Kwan 29 - KITAWO MALEŊ Catholic

Mic ma Kalima ma Oro Manyen

¹ K'acel ma dwe mar'abirio wiripo bedo gi cokirok lamo. Wikiripi timo tic mewin; obedo ndelo ma kudho gwarin.

² Wiripo miyo cowirok ma mic awaŋa, maŋwe kur ri Rwoth. Rwath acel, wod rombo acel, kodi wot rombo abirio ma jongoye gi ŋolo.

³ Mic ma cemo ripo bedo moko m'onywow gi mo oliv. Kilo adek ma moko ri rwath, kilo ario ma moko ri wod rombo,

⁴ kodi kilo acel ma moko ri kisi wot rombo abirio.

⁵ Wiripo miyo bende wod diel ri mic ma cwako reco ma cwako reco mewin.

⁶ Miy win mic me medo i wi mic awaŋa ma dwe manyen kodi mic ma cemo mere, kanyacel gi mic awaŋa ma kisi ndelo kodi mic ma cemo mere kodi mic ma vini, cungo kwoŋ kwer pajo. Jobedo mic awaŋa gi mac ma ŋwece kur mere sangala Rwoth.

Mic i ndelo ma cwako reco

⁷ K'apar ma dwe mar'abirio wiripo bedo gi cokirok lamo. Wiripo riyo kec aka wikiripi timo tic.

⁸ Wiripo miyo Rwoth mic awaŋa ma ŋwece kur mere sangala go. Rwath acel, wod rombo acel, kodi wot rombo abirio ma jo oro acel ma jongoye gi ŋolo.

⁹ Wiripo miyo gi mic ma cemo ma moko m'onuŋere m'onywow gi mo oliv. Moko kilo adek ri rwath, moko kilo ario ri wod rombo,

¹⁰ kodi moko kilo acel ri kisi wot rombo.

¹¹ Wiripo bende miyo wod diel ri mic ma cwako reco, medo i wi diel m'imiyo i kwer ma cwako reco pa ji, kanyacel gi mic awaŋa ma kisi ndelo kodi mic ma cemo mere kodi mic ma vini.

Mic ma Kalima ma Kayindi

¹² K'apar g'abic ma dwe mar'abirio wiripo bedo gi cokirok ma lamo aka wikiripi timo tic. Wiripo timo kalima ri Rwoth ma ndelo abirio.

¹³ Wiripo miyo mic awaŋa gi mac maŋwe kur ri Rwoth. Rwath apar g'adek, wot rombo ario, wot rombo ma jo oro acel apar g'aŋwen ma jongoye gi ŋolo.

¹⁴ Wiripo miyo gi mic ma cemo ma moko m'onuŋere m'onywow gi mo oliv. Moko kilo adek ri kisi rwath, kilo ario ri kisi wod rombo,

¹⁵ kodi moko kilo acel ri kisi wot rombo.

¹⁶ Wiripo bende miyo wod diel ri mic ma cwako reco, medo i wi mic awaŋa ma kisi ndelo, kanyacel gi mic ma cemo mere kodi mic ma vini.

¹⁷ I ndelo mar'ario miy win rwath apar g'ario, wot rombo ario kodi wot rombo apar g'aŋwen ma jongoye gi ŋolo.

¹⁸ Miy win mic ma cemo kodi mic ma vini ri rwath apar g'ario, wot rombo kodi nyithindhi rombo cungo kwoŋ welo pajo.

¹⁹ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

²⁰ I ndelo mar'adek miy win rwath apar g'acel, wot rombo ario kodi nyithindhi rombo apar g'aŋwen ma jongoye gi ŋolo.

²¹ Miy win mic ma cemo kodi mic ma vini ri rwath apar g'acel, wot rombo kodi nyithindhi rombo cungo kwoŋ welo pajo.

²² Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

²³ I ndelo mar'aŋwen miy win rwath apar, wot rombo ario kodi nyithindhi rombo apar g'aŋwen ma jongoye gi ŋolo.

²⁴ Miy win mic ma cemo kodi mic ma vini ri rwath apar, wot rombo kodi nyithindhi rombo cungo kwoŋ welo pajo.

²⁵ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

²⁶ I ndelo mar'abic miy win rwath abuŋwen, wot rombo ario kodi nyithindhi rombo apar g'aŋwen ma jongoye gi ŋolo.

²⁷ Miy win mic ma cemo kodi mic ma vini ri rwath abuŋwen, wot rombo kodi nyithindhi rombo cungo kwoŋ welo pajo.

²⁸ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

²⁹ I ndelo mar'aucel miy win rwath aboro, wot rombo ario kodi nyithindhi rombo apar g'aŋwen ma jongoye gi ŋolo.

³⁰ Miy win mic ma cemo kodi mic ma vini ri rwath aboro, wot rombo kodi nyithindhi rombo cungo kwoŋ welo pajo.

³¹ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

³² I ndelo mar'abirio miy win rwath abirio, wot rombo ario kodi nyithindhi rombo apar g'aŋwen ma jongoye gi ŋolo.

³³ Miy win mic ma cemo kodi mic ma vini ri rwath abirio, wot rombo kodi nyithindhi rombo cungo kwoŋ welo pajo.

³⁴ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

³⁵ I ndelo mar'aboro wiripo bedo gi cokirok lamo aka wikiripi timo tic.

³⁶ Wiripo miyo mic awaŋa gi mac ma ŋwece kur ma sangala Rwoth. Rwath acel, wod rombo kodi nyithindhi rombo abirio ma jongoye gi ŋolo.

³⁷ Miy win mic ma cemo kodi mic ma vini ri rwath, wod rombo kodi nyithindhi rombo cungo kwoŋ welo pajo.

³⁸ Miy win bende wod diel acel ri mic ma cwako reco, medo i wi mic awaŋa ma kisi ndelo kodi mic ma cemo mere kodi mic ma vini.

³⁹ Wiripo miyo Rwoth mic me i kalimin mewin, medo i wi mic mewin ma wiciko kodi ma win wegi wimiyo, paka mic awaŋa mewin, mic ma cemo mewin, mic ma vini mewin kodi mic ma siem mewin.

⁴⁰ Musa owaco ri Joisiraili kisi gimoro paka Rwoth omiyo go or.