yen othwo?”

³² Jotero jomoro jario m'oyido jobedo jokwo ni woneki jo kanyacel gi Yesu.

³³ Munyo jotundo kam'ilwoŋo ni, “Kahanga wic.” Joguro Yesu kwoŋ musalaba, kodi jokwo ario no, acel yuracuc man yuracam pere.

³⁴ Yesu owaco ni, “Baba, cwaki jo rupiri jokuya gima jotimo.” To jogoyo kwir ma poko ruk pere.

³⁵ Ji oyido jocungo kenyo joŋiyo jo, kareno jodhum pa Joyuda jonyero aka joŋalo go ni, “Obotho joman; ere weyi won wobothere, ka go a Kristo ma Were oyero adieri!”

³⁶ Josirikale bende jonyero go; jobino bonge to jocwayo rigo pigi gimoro makec ni womadhi,

³⁷ to joŋalo go ni, “Ere iwon bothere, k'inen ibedo Kere pa Joyuda adieri.”

³⁸ Wac me bende ondiki yuwiye: “Me Kere pa Joyuda.”

³⁹ Acel kwoŋ jokwo m'oliero kenyo oŋalo go ni, “Kosa in iki Kristo? Ere iwon bothere aka ibothi wan bende!”

⁴⁰ To nyawote obwoko go munyo waco ni, “Ikilwori Were? Kole ibende ilimo gir'acula paka apere.

⁴¹ Aka gir'acula mawan obedo ro ndir, rupiri walimo gima ripo gi reco ma watimo; to go k'otimo reco moro kad'acel.”

⁴² To waco ri Yesu ni, “Yesu, poyan ceŋ m'idwok'iye gi meni ma Ker perin!”

⁴³ Yesu owaco rigo ni, “Adieri awaco rin, konon ibino bedo kodan i kabedo ma yupolo.”

Tho pa Yesu

⁴⁴ Dho kapa sawa aucel, waŋceŋ oumere to mudho culo piny gipi kiri i sawa abuŋwen;

⁴⁵ aka nanga m'olier i Ot pa Were oyec to pokere ario.

⁴⁶ Yesu okoko gi derino madwoŋ ni, “Baba! Aketho cunyan i cingin!” Munyo otieko waco ameno to nyaka tho.

⁴⁷ Jadwoŋ pa jolweny m'onwaŋo nikenyo oneno gim'otimere, opako Were, munyo waco ni, “Adieri jal me oyido dhano maber!”

⁴⁸ Munyo ji m'oyido jocokere kenyo neno gim'obedi joneno gim'otimere, joje jodok peco munyo jogoyo pal cuny jo gi rem.

⁴⁹ Ji je m'oyido joŋeyo Yesu, kanyacel gi mon ma joluwo go wok Galili, jocungo gi bor neno gigipiny me.

Yiko Yesu

⁵⁰ Onwaŋo nitie dhano ma nyinge Yozefu, ma wok i tindi pa Joyuda ma Arimatheya. Go oyido acel kwoŋ jopido kendo dhano maber

⁵¹ m'oyido k'oyere gi tim kodi atoŋa pa jonica marac, aka oyido go kuro bino ma Ker pa Were. Kada go oyido jakweth pa jonek no, go k'oyere gi paro kodi tim pajo.

⁵² Go okidho bongi Pilato to kwayo delkwoŋ Yesu.

⁵³ Gikenyo ogamo del no to boyo gi suka matar, to ketho i kaliel m'ogor i tele, ma fodi oyido k'oyik'iye dhano moro je.

⁵⁴ Ndelo no onwaŋo obedo ma yikirok aka Sabato oyido cegin cakirok.

⁵⁵ Mon ma joluwo Yesu wok Galili jokidho gi Yozefu to joneno kaliel gi paka oketh'iye delkwoŋ Yesu.

⁵⁶ Gikenyo jodok peco to joyiko gigipiny kodi mo maŋwe kur ri delkwoŋe. I Sabato joywomere paka Cik waco.