Kwan 26 - KITAWO MALEŊ Catholic

Kwano Joisiraili mar'ario

¹ Rumacen ma thoyamo, Rwoth owaco ri Musa kodi Eliazar wod pa Aron, jacway ri Were i wi migam ni,

² “Kwan win lwak pa Isiraili je, cwo cako i oro piero ario kadho malo, cungo kwoŋ pecin pajo, kisi jacwo i Isiraili manyalo kadho i lweny.”

³ Musa kodi Eliazar jacway ri Were i wi migam joluwo gi jo kam'othangere ma Mowab i thengi Yordan tirtir gi Yeriko, ka jowaco ni,

⁴ “Kwan win cwo, wok i oro piero ario kadho malo paka Rwoth owodho or ri Musa.” Me Joisiraili ma jowok i lowo ma Misir.

⁵ Wok i nono pa Ruben, okayo pa Yakobo, wok i peco pa Hanok, peco pa Palu,

⁶ peco pa Heziron kodi peco pa Karim;

⁷ cwo m'okwan je joromo 43,730.

⁸ Palu obedo ba Eliab.

⁹ Eliab obedo ba Nemuel, Dathan kodi Abiram. Dathan kodi Abiram jobedo ji acel ca ma ji joyero, ma jogwenyere kwoŋ Musa kodi Aron kanyacel gi Kora, munyo jogwenyere kwoŋ Rwoth.

¹⁰ I hongo no ama piny oyawere to mwonyo woko jo kanyacel gi Kora, munyo jotho, munyo mac oreyo woko cwo 250 paka gir'anena ri Joisiraili.

¹¹ To wot Kora jok'otho.

¹² Wok i nono pa Simeo, cungo kwoŋ pecin pajo, peco pa Nemuel, peco pa Yamin, peco pa Yakin,

¹³ peco pa Zera, peco pa Saulo,

¹⁴ cwo m'okwan joromo 22,200.

¹⁵ Wok i nono pa Gad, cungo kwoŋ pecin pajo; peco pa Zefon, peco pa Hagi, peco pa Suni,

¹⁶ peco pa Ozini, peco pa Eri,

¹⁷ peco pa Arodi kodi peco pa Areli,

¹⁸ cwo m'okwan joromo 40,500.

¹⁹ Wot Yuda jobedo Eri kodi Onan ma jotho i piny ma Kanan.

²⁰ Nyikway Yuda cungo kwoŋ pecin pajo jobedo, peco pa Sela, peco pa Perez kodi peco pa Zera.

²¹ Me nyikway Perez, peco pa Heziron kodi peco pa Hamul.

²² Cwo m'okwan wok i nono pa Yuda joromo 76,500.

²³ Wok i nono pa Isakar cungo kwoŋ pecin pajo, peco pa Tola, peco pa Puwa,

²⁴ peco pa Yasub kodi peco pa Simiron.

²⁵ Cwo m'okwan wok i nono pa Isakar joromo 64,300.

²⁶ Wok i nono pa Zebulun cungo kwoŋ pecin pajo, peco pa Sered, peco pa Elon kodi peco pa Yalal.

²⁷ Wok i nono pa Zebulun, cwo m'okwan joromo 60,500.

²⁸ Wok i nono pa Yozefu, cungo kwoŋ pecin pajo, peco pa Manase kodi peco pa Efrayim.

²⁹ Wok kwoŋ nyikway Manase, peco pa Makir ba Giliad kodi peco pa Giliad.

³⁰ Wok kwoŋ nyikway Giliad, peco pa Lezer, peco pa Helek,

³¹ peco pa Asiriel, peco pa Sekem,

³² peco pa Semida kodi peco pa Hefer.

³³ Onyo Zelofehad wod pa Hefer oyido ongoye gi wote, go oyido nitie gi nyithindho manyir. Jobedo Mala, Nowa, Hogla, Milika kodi Tiriza.

³⁴ Wok i nono pa Manase, cwo m'okwan joromo 52,700.

³⁵ Wok i nono pa Efrayim cungo kwoŋ pecin pajo, peco pa Suthela, peco pa Beker kodi peco pa Tahan.

³⁶ Nyikway Suthela jobedo peco pa Eran.

³⁷ Wok i nono pa Efrayim cwo m'okwan joromo 32,500. Me jobedo nyikway Yozefu.

³⁸ Wok i nono pa Benyamin cungo kwoŋ pecin pajo, peco pa Bela, peco pa Asibel, peco pa Ahiram,

³⁹ peco pa Sefufam, kodi peco pa Hufam.

⁴⁰ Nyikway Bela jobedo peco pa Arid kodi peco pa Naman.

⁴¹ Wok i nono pa Benyamin cwo m'okwan joromo 45,600.

⁴² Wok i nono pa Dan cungo kwoŋ pecin pajo, peco pa Suham.

⁴³ Wok i nono pa Dan cwo m'okwan joromo 64,400.

⁴⁴ Wok i nono pa Aser cungo kwoŋ pecin pajo, peco pa Imina, peco pa Isivi kodi peco pa Beria.

⁴⁵ Nyikway Beria jobedo peco pa Heber kodi peco pa Malikiel.

⁴⁶ Nyingi nyar Aser oyido ilwoŋo ni Sera.

⁴⁷ Wok i nono pa Aser cwo m'okwan joromo 53,400.

⁴⁸ Wok i nono pa Nafital cungo kwoŋ pecin pajo, peco pa Yazel, peco pa Guni,

⁴⁹ peco pa Yezer kodi peco pa Silam.

⁵⁰ Wok i nono pa Nafital cwo m'okwan joromo 45,400.

⁵¹ Me welo pa cwo Isiraili m'okwan je, aka joromo 601,730.

⁵² Rwoth oluwo gi Musa ka waco ni,

⁵³ “Pok lowo ri nonin cungo kwoŋ welo pajo.

⁵⁴ Miy adec madwoŋ ri nono madwoŋ, aka imiy adec mathin ri nono mathin. Kisi nono ripo limo adec ma ripo gi welo mere.

⁵⁵ T'iripo poko lowo gi bolo kwir, cungo kwoŋ nyingi nono.

⁵⁶ Ilapoko lowo gi bolo kwir i dier nono madwoŋ kodi mathin.”

⁵⁷ Nono pa Jolevi jobedo pecin pa Gerisom, Kohath kodi Merari.

⁵⁸ Nyikway jo jobedo pecin pa Libini, Hebron, Mali, Musi kodi Kora. Kohath obedo ba Amram.

⁵⁹ Cipa Amram oyido Yokebed nyar Levi, m'onywol i Misir. Yokebed onywolo ri Amram Aron, Musa kodi nyamin jo Miriam.

⁶⁰ Wot Aron jobedo Nadab, Abihu, Eliazar kodi Ithamar.

⁶¹ Nadab kodi Abihu jotho munyo jomiyo cowirok ma kiripi ruwaŋ Rwoth.

⁶² Nyithindho ma cwo wok i dwe acel kadho malo ma k'okwan jo kanyacel gi Joisiraili oyido joromo 23,000 aka k'opoki jo lim i Isiraili.

⁶³ Me nonin ma Musa kodi Eliazar jacway ri Were i wi migam jokwano munyo jokwano Joisiraili kam'othangere ma Mowab i thengi Yordan tirtir gi Yeriko

⁶⁴ Ongoye jacwo ma k'okwan kwoŋ cwo ma Musa kodi Aron oyido jotieko kwano marapena i thim ma Sinai.

⁶⁵ Rwoth oyido otieko waco kwoŋ jo ni, “Joripo tho i thim ma Sinai.” Ongoye kwoŋ jo m'oboth kwanyo woko Kaleb wod pa Yefune kodi Yosuwa wod pa Nun.