Jothum Banja 18 - KITAWO MALEŊ Catholic

Mika kodi nono pa Dan

¹ I hongo no oyido kere ongoye i Isiraili. Aka i hongo no, nono pa Dan oyido jorango adec ma jobed'iye; kwoŋbedo cuka i hongo no ongoye adec i dier nonin ma Isiraili m'oyido otiek miyo jo.

² Ameno jonono pa Dan jodhiro wok i peco pajo cwo abic i dier jo ma jomeni, ma jowok Zora kodi Esitayol, timo nyaliŋliŋ i piny kodi ŋeyo paka nitie, to jowaco rijo ni, “Kidhi win, wiŋey paka piny nitie.” Munyo jotundo i piny matendere Efrayim, i ot pa Mika, to jonindo kenyo.

³ Munyo jonitie i ot pa Mika, joniaŋ dwondi jayac ma Jalevi; ameno jowire gi thenge to jopenjo go ni, “Ŋa m'okelin ka? Aka itimo aŋo ka? Aka aŋo m'obedo aperin ka?”

⁴ Jayac no odwoko jo ni, “Mika otimo ran gime gi gime, to pangisa an aka atieko lokirok rigo jacway ri Were i wi migam.”

⁵ Kenyo jowaco rigo ni, “Mondo penji riwan Were ŋey wanyal ŋeyo ka tic ma wakidho timo lakadho riwan maber.”

⁶ Jacway ri Were i wi migam owaco rijo ni, “Kadhi win i siem. Rwoth otelo win i yo ma wikidho luwo.”

⁷ Cwo abic no jokadho, aka munyo jotundo Layis, joneno piny okwe ri ji ma jobed'iye, cungo kwoŋ kula pa Josidon ma bedo moth gi bedo m'ongoye ŋico m'ongoye gima jocandi i piny kodi bedo gi lim. Medo kwoŋ meno, oyido jobor gi Josidon aka oyido jongoye gi gir'atima gi joman.

⁸ Munyo jodwoko bongi wutmin jo i Zora kodi i Esitayol, jopenjo jo ni, “Wimiyo radwok aŋo?”

⁹ Jowaco ni, “Ay win, weyi win wakadhi malo kwoŋ jo, rupiri watieko neno piny, aka ber swa. Ik'otimi gimoro? Ikir'ibedi gi lithirok kidho, to donji iloki piny aperin.

¹⁰ Tekin idonjo ilatundo bongi ji ma jongoye gi ŋico, i piny malac; Were adieri otieko ketho i cingin kabedo m'ongoye gim'ila cando i piny.”

¹¹ Cwo gana aucel ma nono pa Dan, ma jotiŋo gilweny, joay wok Zora kodi Esitayol,

¹² Jokidho malo to joketho kambi pajo i Kiriath Yerim i Yuda. Riameno olwoŋi kenyo ni Mahane Dan tundo gunyo ni; nitie yupodho ceŋ ma Kiriath Yerim.

¹³ Wok kenyo joluwo kiri i piny matendere ma Efrayim, aka jobino i ot pa Mika.

¹⁴ Kenyo cwo abic m'oyido jokidho timo nyaliŋliŋ i piny ma Layis jowaco ri wutmin jo ni, “Wiŋeyo ni nitie law maleŋ pa jacway ri Were i migam, cal m'ilamo kodi cal ma nyweny i ot me? Onyo pama par win kwoŋ gima wilatimo.”

¹⁵ Ameno jowire gicen kenyo to jotundo bongi jayac m'obedo Jalevi, i peco pa Mika, to jom'otho go.

¹⁶ Cwo 600 pa jonono pa Dan, ma jotiŋo gilweny, jocungo i dhiot ma waŋkac,

¹⁷ cwo abic m'oyido jokidho dwaro nyaliŋliŋ i lowo jobino kenyo to jokwanyo cal ma nyweny, law maleŋ pa jacway ri Were i migam kodi cal m'ilamo. Jacway ri were i wi migam oyido ocungo kenyo i dhiot ma waŋkac gi cwo 600 ma jotiŋo gilweny.

¹⁸ Munyo cwo me jotundo i ot pa Mika to jokwanyo cal ma nyweny, law maleŋ pa jacway ri were i wi migam kodi cal m'ilamo, jacway ri were i migam openjo jo ni, “Witimo aŋo?”

¹⁹ Jowaco rigo ni, “Liŋ! Kethi cingin i dhokin, aka ikadhi gi wan, aka ibedi riwan bawan kodi jacway ri Were i wi migam. Ber rin k'ibedo jacway ri Were i wi migam i ot pa ŋat'acel, kosa bedo jacway ri Were i wi migam ri nono kosa peco i Isiraili?”

²⁰ Gime osangala cuny jacway ri were i migam. Okwanyo law maleŋ pa jacway ri Were i wi migam, cal m'ilamo kodi cal ma nyweny, to kadho gi ji.

²¹ Jowire kadho, aka joketho nyithindho, mwendi kodi gigipiny pajo yuwiy jo.

²² Munyo jotieko kadho bor ye gi ot pa Mika, cwo m'oyido jonitie i udi cegin gi ot pa Mika jocokere to joyombo jonono pa Dan.

²³ Jokoko ri jonono pa Dan, ma jowire to jopenjo Mika ni, “Aŋo marac m'ibino gi lwak ji me?”

²⁴ Mika odwoko ni, “Wikwanyo werin paran m'atimo, kodi jacway ri Were i wi migam, to wikadho, aka onyo adoŋ g'aŋo? Onyo doko winyalo penjan nedi ni, ‘Aŋo marac?’ ”

²⁵ To jonono pa Dan jowaco rigo ni, “Diber k'ibedo ma dwondin k'owinjere i dier wan, ka k'obedo ameno jogero jolamonjin, t'ikeŋ kwo perin gi kwo ma peco perin je.”

²⁶ Kenyo jonono pa Dan jokadho i yo pajo. Munyo Mika oneno ni jotek loyo go, owire to dok peco pere.

²⁷ Jonono pa Dan, jokwanyo gima Mika oyido otieko timo, aka jacway ri Were i wi migam m'oyido obedo apere, obino Layis, bongi ji ma josiem, ma jongoye gi teko, joneko jo, to jowaŋo tindi pajo madwoŋ gi mac.

²⁸ Oyido ongoye ŋat'obothi jo, kwoŋbedo oyido bor wok Sidon aka oyido ongoye gi gir'atima gi joman. Oyido nitie i milelo m'obedo apa Bethrehob. Jogeto tindi madwoŋ, to jobed'iye.

²⁹ Jolwoŋo nyingi tindi madwoŋ no ni Dan, gi nyingi Dan kwari jo, m'onywol ri Isiraili; to nyingi tindi madwoŋ no oyido con mere obedo Layis.

³⁰ Kenyo jonono pa Dan jojengo cal rijo wegi. Yonathan wod pa Gerisom, nyakwar Manase kodi wote oyido jobedo jocway ri were i wi migam ri jonono pa Dan cuka tundo hongo ma piny no okadho i twec.

³¹ Jojengo i kabedo rijo wegi cal pa Mika m'oyido otieko timo, i hongo je ma Ot pa Were obedo i Silo.