Luka 16 - KITAWO MALEŊ Catholic

Jakur ma jarieko

¹ Yesu odoko owaco ri jofonjirok pere ni, “Obedo jaŋaŋo moro m'onwaŋo nitie gi jakur m'owaci rigo ni nyeko anyeka lim pere.

² Go olwoŋo ŋato to penjo go ni, ‘Awinjo aŋo me kwoŋin? Titi ran kwan kwoŋ tic perin ma kur, rupiri ikilabedo jakur kendo.’

³ Gikenyo jakur no won owaco kende ni, ‘Paka rwoth paran onyo kwanyo woko kwoŋan tic ma kur, anotim aŋo? Angoye gi meni ma fur, aka wiyan kwot kiri kidho kwayirok. Bedo ran wickwot madwoŋ.

⁴ K'ameno, awon aŋeyo gim'alatimo makada orieman i tic jomoro jobino jolan i pecin pajo.’

⁵ Gikenyo go othumo rieko to lwoŋo joma jonigi banjin pa rwoth pere acel acele. Ri marapena, owaco ni, ‘Rwoth paran banja in aŋo?’

⁶ Ana ŋato ni, ‘Jerikan miya acel ma mo wuto.’ Jakur no owaco ni, ‘Ere kwany papila perin ma cikirok, ibedi piny mayot aka indiki piero abic ayino.’

⁷ Ri ŋatiman, owaco ni, ‘To inigi banja adi?’ Ana ŋato ni, ‘Kutiya miya acel ma kal.’ Jakur no owaco ni, ‘Ere kwany papila perin ma cikirok indiki piero aboro ayino.’

⁸ Rwoth opako jakur ma kigenere no ma to go othumo rieko; ato nyithindho ma piny me joriek i tim pajo wegi loyo nyithindho ma lero.”

⁹ Yesu omedo waco ni, “Awaco riwin, maki win mere ka wioro ŋaŋo ma piny, aka k'orumo, ibino jolo win i kabedo ma cil gi cil.

¹⁰ Dhano ma genere i gigipiny mathindho ibino geno go i gimadwoŋ; ŋata kigenere i gigipiny mathindho k'ogen go i gimadongo.

¹¹ Am'omiyo ka wikinyalo genirok i ŋaŋo ma k'otire ma piny ka, ŋa ma di gen win gi ŋaŋo mar'adieri?

¹² Aka ka ikinyalo genirok i gigipiny pa ŋatiman, ŋa m'omiyin gim'obedi aperin won?”

¹³ “Ongoye jatic manyalo bedo ŋeca pa rwodhe ario; go bino dak acel to maro man: Bino woro acel to cayo man. Ikinyal tiyo ri Were kodi ri pesa bende.”

Luwo pa Yesu megi

¹⁴ Jofarisayo jowinjo gigipiny me je, aka jonyero Yesu rupiri oyido jomaro pesa.

¹⁵ Yesu owaco rijo ni, “Winyuthere ri ji ni wibeyo, to Were oŋeyo cuny win. Kole gima ji paro ni ber m'oasere, ama bedo gim'ongoye kiri gi kony ruwaŋ Were.”

¹⁶ “Cik pa Musa kodi ndiko pa jotuci wac Were obedo gi meni tundo i ndir pa Yohana Jakibatisa; wok i ndir no Wac Manyen Maber ma Ker pa Were ocaki tito, aka dhano je rire donj'iye gi maker.

¹⁷ To yot ri polo gi piny rerok, makiweno nyeko woko kada nyaka adec m'ondhilo kwoŋ Cik.”

¹⁸ “Dhano je ma riemo cege to nywomo dhako man meno timo cot; aka ŋata nywomo dhako ma cwore oriemo bende timo cot.”

Jaŋaŋo kodi Lazaro

¹⁹ “Cango obedo jaŋaŋo moro ma ruko nangin ma welo ma malo swa aka camo cemo ma welo tektek ndir je.

²⁰ Aka jacandi moro ma nyinge Lazaro bin riewere piny dho waŋkac pere, kareno adhola odheth kwoŋe gipi.

²¹ Go oyido kuro camo nyaka ŋinjeŋinje cemo ma podho piny wok i dhower pa jaŋaŋo no; aka ameno gwokere bende jobino to jonaŋo adholin pere.

²² Ndelo otundo ma jacandi no otho to jomalaika jotiŋo go, to jotero go bongi Abraham, i polo; jaŋaŋo bende otho t'iyiko.

²³ Munyo go oyido nitie i litho madwoŋ swa i piny pa jom'otho, otiŋo waŋe malo to neno Abraham gi bor koro, kodi Lazaro kabute.

²⁴ Gikenyo olwoŋo go ni, ‘Baba Abraham! Maki ye kodan wor idhiri ran Lazaro wobili lwet cinge i pi wokwey ran gine lewan, rupiri an litho madwoŋ i mac me!’

²⁵ To Abraham odwoko ni, ‘Wodan, poyi ni i kwo perin ma piny ilimo gigipiny perin mabeyo, to Lazaro olimo gigipiny mareco kendekende; am'omiyo pama onyo ikweyo cunye ka, aka in onyo iŋat'initie i litho.

²⁶ To ki meno kende, okethi bur mwombe maluth swa i dier wan kodi win ma geŋo ŋatimoro je ma d'omiti ŋondo wok i thenge mawan bino yu bongi win, kosa wok i thenge mewin bino yu bongi wan korin’

²⁷ Aka jaŋaŋo owaco ni, ‘Baba, ere onyo aywak rin ni or Lazaro peco thuwan pa baba,

²⁸ kam'anitie iye gi wutmin an abic; wokidhi wonyuthi jo ŋey bende kiri jowobin kama di litho ma kiwacere me.’

²⁹ Abraham owaco ni, ‘Kole jonitie gi fonji pa Musa kodi apa jotuci wac Were; weyi wutmin in jowowinji fonji pa jono.’

³⁰ Jaŋaŋo owaco ni, ‘Be, baba Abraham, to ka nyatoro m'owok bothi jom'otho okidho bongi jo aka jobino ŋuto reco pajo.’

³¹ To Abraham waco rigo ni, ‘Ka jok'onyal winjo wac pa Musa kodi apa jotuci wac Were, meno bende jok'owinji makada nende nyatoro oay wok bongi jom'otho to kidho.’ ”