Jothum Banja 3 - KITAWO MALEŊ Catholic

Nonin ma jodoŋ i lowo

¹ Onyo me nonin ma Rwoth oweyo ma temo jono je i Isiraili m'oyido fodi jok'oluwo i lweny moro je i Kanan.

² Rwoth otimo gime ŋey wofonji luse i Isiraili m'oyido fodi jokuya lweny ŋeyo.

³ Jodhum abic pa Jofilistia, Jokanan je, Josidon, Johivi m'oyido jobedo i got Lebanon, wok i got Bal Hamon tundo kiri i Lebohamath.

⁴ Nonin me oyido owey jo ma temo Isiraili, ŋeyo k'oyido jowinji or pa Rwoth, paka go omiyo kwarere pajo or luwo bongi Musa.

⁵ Joisiraili jobedo i dier Jokanan, Johiti, Joamor, Joperiz, Johivi, kodi Joyebus.

⁶ Jonywomo nyir pajo pak mon, to jomiyo nyir pajo ri wot jo i nywomirok, aka jolamo werin pajo.

Othiniel

⁷ Joisiraili jotimo reco ruwaŋ Rwoth, wiy jo owil gi Rwoth Were pajo, to jotiyo ri werin bal kodi Asera.

⁸ Nge pa Rwoth oliel kwoŋ Joisiraili, aka otana jo i cingi Kere Kusan Risathayim ma Mesopotamia, to Joisiraili jotiyo rigo ma oro aboro.

⁹ To munyo Joisiraili joywak ri Rwoth, Rwoth otiŋo malo jagony ri Isiraili, m'ogonyo jo, Othiniel wod pa Kenaz, aka omin Kaleb mathin.

¹⁰ Cuny pa Rwoth obino kwoŋ Othiniel, aka obedo jathum banja ri Joisiraili. Go otelo jo i lweny, aka Rwoth omiyo Kusan Risathayim kere ma Mesopotamia i cingi go, to Othiniel kengila go.

¹¹ Piny okwe ma oro piero aŋwen, aka Othiniel wod pa Kenaz otho.

Ehud

¹² Joisiraili jotimo reco kendo ruwaŋ Rwoth, aka Rwoth omiyo Egilon kere ma Mowab meni monjo Joisiraili, kwoŋbedo oyido jotimo reco ruwaŋ Rwoth.

¹³ Egilon oriwere gi Joamon kodi Joamalek, aka jokengila Joisiraili, to jomako tindi madwoŋ ma yen thith.

¹⁴ Joisiraili jotiyo ri Egilon kere ma Mowab ma oro apar g'aboro.

¹⁵ Joisiraili joywak ri Rwoth, aka Rwoth otiŋo malo rijo jagony, Ehud wod pa Gera, janono pa Benyamin, ma jaracam. Joisiraili jooro go tero ri Egilon mic.

¹⁶ Ehud otimo abor ma ja lewe ario ma boro mere romo tiendi jo acel g'adec, to tweyo i eme maracam i pendi law pere.

¹⁷ Ehud okelo mic ri Egilon kere a Mowab. Egilon oyido obedo jacwo ma cwe swa.

¹⁸ Munyo Ehud otieko miyo Egilon mic, go osewila ji ma jotiŋo mic no.

¹⁹ To Ehud won owire gi cal ma telin cegin gi Gilgal, aka owaco ni, “Anitie gi mikwenda manyaliŋliŋ rin kere.” Kere owaco ri ŋecin pere ni, “Liŋ win!” Joje jowok ruwaŋe.

²⁰ Ehud ocore bongi Egilon m'oyido obedo kakende i kisika m'okwe malo, aka owaco ni, “Anitie gi mikwenda wok bongi Were rin.” Egilon oay malo wok i kom pere ma dhum.

²¹ Ehud otelo cinge maracam to kwanyo abor wok i eme maracam, to cwowo gine iy Egilon,

²² abor odonjo gikululu, to bor umo lewe, Ehud k'ofudho woko abor wok i iye; aka iye onyule woko.

²³ Ehud owok i kisika to cego thigin yuŋeye.

²⁴ Rumacen munyo Ehud otieko kadho, ŋecin pa Egilon jobino to jonwaŋo thigin ocegi aka joparo nike go oyido konyere.

²⁵ Jokuro cuka jolimo wickwot. Munyo joneno nike go kiyaw thigo ma kisika, jokwanyo rayaw to joyawo, aka neni rwoth pajo oyido oriere piny i lowo m'otho.

²⁶ Ehud okwale munyo jogalo, aka oluwo gi cal ma telin to kadho i Seyira.

²⁷ Munyo Ehud otundo, okudho tundi wod rombo i piny matendere ma Efrayim; Joisiraili joluwo go piny wok i got munyo go telo jo.

²⁸ Ehud owaco rijo ni, “Luwan win, kole Rwoth omiyo jokwor mewin Jomowab i cingi win.” Ameno joluwo go piny, jomako ger ma Yordan ma Jomowab joŋado gine, to jok'oyeyo dhano ŋado.

²⁹ I hongo no joneko cegin Jomowab 10,000 ma jotek, ma jorwadhere, m'ongoye m'okwale.

³⁰ I ndelo Mowab ogik i cingi Joisiraili, aka piny okwe ma oro piero aboro.

Samigar

³¹ Rumacen ma Ehud, obino Samigar wod pa Anath, m'oneko Jofilistia gi kwer megikwe; to go bende botho Joisiraili.