Kwan 23 - KITAWO MALEŊ Catholic

¹ Balam owaco ri Balak ni, “Geti ran ka, migame abirio, aka iyiki thwondhe abirio kodi wot rombo abirio.”

² Balak otimo paka Balam owaco; aka Balak kodi Balam jomiyo thwon kodi wod rombo i wi kisi migam.

³ Balam owaco ri Balak ni, “Cungi cegin gi mic perin awaŋa, kareno akadho poyi Rwoth laromo kodan. To wac moro je ma Rwoth onyuthan, meno ama alawaco rin.” Ameno Balam okadho kamabor ye.

⁴ Were oromo gi Balam, aka Balam owaco rigo ni, “Atieko geto migame abirio, t'amiyo i wi kisi migam thwon kodi wod rombo.”

⁵ Rwoth oketho wac i dhok Balam, aka owaco rigo ni, “Gik bongi Balak, aka me a gim'iripo waco.”

⁶ Ameno Balam ogik bongi Balak, m'oyido ocungo cegin gi mic pere awaŋa kanyacel gi jodhum je ma Mowab.

⁷ Balam otuco wac Were ka waco ni, Wok i Aram, Balak otelan, kere ma Mowab wok i got ma yuwok ceŋ. Biye, kwoŋ ran Yakobo, biye kwedi ran Isiraili!

⁸ T'anokwoŋ nedi ŋata Were fodi k'okwoŋo? Anokwedi nedi, ŋata Rwoth fodi k'okwedo?

⁹ Aneno go gi wi telin, aka aŋiyo go gi wi tendere. Nono ma jobedo kakendi jo, aka jokikwanere i dier nonin man!

¹⁰ Ŋa m'otieko kwano fukefuke pa Yakobo, aka ŋa m'oŋeyo welo pa Isiraili? Weyi atho, tho pa ji ma jotire, aka weyi gike paran wobedi paka apere!

¹¹ Balak owaco ri Balam ni, “Aŋo m'itimo ran? Akelin ka lamo jokwor paran, t'onyo itieko miyo jo silwany adieri.”

¹² Balam odwoko ni, “Gima Rwoth okethi i dhokan, kende ama aladewo waco.”

Balam tuco wac Were madirio

¹³ Balak owaco ri Balam ni, “Biye kodan i kabedo man, kam'inyalo neno nyaka adec pajo, kam'ikilaneno joje, aka ikwoŋ ran jo gi kenyo.”

¹⁴ Balak otero Balam i ndelo ma Zofim wi got Pisiga. Kenyo bende go ogeto migame abirio, to miyo mic i wi kisi migam ma thwon kodi wod rombo.

¹⁵ Balam owaco ri Balak ni, “Cungi cegin gi mic perin awaŋa, kareno aromo gi Rwoth kaca.”

¹⁶ Rwoth oromo gi Balam, to ketho wac i dhoke to waco rigo ni, “Gik bongi Balak, aka me a gim'iwaci.”

¹⁷ Balam ogik bongi Balak, kama go oyido ocung'iye cegin gi mic pere awaŋa kanyacel gi jodhum je ma Mowab. Balak openjo Balam ni, “Aŋo ma Rwoth owaco?”

¹⁸ Kenyo Balam otuco wac Were me: Ay, Awi Balak, aka winji, ciki ithin ran Awi wod pa Zipor.

¹⁹ Were k'obedo dhano, ma go nyalo twodo, kosa wod dhano, ma go owir paro pere. Ka go otieko waco, kilatimo? Ka go otieko luwo, kilaketho i kare?

²⁰ Neni, atieko limo or ma miyo silwany, go otieko miyo silwany, aka akinyali wiro.

²¹ Go fodi k'oneno silwany marac kwoŋ Yakobo, kosa teko i Isiraili. Rwoth Were pajo nitie gi jo, Jotuco nike Rwoth obedo Kere pajo.

²² Were, m'owodho jo wok i Misir, cale tungi merikwa mager rijo.

²³ Adieri ongoye yido ma mako Yakobo, ongoye thieth kwoŋ Isiraili. Onyo pama ji jolawaco kwoŋ Yakobo kodi Isiraili, neni, gima Were otieko timo!

²⁴ Neni, nono ma ay paka simbwor madhako, tiŋere malo paka simbwor! Kinindi piny cuka otieko camo gim'omako, to madho remo mere.

²⁵ Balak owaco ri Balam ni, “Ikir'ikwoŋ jo kosa imiy jo silwany.”

²⁶ To Balam odwoko to waco ri Balak ni, “Akiwaco rin nike gima Rwoth owaci je, abino timo.”

Balam tuco wac Were ma didek

²⁷ Balak owaco ri Balam ni, “Mondo biye, weyi aterin i kabedo man, poyi lakisangala Were t'ikwoŋo ran jo gi kenyo.”

²⁸ Ameno Balak otero Balam wi got Pewor ma ŋiyo thim.

²⁹ Balam owaco ri Balak ni, “Geti ran migame abirio ka aka ikeli ran thwondhe abirio kodi wot rombo abirio.”

³⁰ Balak otimo paka Balam owaco rigo, aka omiyo mic ma thwon kodi wod rombo i wi kisi migam.