Luka 20 - KITAWO MALEŊ Catholic

Penji kwoŋ meni pa Yesu

¹ Ndelo moro munyo Yesu oyido nitie i Ot pa Were fonjo ji aka luwo kwoŋ Wac Manyen Maber, jotel pa jocway ri Were i wi migam kodi Jondiko kanyacel gi jotel pa ji jobino,

² to jopenjo go ni, “Waci riwan, meni aŋo m'initie gine ma timo gigipiny me, kosa ŋa m'omiyin meni ma timo gigipiny me?”

³ Yesu odwoko jo ni, “Weyi abende apenji win penji moro. Waci ran win,

⁴ meni pa Yohana ma miyo batisimo owok bongi Were kosa bongi dhano?”

⁵ Gikenyo wegi jocako piem kendi gin ni, “Wawaci nedi? Ka wanowaci ni owok bongi Were, go bino waco ni, ‘To raŋo ma wikiyeyo Yohana?’

⁶ Odoko ka wanowaci ni, ‘Owoki bongi dhano.’ Ji gibe jobino goyo wan gi telin, rupiri joŋeyo ni Yohana oyido obedo jatuci wac Were.”

⁷ Riameno jowaco ni, “Wakuya kama meni no owok'iye.”

⁸ Aka Yesu owaco rijo ni, “Am'omiyo abende ak'owaci riwin kam'anwaŋ'iye meni m'atimo gine gigipiny me.”

Ageca kwoŋ jokur ndelo vini

⁹ Gikenyo Yesu oluwo ri ji iy'ageca ama: “Dhano moro opidho ndelo vini to ketho i cingi jokur, to kadho wiloka ma hongo mabor.

¹⁰ Munyo ndir otundo ma fono vini, ooro ŋeca pere bongi jokur nike jowolimi rigo gim'onyak megi. To jokur jogoyo ŋeca no ayino to joriemo go to dok gi cinge nono.

¹¹ To go odoko ooro ŋeca man, ma bende jokur jogoyo, jotimo go kicar, to joriemo go to dok gi cinge nono.

¹² To go odoko ooro ŋeca mar'adek; ma jokur joketho kwoŋe poyo bende, to jobolo go woko koro.

¹³ Gikenyo won ndelo vini owaco ni, ‘Anotim aŋo? Abino oro wodan won m'amaro; adieri jobino miyo go dwoŋ!’

¹⁴ To munyo jokur joneno go, jowaco wegi kendi gin ni, ‘Me won a musika pa won ndelo. Weyi waneki aka ndelo vini wodoŋ mawan!’

¹⁵ Gikenyo jobolo go woko ma ndelo vini to joneko go.” “Onyo wiparo ni aŋo ma won ndelo vini otim ri jokur me?

¹⁶ Go bino dwoko to neko woko jono, to ketho ndelo vini i cingi jokur man.” Munyo ji jowinjo gime jowaco ni, “Gino wokiri wobedi ameno kada mathin!”

¹⁷ Yesu oneno jo to penjo ni, “Aŋo ma ndiko nyutho ka waco ama.” “Kole tele won ma jogeto jocayo ni bukony am'olokere tele ma thielo kindi ot?”

¹⁸ “Moro je m'opodhi wi tele no bino ŋinyere woko; aka ka tele no opodhi kwoŋ moro, bino dhiŋo go woko.”

Penji kwoŋ culo misolo

¹⁹ Jondiko kodi jotel pa jocway ri Were i wi migam jotemo mako Yesu i hongo no won, rupiri joŋeyo nike oyido luwo iy'ageca kwoŋ jo; to jolworo ji.

²⁰ Riameno jodwaro hongo ma ripo, to jodhiro jopendo moro ri Yesu, ma jorendere pa ji mabeyo, ŋey jowomaki wac m'okom m'owaci, nyaka jowoosa go bongi jor'adhum kodi Gavana.

²¹ Jopendo me jopenjo Yesu ni, “Jafonji, waŋeyo nike gim'iwaco kodi gim'ifonjo otire, kendo ikidew kwoŋ dwoŋ pa dhano moro je, to ifonjo adieri kwoŋ gima Were mito ri dhano timo.

²² Onyo waci riwan, Cik mawan yeyo wan goyo misolo ri Kayisar kosa be?”

²³ To Yesu oneno apondi pajo, to waco rijo ni,

²⁴ “Nyuthan win nusu moro. Cal pa ŋa kodi nyingi ŋa manitie kwoŋe?”

²⁵ Jodwoko ni, “Apa Kayisar.” Aka Yesu odwoko ni, “Ere ka ameno, miy win Kayisar gipa Kayisar, aka wimiy Were bende gipa Were.”

²⁶ Jok'onyalo mako go i gimoro m'owaco i dier ji kenyo, to joliŋ munyo jodhier ayin ro dwoki pere no.

Penji kwoŋ cerino pa jom'otho

²⁷ Josadukayo moro, joma waco ni cerino pa jom'otho ongoye, jocore bongi Yesu to jobolo rigo penji ni,

²⁸ “Jafonji, Musa cango ondiko riwan ni k'omin nyatoro otho ma bu nyathi aka cege fodi nitie, jalo ripo lunjo ciliendi omin no wolimi rigo gine nyithindho.

²⁹ Onyo cango obedo wutmere abirio: Okayo pajo onywomo dhako, to tho ma bu nyithindho.

³⁰ Gikenyo omin mar'ario bende olunjo dhako no,

³¹ gi mar'adek; aka wutmere abirio no je jobedo gi dheno, to jotho ma jok'oweyo nyithindho.

³² Rumacen to dhako no bende tho.

³³ Onyo i ndelo ma jom'otho jocerin'iye, dheno obedi apa ŋa? Ato wutmere abirio no je jobedo gine!”

³⁴ Yesu odwoko ni, “Cwo gi mon ma ndir me jonywomere,

³⁵ to ji m'ibino yeyo jo donjo i kwo ma ndir ma bino ka ji jocerino, jok'onywomere.

³⁶ Ato kareno jokinyal tho kendo, rupiri jocale jomalaika. Aka jobedo nyithindho pa Were, rupiri otiek cerino jo kwoŋ jom'otho.

³⁷ Kole kiri Musa bende onyutho ni jom'otho ibino cerino jo i wac m'owaco kwoŋ dudi ma waŋ munyo luwo kwoŋ Rwoth ni go obedo Were pa Abraham, Were pa Isaka, gi Were pa Yakobo.

³⁸ Dwoŋ mere nike go obedo Were pa jomakwo, makiweno apa jom'otho, ato joje jokwo i go.”

³⁹ Gikenyo Jondiko moro joluwo malo ni, “Jafonji, meno dwoki maber!”

⁴⁰ Ato odoko jok'otemo penjo Yesu penji moro kendo.

Penji kwoŋ Kristo

⁴¹ To Yesu owaco rijo ni, nyalere nedi waco ni Kristo obedo nyakwar Daudi?

⁴² Kole Daudi won owaco i kitawo ma Zabuli ni, Rwoth owaco ri Rwoth paran ni, Bedi yu cingan maracuc,

⁴³ cuka anoloki jokwor perin kor kasik m'inyono gi tiendin.

⁴⁴ Kole Daudi olwoŋo go ni Rwoth. To go nyalo nedi kendo bedo nyakwar Daudi?

Yesu gwoko ji kwoŋ Jondiko

⁴⁵ Munyo lwak ji je jociko ithi gin winjo go, Yesu owaco ri jofonjirok pere ni,

⁴⁶ “Kure win kwoŋ Jondiko, ma jomito nyumo kamoro je gi ruk maboyo, aka joyenyo ni womothi jo i katale ma mitan gi lworo; joyero kabedo ma malo i kalamo pa Joyuda gi kabedo maloyo bero i kalima;

⁴⁷ jodiyo mon tho to jomayo jo gigipiny ma pecin pajo aka jorendere gi kwayo maboyo. Jobino limo gir'acula madwoŋ loyo!”