Jothum Banja 2 - KITAWO MALEŊ Catholic

Malaika pa Rwoth i Bokim

¹ Malaika pa Rwoth owok malo i Gilgal to kadho i Bokim, aka owaco ni, “Awodho win wok i Misir, aka atieko kelo win i lowo m'aciko kwarkwar win; k'awaco ni, ‘Akibino turo cikirok paran gi win.

² Wikiripi timo cikirok gi ji ma jobedo i lowo me, tur win piny migame pajo.’ To wikiwinji dwondan. Me witimo aŋo?

³ Ameno awaco ni, akilariemo woko jo ruwaŋ win; to jolabedo riwin jokwor, aka werin pajo labedo bwo riwin.”

⁴ Munyo malaika pa Rwoth otieko luwo wac me ri Joisiraili, ji jotiŋo dwondi gin malo to joywak.

⁵ Riameno kabedo no olwoŋi ni Bokim, aka jomiyo cowirok ri Rwoth kenyo.

Tho pa Yosuwa

⁶ Munyo Yosuwa otieko kisewila ji, Joisiraili je jokadho bedo i lim pajo wegi, lunjo lowo.

⁷ Ji jotiyo ri Rwoth i hongo pa Yosuwa je, kodi i hongo pa jodongo je ma jolunjo Yosuwa, m'oyido joneno tic madongo je ma Rwoth otimo ri Isiraili.

⁸ Yosuwa wod pa Nun, ŋeca pa Rwoth, otho munyo jaoro 110.

⁹ Oyiki Yosuwa i lim pere i Timinath Heres i piny matendere Efrayim yumalo ma Got Gas.

¹⁰ Luse ji no je jotho, to luse man luwo jo, m'oyido jokuya Rwoth, kosa tic madongo ma Rwoth otimo ri Isiraili.

Isiraili weyo lamo Rwoth

¹¹ Joisiraili jotimo reco ruwaŋ Rwoth to jolamo Bal.

¹² Jojwango Rwoth Were pa kwarkwar jo m'owodho jo wok i lowo ma Misir, to joluwo werin man, werin pa nonin m'othoko jo, jolamo jo, aka jokwinyo nge pa Rwoth.

¹³ Jojwango Rwoth, aka jolamo Bal kodi Asitate.

¹⁴ Ameno nge pa Rwoth oliel kwoŋ Isiraili to miyo jo i cingi jokinyaga ma jonyaga jo, aka otana jo i cingi jokwor pajo thoko jo, ŋey jok'onyalo cungo ruwaŋ jokwor pajo.

¹⁵ Kisi ka jokadho i lweny, cingi Rwoth okelo rijo raco, paka Rwoth opiro jo, kodi paka Rwoth ociko jo; aka jobedo i litho madwoŋ swa.

¹⁶ Rwoth otiŋo malo jothum banja ma jogonyo jo wok i cingi jokinyaga jo.

¹⁷ Kucel jok'owinjo jothum banja pajo; kole jowanya werin man to jokule piny rijo. Jowiro piyo wok i yo ma kwarkwar jo jowoth'iye, ka jokuro or pa Rwoth; to jok'oluwo yo pajo.

¹⁸ Kisi ka Rwoth otiŋo malo jothum banja ri Joisiraili, Rwoth obedo gi jathum banja, aka obotho jo wok i cingi jokwor pajo i hongo pa jathum banja je. Kole Rwoth omako wor gi ywak pajo ro jono ma jocando jo kodi jono ma jodiyo jo.

¹⁹ To kisi ka jathum banja otho, jowire gik i tim pajo macon loyo kiri kwarere pajo, luwo werin man, tiyo rijo kodi kulok piny rijo. Jok'oweyo tim kodi yo pajo ma wictek.

²⁰ Keme pa Rwoth oliel kwoŋ Isiraili aka go owaco ni, “Kwoŋbedo nono me joturo cikirok paran m'amiyo kwarere pajo or kwoŋe, aka jok'owinjo dwondan;

²¹ an bende akibino riemo woko ruwaŋ jo nonin ma Yosuwa oweyo munyo go otho.

²² Ŋey cungo kwoŋ jo anyal ŋeyo ka Isiraili lakuro yo pa Rwoth kodi woth'iye, paka kwarere pajo jotimo, kosa be.”

²³ Ameno Rwoth oweyo nonin no, ma k'oriemo jo piyo, kosa k'oketho jo i cingi Yosuwa.