Luka 13 - KITAWO MALEŊ Catholic

Ŋuti win reco mewin ka k'obedo ameno wilatho

¹ I hongo no jomoro oyido jonitie kenyo ma jowaco ri Yesu kwoŋ Jogalili ma Pilato oruwo remo pajo kodi mic ma cowirok pajo.

² Aka Yesu odwoko jo ni, “Wiparo ni Jogalili no am'oyido ji mareco loyo Jogalili man, rupiri jocandere ameno?

³ Awaco riwin, ni k'ameno; to ka wikiŋuto reco mewin wibende wibino rere woko paka jo.

⁴ Kosa wiparo ni japar g'aboro ma ot acurcur ma Silowam oriewere kwoŋ jo to neko jo, wiparo nike oyido jobedo joreco loyo ji je m'onwaŋo jonitie Yerusalem?

⁵ Awaco riwin, k'ameno, to ka wikiŋuto wibende wibino rere woko paka jo.”

Ageca kwoŋ makuyu ma k'onyak

⁶ Yesu oluwo iy'ageca ni, “Dhano moro oyido nitie gi kiti makuyu m'icamo m'opidho i ndelo vini pere, aka obino rango nyandere mere to k'onwaŋo.

⁷ Ameno owaco ri jadoyi ndelo vini ni, ‘Neni pama onyo oro adek gipi m'ariwin ka rango nyandere wi makuyu me, t'akinwaŋ. Onyo toŋi go woko; raŋo ma go nyeko lowo ka?’

⁸ Jatic odwoko ni, ‘Jadwoŋ, okutho weyi go kenyo oro me, cuka anofuri tiende to aketh'iye lowo m'otop.

⁹ Aka ka onyak nyandere oro ma bino, meno ber, to ka k'onyak, aka inotoŋ go woko.’ ”

Yesu botho dhako moro m'oŋol i Sabato

¹⁰ I ndelo ma Sabato moro, Yesu onwaŋo fonjo i kalamo pa Joyuda.

¹¹ Aka dhako moro onwaŋo nitie kenyo m'oyido cuny m'ocido ma two oyido nitie kwoŋe aka oyido otieko two oro apar g'aboro; go oyido ogwomere ma kinyal rierok ay malo.

¹² Munyo Yesu oneno go, olwoŋo go to waco rigo ni, “Dhako me, pama onyo ibothi i two perin.”

¹³ Gikenyo munyo Yesu oketho cinge kwoŋe, piyo piyo no to dheno cungo m'oriere, to pako Were.

¹⁴ To rwoth ma kalamo pa Joyuda cunye owaŋ rupiri Yesu obotho dheno i Sabato, omiyo owaco ri ji ni, “Ndelo nitie aucel ma waripo tiy'iye; am'omiyo biye win i ndelo no kwayo both, makiweno ndelo ma Sabato.”

¹⁵ Rwoth odwoko go ni, “Win, jorendirok! Nitie nyatoro kwoŋ win ma kigony thwon pere kosa punda pere wi loc i ndelo ma Sabato to tero i pi?

¹⁶ To yagi, dhako me ma nyar Abraham, aka Sitan onwaŋo otweyo go kweth oro apar g'aboro gipi, ama di k'onyal gonyo go i twec me kada nende i ndelo ma Sabato?”

¹⁷ Munyo owaco ameno, jokwor pere je wickwot omako jo, kareno ji je oyido josangala ro gir'aura ma Yesu otimo.

Ageca kwoŋ kodhi m'ondhilo

¹⁸ Yesu odoko owaco ni, “Ker pa Were cale kodi aŋo? Anopima g'aŋo won?

¹⁹ Go cale nyingi kodhi m'ondhilo ma nyatoro okwanyo to pidho i ndelo pere; aka odongo to lokere yath m'ombo, to winyin ma malo bino to jogero od gin i jange.”

Ageca kwoŋ thow

²⁰ Aka odoko owaco ni, “Anopima Ker pa Were g'aŋo kendo?

²¹ Go cale thow ma dhako moro okwanyo to pano i rapim adek ma moko m'obak cuka moko gipi oyenyo.”

Dhiot madiny

²² Yesu owotho ka fonjo ji malomalo i tindin kodi i thenge je munyo como yu Yerusalem.

²³ Ŋatimoro openjo go ni, “Rwoth, kosa ji manok ama jolaboth?” Yesu odwoko jo ni,

²⁴ “Tem win paka winyalo donjo gi i dhiot madiny, rupiri awaco riwin ni, ji madit jobino temo donjo to jok'onyal.”

²⁵ “Ka won peco otieko ay malo to diyo thigo, kada winotem cungo woko kenyo to wigudo thigo munyo wiwaco ni, ‘Rwoth, yaw riwan.’ Go bino dwoko ni, ‘Akuya ran win kama wiwok'iye.’

²⁶ Odoko wibino temo waco ni, ‘Kole cango wacemo to wamedho kodin kanyacel; aka ifonjo kiri i tindi mawan.’ To go bino dwoko ni,

²⁷ ‘Akuya ran kama wiwok'iye. Eye win bongan, wijotimi reco!’”

²⁸ “Gikenyo ywak gi kayo lak bino bedo, kareno wineno Abraham kodi Isaka kodi Yakobo gi jotuci wac Were i Ker pa Were aka win am'obol win woko.

²⁹ Aka ji ma wok yuwok ceŋ kodi yupodho ceŋ yu Wic piny kodi yupiny, jobino mako kabedo pajo i kalima i Ker pa Were.

³⁰ Gikenyo joma pama jobedo macowe ama jobino bedo marapena, aka jom'oyido marapena ama jobino bedo macowe.”

Mar pa Yesu ri Yerusalem

³¹ I hongo no won, Jofarisayo moro jobino, to jowaco ri Yesu ni, “Eye ka, rupiri Herode mito nekin.”

³² To Yesu owaco rijo ni, “Kidhi wiwaci ri kibwe no ni, ‘Kole ariemo woko jwogi aka alacango two konon gi dikin aka ndelo mar'adek abino cowo tic paran.’

³³ Kad'ameno aripo medirok gi woth paran konon gi dikin gi yawere, rupiri kinyalere neko jatuci wac Were kaman makiweno i Yerusalem.”

³⁴ “A ji ma Yerusalem, ma joneko jotuci wac Were m'odhir rijo, aka megi jogoyo jo gi telin! Didi m'atieko temo coko win bongan aum win pa min gweno ma umo nyithindhe i bwombe, to wikwero!

³⁵ Kole Ot pa Were man kenyo ibino jwango, aka awaco riwin, wik'onenan kendo cuka winowaci ni, ‘Jasilwany a ŋata bino i nyingi Rwoth!’ ”