Kwan 15 - KITAWO MALEŊ Catholic

Cik ma mako cowirok

¹ Rwoth oluwo gi Musa ka waco ni:

² “Luw gi Joisiraili aka iwaci rijo ni, Ka witundo i piny ma wilabed'iye, m'amiyo win,

³ t'imiyo mic awaŋa ri Rwoth wok i sidwol kosa i mwendi obedi mic awaŋa kosa cowirok, ma ketho i gike cikirok kosa paka mic ma iwon iyeyo kosa i kalima mewin ma wiyiko ma timo ŋwece kur ma sangala Rwoth.

⁴ Nyaka ŋat'okeli nger mic no ri Rwoth bino bende kelo mic ma kodhi, acel wiy apar ma moko m'onuŋere, m'oruw kodi acel wiy aŋwen ma mo oliv.

⁵ Medo kwoŋ meno, ibino miyo acel wiy aŋwen ma vini paka mic ma vini kodi mic awaŋa kosa cowirok, ri kisi wod rombo.

⁶ Ri wod rombo, ibino miyo mic ma kodhi, acel wiy apar ma moko m'onuŋere m'oruw kodi acel wiy adek ma mo oliv.

⁷ Paka mic ma math ibino miyo acel wiy adek ma vini, maŋwe kur ri Rwoth.

⁸ K'imiyo rwath paka mic awaŋa kosa cowirok, ma ketho i gike cikirok kosa paka mic ma siem ri Rwoth,

⁹ nyaka ibino kelo gi rwath mic ma kodhi, kilo adek ma moko m'onuŋere, m'oruw gi lita ario ma mo oliv.

¹⁰ Ibino kelo paka mic ma math lita ario ma vini, paka mic awaŋa, ma ŋwece mere sangala Rwoth.”

¹¹ “Meno a gim'ibino timo gi kisi thwon kosa wod rombo, kosa gi kisi rombo kosa i dier nyithindhi diegi.

¹² Cungo kwoŋ welo mar'ogwaŋe m'imiyo, ameno apaka ibino timo gi kisi acel kodi je.

¹³ Kisi Jaisiraili bino timo gigipiny me ka kelo mic awaŋa, ma ŋwece kur mere sangala Rwoth.

¹⁴ Jakicar ma bedo i dier win, kosa m'onwaŋ kabedo makicutho i dier win, to paro miyo mic awaŋa, ma ŋwece kur mere sangala Rwoth, bende ripo luwo cik me.

¹⁵ Paka ri kacokirok, bino bedo cik acel ri Jaisiraili kodi jakicar, cik ma cil gi cil ri luse mewin je. Jaisiraili kodi jakicar jobino bedo marom ruwaŋ Rwoth.

¹⁶ Jaisiraili kodi jakicar ma bedo i dier win jobino bedo gi cik acel kodi thumo banja acel.”

¹⁷ Rwoth oluwo gi Musa ka waco ama:

¹⁸ Luw gi Joisiraili aka iwaci rijo ni, ka witieko tundo i lowo m'akel'iye win,

¹⁹ hongo je ma wicam'iye cemo moro ma lowo, wibino miyo mic ri Rwoth.

²⁰ Wok kwoŋ mugat marapena ma widwanyo, wibino miyo mugat acel gipi paka mic; wibino miyo paka wimiyo mic ma wok i gigipiny ma wipiedho.

²¹ I luse mewin je, wibino miyo Rwoth mic wok i mugat mewin marapena ma widwanyo.

²² To ka witimo gimikanyo to wibedo ma wikikuro or me je ma Rwoth otieko luwo gi Musa,

²³ kisi gimoro ma Rwoth otieko oro win ka luwo bongi Musa, wok i ndelo ma Rwoth omiyo or kadho yuwaŋe, i luse mewin je.

²⁴ Onyo ka winotim ma kweth k'oŋeyo, kweth gibe bino miyo rwath acel ri mic awaŋa, ma kur mere sangala Rwoth, kanyacel gi mic mere ma kodhi kodi mic mere ma math, cungo kwoŋ cik mere, wod diel acel ri mic ma cwako reco.

²⁵ Jacway ri Were i wi migam bino timo kwer ma ŋuto ri kweth pa Isiraili je, aka ibino cwako jo; jotimo ma jok'oŋeyo, aka onyo jokelo mic pajo, mic awaŋa ri Rwoth, kodi ma ŋuto reco ruwaŋ Rwoth, ro komo pajo.

²⁶ Kweth pa Joisiraili gibe ibino cwako, kanyacel gi jopath je ma jobedo i dier jo, kwoŋbedo ji je jotimo gi komo.

²⁷ Nyatoro m'otimi reco ma k'oŋeyo bino miyo siwen diel ma jaoro acel paka mic ma ŋuto reco.

²⁸ Jacway ri Were i wi migam bino timo kwer ma ŋuto ruwaŋ Rwoth i migam ma lonyo ŋat'otim kibenga, aka ibino cwako rigo.

²⁹ Ri janono i dier Joisiraili kodi ri japath ma bedo i dier jo, wibino bedo gi cik acel ri kisi dhano m'otimi gikibenga.

³⁰ To ka dhano otim gimikanyo, obedi Jaisiraili kosa japath, meno obwono Rwoth, ibino riemo go woko i dier ji.

³¹ Rupiri go ocayo wac pa Rwoth to turo or pere, nger ŋato ibino riemo go kicutho to bielo banja.

Dhano m'oturo Sabato

³² Munyo Joisiraili oyido jonitie i thim, jonwaŋo jal moro ma dimo yen i ndelo ma Sabato.

³³ Jono ma jonwaŋo go dimo yen jokelo go bongi Musa, Aron, gi bongi kweth je.

³⁴ Jobolo go i iye, rupiri oyido jokuya gir'atima gine.

³⁵ Kenyo to Rwoth waco ri Musa ni, “Jalo iripo neko; kweth gibe joripo neko go woko ma kambi.”

³⁶ Kweth gibe jowodho go woko ma kambi to jogoyo go gi telin cuka otho, paka Rwoth oyido otieko miyo Musa or.

Cik kwoŋ ketho lwodo i nangin

³⁷ Rwoth owaco ri Musa ni:

³⁸ “Luw gi Joisiraili, aka iwaci rijo timo lwodo i sonda ma nangin pajo i luse pajo je kendo gi ketho thol manyabululu i mugowa i kisi sonda.

³⁹ Winitie kodi lwodo ŋey kis ka wineno, wibino poyo or pa Rwoth je gi timo jo, to wibedo ma wikitimo gima cunyin win wanya gi ma waŋ win oneno.

⁴⁰ Onyo wibino poyo kodi kuro or paran je, aka wibino bedo maleŋ ri Were mewin.

⁴¹ Abedo Rwoth Were mewin, m'owodho win woko ma piny ma Misir, ma bedo Were mewin: Abedo Rwoth Were mewin.”