Luka 12 - KITAWO MALEŊ Catholic

Gwokirok kwoŋ rendirok

¹ I hongo no, munyo lwak ji gana gi gana oyido jonyonere dho bonge, Yesu okutho ocako waco ri jofonjirok pere ni, “Kure win kwoŋ gipa Jofarisayo ma tiyo pa thow, m'obedo rendirok.

² Ongoye gim'oum ma k'oyaw i lero, kosa gim'opan ma k'oŋeyere.

³ Am'omiyo gimoro je ma wimwoŋo i colo bino winjere i lero, aka gimoro je ma wimwoŋo i udi nyaliŋliŋ ibino kedho kamaler wi udi malo.”

Ŋata ripo alwora

⁴ “Awaco riwin, jowotan, wikiri wilwor joma neko del, ma to kwoŋ meno ongoye giman ma jonyalo medo timo.

⁵ Weyi anyuthi win Ŋata wiripo lworo: Lwor win ŋata k'otieko neko dhano, nigi meni ma bolo i mac makitho; adieri awaco riwin, lwor wi Go.”

⁶ “Obico abic kitana dome ario? To ongoye kad'acel ma Were wiye wil gine.

⁷ Medo kwoŋ meno, kiri ye wiy win je Were otieko kwano. Am'omiyo wikiri wilwor; kole wiloyo obico gi welo!”

Tuco Kristo kodi kwedirok kwoŋe

⁸ “Aka awaco riwin, dhano je ma tuco i dier ji nike go oyeyan, Wod Dhano bende bino tuco go ruwaŋ jomalaika pa Were.

⁹ To ŋat'okwedere kwaŋan i dier ji, Wod Dhano bende bino kwedirok kwoŋe ruwaŋ jomalaika pa Were.

¹⁰ Nyatoro je ma luwo gima k'otire kwoŋ Wod Dhano ibino cwako go; to ŋat'oluwi gima k'otire kwoŋ Cuny Maleŋ kilanwaŋo cwaki.”

¹¹ “Ka joteri win i kalamo pa Joyuda kodi i waŋ jodhum kodi rwodhe, wikiri wirembi kwoŋ gima winowaci kosa gima winodwoki.

¹² Kole Cuny Maleŋ bino fonjo win i hongo no won gima wiripo waco.”

Ageca kwoŋ jaŋaŋo mamiŋ

¹³ Ŋat'acel i dier lwak ji owaco ri Yesu ni, “Jafonji, mondo waci ri omera wopok kodan gigipiny ma walunjo.”

¹⁴ Yesu odwoko ni, “Jawodhan, ŋa m'okethan jathum banja mewin, kosa jathek kwoŋ gigipiny mewin?”

¹⁵ To medere waco ri jono ni, “Kure win, odoko gwokere win kwoŋ woro ma nger je, rupiri kwo pa dhano kicungi i thotho pa lim ma go nitie gine, kada bedi ni go nigi ma kalo ma go yenyo.”

¹⁶ Gikenyo Yesu oluwo iy'ageca ama: “Jaŋaŋo moro cango obedo gi ndelo cemo m'onyak rigo mathoth swa.

¹⁷ Ameno go oparo g'icunye ni, ‘Anotim aŋo, kole angoye gi kaketho kweth cemo paran me?’

¹⁸ To waco ni, me a gim'onyo alatimo: Abino kedho woko dere paran je t'acweyo madongo loyo, t'akonjo kal paran kodi gigipiny man je i iye.

¹⁹ Gikenyo abino waco ri cunyan ni, cunyan, in gi kweth gigipiny mabeyo m'odhure rin manyalo cowo oro kweth; ikir'ipar gimoro, onyo cemi, medhi, iyodere!

²⁰ To Were owaco rigo ni, ‘Ma miŋ me! Kole wor ma konon won me ibino omo cunyin. Onyo kweth gigipiny m'odhure me je obedi apa ŋa?’ ”

²¹ Yesu ocowo wac nike, “Me apaka bedo ri joma jodhuro lim kweth ri siem pajo wegi to jongoye gi ŋaŋo ruwaŋ Were.”

Geno Were

²² Gikenyo Yesu owaco ri jofonjirok pere ni, “Am'omiyo awaco riwin ni wikiri wirembi kwoŋ kwo mewin, gima winocam, kosa kwoŋ delkwoŋ win, gima winoruki.

²³ Kole kwo loyo cemo, aka delkwoŋ dhano loyo ruk.

²⁴ Pari win kwoŋ winyin m'ilwoŋo ni agak, jokicwoyi kosa jokec; jongoye gi dero kosa kacoko cemo; Were won ama pidho jo! Onyo wiloyo winyin no gi bero didi?

²⁵ Aka ŋa kwoŋ win ma i rembo pere nyalo medo ye hongo ma kwo pere kada masisiri?

²⁶ To k'inen wikinyal timo gimathin paka meno, raŋo ma wirembo kwoŋ gigipiny man?

²⁷ Pari win kwoŋ dudi ma thiwe ŋon paka jodongo; jokitiy kosa jotimi ruk pajo. To kada Solomon, gi ŋaŋo pere no je, oyido ongoye gi ruk mabeyo paka acel kwoŋ dudi me.

²⁸ To k'inen Were ruko dudi ma konon nitie to dikin iwaŋo i kidhur yuk, onyo Were k'oruki win loyo dudi no? Apaka yeyo mewin nok ameno!

²⁹ Am'omiyo wikiri wirembi kwoŋ gima winocam kodi gima winomadhi, odoko wikiri wiasa paro.

³⁰ Kole joma bu Were ma piny gipi ama jorango gigipiny no; aka Bawin oŋeyo ni wiyenyo gigipiny me.

³¹ Kucel, kutho rangi win Ker ma polo, aka go bino miyo win gigipiny no.”

Ŋaŋo i polo

³² “Wikiri wibedi malwor, nyaka rombo paran! Kole Bawin sangala gi miyo win Ker.

³³ Tana win lim mewin je aka pesa mere wipoki jocandi. Bedi win gi migowe ma kiyec, aka wikan ŋaŋo mewin i polo kama k'omojer'iye, kendo ongoye jakwo manyalo gey'iye, kosa masirigi moro nyek'iye.

³⁴ Kole kama ŋaŋo perin niye ama cunyin bende bed'iye.”

Jotic ma jogwokere

³⁵ “Rukere win ma tic aka wimoki talin mewin.

³⁶ Bedi win paka jotic ma jokuro rwoth pajo wodwoki wok i kalima ma nywomirok, ma joyikere yawo thigo tekin go gudo.

³⁷ Jotic no josilwany ma rwoth pajo onwaŋ jonigi waŋ gin ka go bino. Awaco riwin adieri, go bino tweyo nanga moro i kore, to bedo piny dhower to poko jo cemo. Miti go odwoki munyo piny keko kosa munyo ocot;

³⁸ aka jotic no josilwany ka onwaŋ joyikere.

³⁹ Ŋey win gime, ni bedi won peco ŋey hongo ma jokwo jobin'iye turo ot pere, di k'oyeyo kada ŋat'acel turo thigo pere.

⁴⁰ Wibende wiripo cungo ma wiyikere, kole Wod Dhano ladwoko i hongo ma wikipar ni dwok'iye.”

Jatic ma genere kodi ma kigenere

⁴¹ Petero openjo ni, “Rwoth, iluwo iy'ageca me kwoŋ wan kosa kwoŋ joman je?”

⁴² Rwoth odwoko ni, “Jatic ma kuro peco mene mariek? Meno a ŋata rwoth pere oketho go kuro peco gi poko ji cemo ka hongo otundo.

⁴³ Jatic no jasilwany ma ka rwoth pere odwoko bino nwaŋo go i tic.

⁴⁴ Adieri awaco riwin ni go bino ketho ŋato kuro lim pere je.

⁴⁵ To jatic ma won waco ni, ‘Kole rwoth paran fodi ogalo gi dwoko.’ To won cako goyo wadi ma cwo gi ma mon, to cemo to medho, to mer,

⁴⁶ rwoth pere bino dwoko i ndelo ma go kigen kodi i hongo ma go kuya, aka rwoth pere bino miyo go gir'acula to loko go acel kwoŋ joma kigenere.”

⁴⁷ “Jatic m'oŋeyo gima rwoth pere yenyo, to fodi k'ocako kada timo gino, ibino cwado go matek,

⁴⁸ to jatic m'oyido k'oŋeyo rigo, to bende ripo acwada kiboko ro gim'otimo, ibino cwado go manok. Dhano je m'oyim rigo gimoro, ibino mito kwoŋe mathoth; ato k'oyim ri dhano gim'ombo gi genirok, bende ibino mito kwoŋe gima loyo meno.”

Yesu jakeli tiakirok

⁴⁹ “Abino kelo mac i piny, aka mac ago wany swa m'ayenyo ni bedi oyido otieko kiri cako liel!

⁵⁰ Nitie batisimo m'aripo limo, aka rembo paran dwoŋ swa kafodi k'otimere!

⁵¹ Wiparo nike akelo siem i piny? Be, awaco riwin, akelo tiakirok ayino.

⁵² Kole wok pama, i ot ma di ji abic bino bedo tiakirok: Jadek jobino pokirok kwoŋ jario.

⁵³ Ba nyathi bino dak wode, aka wod nyatoro bende bino dak bamere; min nyathi bino dak nyare, nyar nyatoro bende bino dak yokimere; adha nyako manywolo cwore bino dak ciwode no, ciwod nyatoro bende bino dak adhamere.”

Ŋeyo ndir

⁵⁴ Yesu owaco ri ji ni, “Ka wineno pondeponde cokere yupodho ceŋ, piyo piyo wiwaco ni, ‘Koth kidho cwe.’ To bende timere ameno.

⁵⁵ Aka ka wineno koyo ma wok yupiny, wiwaco ni, ‘Ceŋ bino.’ To bende timere ameno.

⁵⁶ Wijorendirok! Wiŋeyo tito cal pa piny kodi apa pondeponde; to raŋo ma wikinyal tito hongo ma pama?”

Yik wac gi ŋata osa in

⁵⁷ To raŋo ma wiwegi wikinyal neno gim'otire ma ripo atima?

⁵⁸ Ka wimako yo kodi ŋata osa in pa jathum banja, tem paka inyalo yiko gine wac gi i royo, kak'ameno go bino terin bongi jathum banja, to jathum banja dhirin i cingi jasirikale, to jasirikale bolin i twec.

⁵⁹ Awaco rin, ik'owoki kenyo cuka inocul pesa kiri macowe.