Kwan 22 - KITAWO MALEŊ Catholic

Kere ma Mowab lwoŋo Balam

¹ Joisiraili joay, aka joketho kambi i thim ma Mowab i thenge ma yuwok ceŋ ma Yordan ma ŋiyere gi Yeriko.

² Onyo Balak wod pa Zipor oneno kisi gimoro ma Joisiraili jotimo ri Joamor.

³ Mowab obwok swa ri Joisiraili, aka oyido opoŋ gi lworo madwoŋ swa ri Joisiraili.

⁴ Jomowab jowaco ri jodongo ma Midian ni, “Jome jolanaŋo woko kisi gim'othoko wan, paka dhiaŋ naŋo woko lum i samba.” Onyo Balak wod pa Zipor am'oyido obedo kere ma Mowab i hongo no.

⁵ Balak ooro wolwoŋi Balam wod pa Bewor i Pethor, manitie i Yufrete, i lowo pa Amaw ka waco ni, “Nono moro obino wok i Misir, aka ji mere joywore kisi kamoro i lowo, aka jobedo cegin kodan.

⁶ Riameno, mondo biye lam ran ji me, paka jotek loyan, poyi alanyalo kikengila jo t'ariemo woko jo i lowo. Kole an aŋeyo nike ŋat'imiyo silwany bedo jasilwany, aka ŋat'ikwoŋo bedo ŋat'olam.”

⁷ Ameno jodongo ma Mowab kodi jodongo ma Midian joay gi pesa ma thieth i cingi jo, aka jobino bongi Balam to jowaco rigo mikwenda pa Balak.

⁸ Balam odwoko jo ni, “Nindi win ka wor me, aka dikin, alamiyo win radwok paka Rwoth owaci ran.” Ameno jodongo ma Mowab jodoŋ bongi Balam.

⁹ Were obino bongi Balam, aka openjo go ni, “Me cwo mene ma jonitie bongin?”

¹⁰ Balam odwoko Were ni, “Balak wod pa Zipor kere ma Mowab ooro jo bongan ka waco ni,

¹¹ ‘Nitie ka ji ma jobino wok i Misir, aka joywore kisi kamoro i lowo. Onyo biye ikwoŋ ran jo, poyi alanyalo lweny gi jo t'ariemo woko jo.’ ”

¹² Were owaco ri Balam ni, “Ikiripi kadho gi jo, aka ikir'ikwoŋ jono, kole jobedo josilwany.”

¹³ Ameno Balam ocew odikin aka owaco ri jodongo ma Mowab ni, “Gik win i piny mewin, kole Rwoth k'oyeyan kadho gi win.”

¹⁴ Ameno jodongo ma Mowab joay to jogik bongi Balak to jowaco rigo ni, “Balam okwero dwoko gi wan.”

¹⁵ Balak ooro kendo jodongo kweth aka m'iworo loyo.

¹⁶ Jobino bongi Balam to jowaco rigo ni, “Me apaka Balak wod pa Zipor waco, ‘Mondo ikir'iyey gimoro wogeŋin bino bongan,

¹⁷ adieri alamiyin kemba madwoŋ, aka alatimo gim'inowaci ran je. Biye kwoŋ ran ji me.’ ”

¹⁸ Balam odwoko ka waco ri ŋecin pa Balak ni, “Makada nende oyido Balak miyan ot pere m'opoŋ gi feza gi zahabu, oyido akinyali timo gima kalo ma dhok Rwoth Were paran otieko waco, timo gimathin kosa madwoŋ.

¹⁹ Onyo mondo doŋ win ka wor me, paka jonica jotimo, ŋey anyal ŋeyo giman ma Rwoth nyalo waco ran.”

²⁰ Wor no Were obino bongi Balam to waco rigo ni, “K'inen cwo me jobino lwoŋin, ay ikadhi gi jo, to nyaka wac m'anowaci rin, meno am'inotim.”

²¹ Ameno Balam oay odikin, otweyo punde pere, to kadho gi jodongo ma Mowab.

Balam, punda kodi malaika

²² Nge pa Were oliel kwoŋbedo Balam oyido kadho, aka malaika pa Rwoth ocungo i royo paka jakwor pa Balam. Onyo Balam oyido gweyo punda gi ŋecin pere ario.

²³ Munyo punda oneno malaika ocungo i royo, g'abor i cinge, punda orwayo wok i royo to rwayo i dudi. Balam ogoyo punda wodwoki i royo.

²⁴ Kenyo malaika pa Rwoth ocungo i royo madiny i dier ndelin vini, gi kor ot i kisi thenge.

²⁵ Munyo punda oneno malaika pa Rwoth, oroc kwoŋ kor ot, to diyo tiendi Balam kwoŋ kor ot; aka Balam ogoyo punda kendo.

²⁶ Malaika pa Rwoth okadho yuwiye, to cungo kamadiny, m'ongoye kaluwo i kisi thenge racuc kodi racam.

²⁷ Munyo punda oneno malaika pa Rwoth, onindo piny i ŋangi Balam. Balam omako nge, to goyo punda gi luth pere.

²⁸ Kenyo Rwoth oyawo dhok punda to penjo Balam ni, “Aŋo m'atimo rin, m'igoyan didek me je?”

²⁹ Balam odwoko punda ni, “Kwoŋbedo itieko miŋan! Aka ka bedi oyido anitie g'abor i cingan, dinyo anekin pama me!”

³⁰ Punda owaco ri Balam ni, “Akibedo punda perin, m'itieko gweyo i kwo perin je tundo konon? Amaro terin ama?” Balam odwoko ni, “Be.”

³¹ Kenyo Rwoth oyawo waŋ Balam to neno malaika pa Rwoth ocungo i royo, g'abor i cinge, aka Balam okule piny, to podho gi nyime.

³² Malaika openjo Balam ni, “Raŋo igoyo punda perin didek me je? Atieko bino paka jakwor, kwoŋbedo yo perin okom ruwaŋan.

³³ Punda onenan, aka owire kwoŋan didek. Kabedi k'owire kwoŋan, adieri pama dinyo anekin t'aweyo punda wokwo.”

³⁴ Kenyo Balam owaco ri malaika pa Rwoth ni, “Atieko timo reco, kole oyido akiŋeyo nike oyido icungo i royo geŋan. Onyo riameno, k'inen k'osangala in, aladok peco.”

³⁵ Malaika pa Rwoth odwoko Balam ni, “Kadhi gi cwo no, to luw nyaka gim'anowaci rin.” Ameno Balam omedere gi jodhum pa Balak.

Balak jolo Balam

³⁶ Munyo Balak owinjo nike Balam obino, owok romo gi go i Ar, tindi madwoŋ i malawa Arinon i kew gi Mowab.

³⁷ Balak openjo Balam ni, “Raŋo ikibino munyo alwoŋin marapena? Oyido iparo nike akinyal miyin kemba?”

³⁸ Balam odwoko Balak ni, “Atieko bino bongin pama, to anitie kune gi meni ma waco kada gimoro? Wac ma Rwoth okethi i dhokan, meno ama alawaco.”

³⁹ Ameno Balam okadho gi Balak, to jotundo i Kiriath Huzoth,

⁴⁰ kama Balak othum'iye dhiaŋ kodi rombo to miyo riŋo ri Balam kodi jodongo m'oyido jonitie gi go.

Balam tuco wac Were marapena

⁴¹ Yawere mere odikin Balak otero Balam to kelo go malo i Bamoth Bal, kama Balam oyido nyalo neno adec moro pa Joisiraili.