Kwan 13 - KITAWO MALEŊ Catholic

Jopendo

¹ Rwoth owaco ri Musa ni,

² “Dhiri cwo bedo jopendo i piny ma Kanan, m'akidho miyo Joisiraili; wok kwoŋ kisi nono pajo, ibino dhiro jacwo, kisi jatel i dier jo.”

³ Ameno Musa to dhiro jo wok i thim ma Paran, cungo kwoŋ or pa Rwoth, joje cwo ma jotel i dier Joisiraili.

⁴ Me a nyingi jo: Wok i nono pa Ruben, Samuwa wod pa Zakur.

⁵ Wok i nono pa Simeo, Safat wod pa Hor.

⁶ Wok i nono pa Yuda, Kaleb wod pa Yefune.

⁷ Wok i nono pa Isakar, Igal wod pa Yozefu.

⁸ Wok i nono pa Efrayim, Hoseya wod pa Nun.

⁹ Wok i nono pa Benyamin, Palti wod pa Rafu.

¹⁰ Wok i nono pa Zebulun, Gadel wod pa Sodi.

¹¹ Wok i nono pa Yozefu meno nono pa Manase, Gad wod pa Sus.

¹² Wok i nono pa Dan, Amiel wod pa Gemal.

¹³ Wok i nono pa Aser, Sethur wod pa Mikaili.

¹⁴ Wok i nono pa Nafital, Nabi wod pa Vofisi.

¹⁵ Wok i nono pa Gad, Guwel wod pa Maki.

¹⁶ Me a nyingi cwo ma Musa ooro bedo jopendo ma lowo. Musa to wiro nyingi Hoseya wod pa Nun ni Yosuwa.

¹⁷ Munyo Musa ooro jo bedo jopendo i piny ma Kanan, owaco rijo ni, “Kadhi win koro yupiny, aka wikidhi i piny matendere tendere,

¹⁸ winen paka lowo cale, kodi kinen ji ma jobed'iye jotek kosa jonyap, k'inen jonok kosa jomore.

¹⁹ Neni win ka lowo ma jobed'iye ber kosa rac, kodi kinen tindin ma jobed'iye k'ogoy cel iye kosa ogoy cel,

²⁰ kodi k'inen lowo ago oŋaŋ kosa ma candi, kodi kinen yen niye kosa ongoye. Bedi win jomiseni, aka wikel olemo moro ma lowo.” Onyo oyido obedo hongo marapena mar'olemo m'ocek.

²¹ Ameno jokidho malo timo nyaliŋliŋ i lowo wok i thim ma Zin tundo Rehob, cegin gi Lebohamath.

²² Jokadho yupiny, to jotundo Hebron; aka Ahiman, Sesay, kodi Talmay, Joanakim, oyido jonitie kenyo. (Ogeti Hebron oro abirio mafodi k'ogeti Zowan i Misir.)

²³ Jotundo i malawa ma Esikol, to jotoŋo wok kenyo jangi yath manitie gi kayego acel mar'olemo, to jotiŋo i gute i dier jo jario. Jodwoko bende gi pomo kodi nyandere moro.

²⁴ Olwoŋi kenyo ni Malawa Esikol kwoŋbedo lwak Joisiraili joŋado piny wok kenyo.

Radwok pa jonyaliŋliŋ

²⁵ Munyo ndelo piero aŋwen otieko rumo, jopendo jodok.

²⁶ Jobino bongi Musa kodi Aron kodi kweth je pa Joisiraili i thim ma Paran, i Kades; jodwoko rijo wac kodi kweth je, to jonyutho jo olemo ma lowo.

²⁷ To jowaco rigo ni, “Watundo i lowo m'idhir'iye wan; cak gi mo kic mol'iye, aka me olemo mere.

²⁸ To kad'ameno ji ma jobedo i lowo jotek, aka tindin ogoy'iye cel aka jolac swa; medo kwoŋ meno, waneno nyikway Anak kanyago.

²⁹ Joamalek jobedo i lowo ma yupiny; Johiti, Joyebus, kodi Joamor jobedo yupiny matendere; aka Jokanan jobedo yuthengi nam, kodi yuthengi Yordan.”

³⁰ To Kaleb omiyo ji liŋ ruwaŋ Musa, to waco ni, “Weyi wakadhi win dicel wabed'iye, kole wanyalo mako.”

³¹ Kenyo to cwo m'oyido jokadho gine jowaco ni, “Wakinyali kidho malo lweny gi ji me, kole jotek loyo wan.”

³² Ameno to jokelo ri Joisiraili mikwenda ma ŋedho cuny jo ma lowo m'oyido jotieko timo nyaliŋliŋ mere, ka jowaco ni, “Lowo ma watieko woth'iye paka jopendo obedo lowo ma cuto woko joma bed'iye; aka ji je ma wanen'iye jobedo ji ma siragama.

³³ Waneno kenyo nyikway Anak aka wawegi oyido wacale otwoŋin, aka ameno apaka wacale rijo.”