Luka 1 - KITAWO MALEŊ Catholic

¹ Mondo Thiofilo, ji mathoth jotieko temo ndiko radwok ma gigipiny m'otieko timere i dier wan.

² Jondiko gima jono ma joneno gigipiny me gi waŋ gin jowaco riwan wok i cakirok aka bende jobedo jonyay wac me.

³ Onyo an bende paka atieko kikaŋasa wac me maber wok i cakirok mere, aparo ni ber andiki rin gime m'acano maber.

⁴ Atimo ama aka ŋey ibino niaŋ maber odoco kwoŋ adieri ma gigipiny m'otiek fonjin me.

Ilanga nywolirok pa Yohana Jakibatisa

⁵ I ndir ma Herode obed'iye kere ma Yuda, onwaŋo nitie jacway ri Were i wi migam m'ilwoŋo ni Zekaria, ma wok i nono pa Abija; aka go oyido nigi cege ma nyakwar Aron m'ilwoŋo ni Elizabeth.

⁶ Joje oyido ji mabeyo ruwaŋ Were, ma jokuro Cik je gi Or je mapa Rwoth m'ongoye apuse.

⁷ To oyido jongoye gi nyathi, rupiri Elizabeth oyido kinywol, aka joje onwaŋo jotieko ti.

⁸ To munyo weso pa Zekaria gin otundo ma tic ma cwayo,

⁹ paka cik pa joma cwayo wi migam nitie ma donjo i Ot pa Were waŋo buban, kwir omako Zekaria.

¹⁰ Aka lwak ji oyido jokwayo gi woko i hongo ma waŋo buban.

¹¹ Gikenyo malaika pa Rwoth omenyere rigo m'ocungo yuthenge maracuc ma migam m'iwaŋ'iye buban.

¹² Zekaria obwok swa munyo oneno go.

¹³ To malaika owaco rigo ni, “Ikir'ibedi gi lworo Zekaria, kole Were owinjo kwayo perin, aka dhako perin Elizabeth bino nywolo rin wodin, aka ibino cwoko nyinge ni Yohana.

¹⁴ Ibino limo kisangala gi siem, odoko ji mathoth jobino kisangala gi nywolirok pere;

¹⁵ ato go bino bedo ŋatadwoŋ ruwaŋ Rwoth; aka go kilamadho vini kosa medho moro je ma mero jo, aka Cuny Maleŋ bino poŋ i go, kada ma fodi go ni iy min.

¹⁶ Go bino dwoko cuny Joisiraili bongi Rwoth Were pajo;

¹⁷ kendo go bino telo yuwiy Rwoth paka jamikwenda pere i dwoŋ gi meni paka apa Elia jatuci wac Were. Go bino dwoko cuny bacere ji bongi nyithindho pajo; aka bino miyo jocay jowogiki i yo pa ji m'otire; go bino miyo ji pa Rwoth yikirok ri Rwoth.”

¹⁸ Aka Zekaria owaco ri malaika ni, “Anoŋey nedi gino? Kole atieko ti aka dhako paran bende oti.”

¹⁹ Aka malaika owaco rigo ni, “An Gabriel m'acungo ruwaŋ Were; aka ooran luwo kodin gi kelo rin wac maber me.

²⁰ To paka ikiyeyo mikwenda paran, ma bino timere i ndir mere, ikibino luwo cuka ndelo ma gigipiny me otimer'iye.”

²¹ Ji oyido jokuro Zekaria woko; to jouro swa paka go ogalo ameno i Ot pa Were.

²² Munyo go owok woko, k'onyalo luwo gi jo, to joparo ni go oneno gimoro i Ot pa Were; riameno go otimo rijo ranyuth, rupiri go oyido olokere obadha.

²³ Munyo hongo pere ma tic orumo, go odok peco pere.

²⁴ Rumacen cege, Elizabeth ogamo iye to pondo hongo ma dwe abic munyo waco ni,

²⁵ “Rwoth otimo ran ama i ndir me munyo oparo kwoŋan, to kwanyo kwoŋan wickwot i waŋ ji.”

²⁶ Munyo Elizabeth otieko dwe aucel gi iye, Were ooro malaika Gabriel i tindi ma Galili m'ilwoŋo ni Nazareth,

²⁷ bongi nyako mambula, m'onwaŋo openjere gi jayac m'ilwoŋo ni Yozefu, nyakwar Daudi; aka nyako no oyido nyinge Maria.

²⁸ Malaika obino bonge to waco rigo ni, “Yoga, ijasilwany, Rwoth nitie kodin!”

²⁹ Go obwok swa munyo owinjo moth me, kende oparo g'icunye dwoŋ moth me.

³⁰ To malaika no waco rigo ni, “Maria, ikir'ibedi gi lworo, rupiri ijasilwany ruwaŋ Were.

³¹ Kole ibino gamo iyin, t'inywolo wodin; aka ibino cwoko nyinge ni Yesu.

³² Go bino bedo ŋatadwoŋ, aka ibino lwoŋo go ni Wod pa Were Madwoŋ Maloyo; aka Rwoth Were bino miyo go kom ma ker pa Daudi, kwari mere.

³³ Go bino dhumo nyikway Yakobo cil gi cil aka Ker pere bino ngoye gike.”

³⁴ To Maria openjo malaika ni, “Gime obedi nedi ma to an abedo nyako mambula?”

³⁵ To malaika waco rigo ni, “Cuny Maleŋ bino loro kwoŋin, aka meni pa Were Madwoŋ Maloyo bino umin; am'omiyo nyathi m'ibino nywolo ibino lwoŋo ni ŋataleŋ, Wod Were.

³⁶ Aka pama, wat perin Elizabeth gi tiyo pere bende otieko ogamo iye nyathi majayac; aka me dwe pere mar'aucel, ŋata yado ilwoŋo ni kinywol.

³⁷ Kole ri Were ongoye gima kinyalere.”

³⁸ Maria owaco ni, “An abedo ŋeca pa Rwoth; weyi wotimere ran paka iwaco no.” Gikenyo malaika oweyo go.

Maria wendo ri Elizabeth

³⁹ I hongo no Maria omako royo mayot to kidho i piny matendere tendere, yu tindi ma Yuda.

⁴⁰ Go odonjo i ot pa Zekaria to m'otho Elizabeth.

⁴¹ Gikenyo tekin Elizabeth winjo moth pa Maria, nyathi manitie i iye ogweco. Cuny Maleŋ opoŋ kwoŋ Elizabeth

⁴² to luwo gi dwonde ma malo munyo waco ni, “Ijasilwany kwoŋ mon, Nyathi m'ilanywolo bende jasilwany!

⁴³ Me silwany aŋo ma min Rwoth gipi obino bongan ka?

⁴⁴ Kole tekin awinjo moth perin to nyathi ma iyan gweco gi kisangala.

⁴⁵ In ijasilwany m'iyeyo ni mikwenda pa Rwoth rin bino timere adieri.”

Wer pa Maria ma foyo Were

⁴⁶ Maria owaco ni, Adundo paran foyo Rwoth,

⁴⁷ aka cunyan sangala i Were Jaboth paran.

⁴⁸ Kole go oneno bwonirok pa ŋeca pere! Aka wok gunyo ni nono je bino lwoŋan ni jasilwany.

⁴⁹ Kole Were ma jameni otimo ran gigipiny madongo. Nyingi go leŋ.

⁵⁰ Go timo ŋono ri joma lworo go, wok i luse ji acel tundo i luse man.

⁵¹ Go orieyo cinge ma nyutho meni pere, aka otieko kedho woko joma pakere i paro ma cuny jo.

⁵² Go oŋilo woko kerin madongo wi kombere pajo, aka otiŋo malo joma bwonere.

⁵³ Go oyeŋo joma kec neko gi gigipiny mabeyo, aka oriemo woko joŋaŋo gi cingi gin nono.

⁵⁴ Go okonyo ŋeca pere Isiraili, munyo opoyo wor pere

⁵⁵ m'ociko kwarere mawan, ri Abraham gi nyikwaye je cil gi cil!

⁵⁶ Maria obedo bongi Elizabeth cegin dwe adek to nyaka dok peco.

Nywolirok pa Yohana Jakibatisa

⁵⁷ Ndelo pa Elizabeth otundo ma nywol, to nywolo nyathi ma jacwo.

⁵⁸ Joger pere kodi wade pere jowinjo ni Rwoth otimo rigo wor madwoŋ aka josangala swa gi go.

⁵⁹ I ndelo mar'aboro jobino thumo nyathi, aka onwaŋo jomito cwoko nyinge ni Zekaria paka bamere.

⁶⁰ To yokimere waco ni, “K'ameno, ibino lwoŋo go ni Yohana.”

⁶¹ Jowaco rigo ni, “Kole ongoye moro i nono mewin m'ilwoŋo gi nyinge no!”

⁶² Aka jomiyo bamere ranyuth ma penjo go paka go mito wolwoŋi nyathi no.

⁶³ Go okwanyo gindiko, to ndiko ni, “Nyinge Yohana.” Ji je jouro swa!

⁶⁴ Gikenyo won to Zekaria yawo dhoke to lewe gonyere, to cako luwo munyo foyo Were.

⁶⁵ To lworo omako joger pajo je, kendo oluwi kwoŋ gigipiny me i Yuda parom.

⁶⁶ Joma jowinjo je jorwako wac no i cuny jo munyo jowaco ni, “Kosa nyathi me obedi ŋa? Kole cingi Rwoth ni kwoŋe.”

Zekaria tuco wac kwoŋ nyathi no

⁶⁷ Aka Cuny Maleŋ opoŋ kwoŋ Zekaria bamere, to luwo munyo waco ni,

⁶⁸ “Wofoy Rwoth Were pa Isiraili! Kole go olimo ji pere to botho jo.

⁶⁹ Omiyo wan Jaboth ma jameni i nono pa Daudi jatic pere,

⁷⁰ paka cango oluwo gi i dhok jotuci wac pere maleŋ wok con,

⁷¹ nike bino botho wan kwoŋ jokwor mawan kodi kwoŋ joma mon kodi wan bende;

⁷² kareno nyutho wor ri kwarere mawan, gi poyo cikirok pere maleŋ,

⁷³ kwoŋirok ma cango go otimo ri kwari wan Abraham, nike bino botho wan wok i cingi jokwor mawan,

⁷⁴ ŋey watiy rigo m'ongoye lworo,

⁷⁵ i leŋo kodi tiro i waŋe, i kwo mawan gipi.

⁷⁶ Aka in, nyathi me, ibino lwoŋin ni jatuci wac pa Were Madwoŋ Maloyo, kole ibino telo Rwoth kidho yiko rigo royo;

⁷⁷ gi miyo ji pere rieko ma both ka Were ocwako reco pajo.

⁷⁸ Ro wor mathoth ma Were mawan nitie gine, go bino miyo waŋceŋ gulo to ŋamba ma both wok riwan,

⁷⁹ ma bino kelo lero ri joma ni mudho, kodi i tho ma mito umo jo, to tiro tiendi wan i royo ma siem.”

⁸⁰ Nyathi no odongo to bedo gi meni i cunye kendo obedo i thim cuka ndelo otundo to nyuthere kamaler ri Joisiraili.