Luka 10 - KITAWO MALEŊ Catholic

Yesu dhiro ji piero abirio g'ario woko

¹ Rumacen Rwoth oyero ji piero abirio g'ario man aka ooro jo yuwiye jario jario, i kisi tindi kodi kamoro je ma go onwaŋo yiko tund'iye.

² Owaco rijo ni, “Keco opikere, to jotic ama nok, am'omiyo kway win Rwoth ma won keco wodhiri jotic jowokec rigo.

³ Onyo kadhi win pama won. Eno, adhiro win pa rombo i dier arara.

⁴ Wikiri witiŋ mugowa pesa, kosa mugowa cemo, kendo kada war.

⁵ I ot moro je ma widonj'iye, kutho mothi win jo ni, ‘Siem wobedi i ot me.’

⁶ Aka k'inen onwaŋere ŋata jolo siem kenyo, siem mewin bino doŋ rigo; to kak'ameno, bino gik riwin.

⁷ Bedi win i ot acel munyo wijolo cemo kodi gir'amadha ma jomiy win, rupiri jatic camo gikwok pere. Wikiri wikowere i udi man.

⁸ Ka widonjo i tindi moro t'ijolo win, cami win gim'okethi ruwaŋ win.

⁹ Bothi win jotwo man kenyo aka wiwaci rijo ni, ‘Ker pa Were ocore cegin gi win.’

¹⁰ To ka widonjo i tindi moro aka k'ojol win, kidhi win i royo ma tindi no to wiwaco ni,

¹¹ ‘Onyo wateŋo woko kiri fukefuke ma tindi mewin m'oyido odoŋ i par tiendi wan wodoŋ i wiy win; to kad'ameno ŋey win ni Ker pa Were ocore cegin.’

¹² Awaco riwin, i ndelo ma thumo banja, Sodom bino limo gir'acula ma dhe ye loyo tindi no.”

Tindin ma jokiŋuti

¹³ “Kidamba otundi rin, Korazin! Kidamba otundi rin, Bethsayida! Kole bedi gir'aura m'otimi i win tim i Tire kodi Sidon, di cango joŋuto con, aka di jobedo piny to joruko kutiya, to jobukere gi buru ma nyutho ni joŋuto reco.

¹⁴ Were bino nyutho wor madwoŋ i ndelo ma thumo banja ri Tire kodi Sidon loyo riwin.

¹⁵ Aka in Kapernaum, onwaŋo iyenyo tiŋirok malo tundo i polo? Ibino bolin i piny pa jom'otho ayino!”

¹⁶ Yesu owaco ri jofonjirok pere ni, “Ŋata winjo win, meno winjan; ŋata kwero win meno kweran; aka ŋata kweran, meno kwero Ŋat'ooran.”

Jofonjirok piero abirio g'ario jodwoko

¹⁷ Jofonjirok piero abirio g'ario ca jodwoko munyo josangala, ka jowaco ni, “Rwoth, kiri jwogi je jowinjo wan ka waoro nyingin.”

¹⁸ Yesu odwoko jo ni, “Aneno Sitan munyo podho pa lithkoth m'owok i polo.

¹⁹ Onyo atieko miyo win meni ma nyono gi tiendi win thwole kodi thwolgwok, gi nyalo woko meni pa jakwor je; kendo ongoye gima bino timo win marac.

²⁰ To wikiri wisangala ni cuny m'ocido jowinjo win; kucel sangala win ni nyingi win ondiki i polo ayino.”

Yesu sangala

²¹ I hongo no won Yesu osangala i Cuny Maleŋ aka owaco ni, “Afoyin Baba, Rwoth ma polo kodi piny, paka ipano gigipiny me ri jomariek kodi jom'ofonjere t'inyutho nyithindho ayin. Ey Baba, gime otimere paka iyenyo ni wotimere.”

²² “Baba otieko miyan gimoro je; aka ongoye ŋat'oŋeyo Wode kwanyo woko Bamere, kendo ongoye ŋat'oŋeyo Baba kwanyo woko Wode kodi joma Wode oyero nyutho jo Bamere.”

²³ Gikenyo Yesu owire ri jofonjirok pere to waco rijo nyaliŋliŋ ni, “Josilwany a joma waŋ gin neno gima wineno!

²⁴ Aka awaco riwin, jotuci wac Were kodi kerin mathoth, cango joyenyo neno gima wineno to jok'oneno, gi winjo gima wiwinjo to jok'owinjo.”

Ageca pa Jasamaria maber

²⁵ Gikenyo jafonji ma Cik moro omito temo Yesu; oay to penjo ni, “Jafonji, mitere atim aŋo ŋey adonji i kwo makirum?”

²⁶ Yesu bende openjo go ni, “Cik waco nedi? Somere nedi?”

²⁷ Odwoko ni, “Mari Rwoth Were perin g'adundo perin je, gi cunyin je, gi meni perin je, gi paro perin je, kendo mari nyawotin paka iwon imare.”

²⁸ Yesu owaco rigo ni, “Idwoko m'otire; ere tim ameno aka ibino kwo.”

²⁹ To paka ŋato onwaŋo yenyo nyutho tiro pere, openjo Yesu ni, “Nyawotan a ŋa?”

³⁰ Yesu odwoko ni, “Jal moro oyido wotho i royo kareno owok Yerusalem kidho Yeriko, to podho i cingi jokwo, ma jolunyo kwoŋe nangin je, jogoyo go, to joweyo go kenyo ma cunye kende ama gudere.

³¹ Gikenyo jacway ri Were i wi migam moro oyido luwo royo no, to munyo oneno ŋato, oluwo i thengi royo to kadhakadha.

³² Ameno bende Jalevi m'obino kenyo oneno go, to kadho kwoŋe gi i thengi royo.

³³ To munyo Jasamaria moro otundo bonge, am'omako gi go wor munyo oneno go;

³⁴ okidho bonge to cako tweyo adholin pere, to konj'iye mo gi vini. Rumacen otiŋo go to ketho go wi kayina pere won, aka otero go i ot wendo, to miyo go kony kenyo.

³⁵ Yawere mere okwanyo siringi ario to culo jakur ot wendo ka waco ni, ‘Kuri ran go maber, aka ka adwoko abino culin gimoro je m'inomedi oro ma konyo go.’

³⁶ Onyo kwoŋ ji adek me, iparo ni ŋa m'obedo nyawoti jal m'opodho i cingi jokwo no?”

³⁷ Go odwoko ni, “Ŋat'onyutho go wor.” Yesu odwoko ni, “Ibende kidhi itimi ameno.”

Yesu limo Marita kodi Maria

³⁸ Munyo Yesu gi jofonjirok pere jomedo woth, jotundo loka moro, to dhako moro ma nyinge Marita jolo go i ot pere.

³⁹ Dheno oyido nitie gi nyamin m'ilwoŋo ni Maria, m'obino to bedo piny dho ka tiendi Yesu to winjo fonji pere.

⁴⁰ To Marita won oyido nigi mindin madit m'ogeŋo go winjo fonji m'omiyo owaco ni, “Rwoth, ikipar paka nyamera oweyan gi tic kendan? Mondo waci rigo wokonyan.”

⁴¹ To Rwoth odwoko ni, “Marita, Marita, cunyin ramin kendo rembo kwoŋ mathoth,

⁴² ma to nyaka gimoro acel won ama mitere. Maria ayino am'oyero gimaber mere, ma k'okwany kwoŋe.”