Jothum Banja 11 - KITAWO MALEŊ Catholic

Yefitha

¹ Onyo Yefitha Jagiliad oyido obedo wod malaya, aka jalweny ma jameni. Giliad oyido obedo bamere.

² Cipa Giliad onywolo rigo wote ario, aka munyo wote no jodongo, joriemo woko Yefitha, ka jowaco rigo ni, “Ikilalunjo gimoro je i ot pa bawan, kole ibedo wod dhako man.”

³ Yefitha oringo kwoŋ wutmin aka obedo i lowo ma Tob; aka koro cwo ma bukony jocokere thoko Yefitha to jowotho gi go.

⁴ Rumacen ma hongo moro Joamon jotugila lweny kwoŋ Joisiraili.

⁵ Munyo Joamon jocako lweny gi Joisiraili, jodongo ma Giliad jokadho omo Yefitha wok i Tob.

⁶ Jowaco ri Yefitha ni, “Biye bedi jamituka mawan, ŋey walweny gi Joamon.”

⁷ Yefitha odwoko jodongo ma Giliad ni, “Cango wikidakan to wirieman wok i ot pa baba? Raŋo onyo wibino bongan pama munyo winitie i teko?”

⁸ Jodongo ma Giliad jowaco ri Yefitha ni, “Riameno wawire bongin, ŋey inyal kadho gi wan lweny gi Joamon. Ilabedo jatel mawan kwoŋ ji je ma jobedo i Giliad.”

⁹ Yefitha owaco ri jodongo ma Giliad ni, “Ka wikelan peco lweny gi Joamon, aka Rwoth omiy jo i cingan, alabedo jatel mewin.”

¹⁰ Jodongo ma Giliad jodwoko Yefitha ni, “Rwoth labedo jakony i dier wan, walatimo adieri paka iwaco.”

¹¹ Kenyo Yefitha okadho gi jodongo ma Giliad, aka ji joketho go bedo jatel pajo kodi jamituka pajo. Yefitha oluwo wac pere je ruwaŋ Rwoth i Mizipa.

¹² Yefitha ooro jomikwenda bongi kere pa Joamon penjo ka waco ni, “Aŋo manitie i dier an kodin, m'ibino bongan lweny i lowo paran?”

¹³ Kere pa Joamon odwoko jomikwenda pa Yefitha ni, “Kwoŋbedo Joisiraili jomayan lowo paran, munyo wok i piny Misir, cako i Arinon tundo i Yabok kiri Yordan; onyo riameno, dwoki i siem.”

¹⁴ Yefitha kendo ooro jomikwenda bongi kere pa Joamon.

¹⁵ Go owaco ni, “Yefitha waco, Joisiraili jok'okwanyo lowo pa Jomowab kosa lowo pa Joamon.

¹⁶ To munyo Joisiraili jowok i Misir joluwo i thim tundo kiri i Nam M'obokere, aka jobino i Kades.

¹⁷ Joisiraili jooro jomikwenda bongi kere ma Edom ka jowaco ni, ‘Weyi waluw i lowo perin.’ To kere ma Edom k'onyalo winjo. Jooro bende bongi kere ma Mowab, to go bende kwero yeyo. Ameno Joisiraili jodoŋ i Kades.

¹⁸ Joluwo i thim, aka jothoko lowo ma Edom kodi lowo ma Mowab, jotundo yuwok ceŋ ma Mowab, aka joketho kambi i thenge ca ma Arinon; to jok'obino i kew gi Mowab, kole Arinon am'oyido obedo kew gi Mowab.

¹⁹ Joisiraili jooro jomikwenda bongi Sihon kere pa Joamor, kere ma Hesibon ni, ‘Weyi waluw i lowo perin tundo i kabedo mawan.’

²⁰ To Sihon k'onyalo geno Isiraili luwo iy'adec pere; ameno Sihon ocoko ji pere kanyacel to joketho kambi i Yahaz lweny gi Isiraili.

²¹ Rwoth, Were pa Isiraili omiyo Sihon kodi ji pere je i cingi Isiraili, aka jokengila jo. Ameno Isiraili olunjo lowo je pa Joamor, m'oyido jobedo i piny no.

²² Jolunjo adec je pa Joamor, wok i Arinon tundo i Yabok kodi wok i thim tundo i Yordan.

²³ Aka onyo, Rwoth, Were pa Isiraili, otieko kikengila Joamor ruwaŋ ji pere Isiraili, in onyo ilariemo woko jo?

²⁴ Wikilalunjo gima were mewin Kemos miyo win lunjo? Kisi ŋata Rwoth, Were mawan oriem ruwaŋ wan, meno walalunjo.

²⁵ Onyo in iber loyo Balak wod pa Zipor ma Mowab? Go otemo ye kwinyo Isiraili kosa lweny gi jo?

²⁶ K'inen Isiraili obedo i Hesibon kodi calin mere, Arower kodi calin mere, kodi i tindin madongo je m'oyido nitie thengi malawa Arinon ma oro 300; raŋo wikiomo i hongo no?

²⁷ An aŋat'akitimo reco kwoŋin, to in iŋat'itimo ran raco gi lwenyo kwoŋan. Weyi Rwoth, jathum banja, wothum banja ndelo me i dier Joisiraili kodi Joamon.”

²⁸ To kere pa Joamon k'owinjo mikwenda pa Yefitha m'odhiro rigo.

²⁹ Kenyo cuny pa Rwoth opie kwoŋ Yefitha, aka go oluwo i Giliad kodi Manase, omedere kiri Mizipa i Giliad, aka wok i Mizipa okadho kiri bongi Joamon.

³⁰ Yefitha otimo cikirok ri Rwoth, ka waco ni, “K'adieri inomiy Joamon i cingan,

³¹ ŋat'owok i dhiot ma ot paran romo kodan, k'adwoko wok i lweny gi Joamon, alamiyo go paka cowirok awaŋa rin.”

³² Yefitha oŋado lweny gi Joamon, aka Rwoth omiyo Joamon i cingi go.

³³ Yefitha oneko jo wok i Arower kiri i ger gi Minith, tindin madongo piero ario, bor kiri Abel Keramim. Ameno okengila Joamon ruwaŋ Joisiraili.

Nyar Yefitha

³⁴ Yefitha odwoko peco i Mizipa wok i lweny, aka panen, nyare owok romo gi go gi sasi gi miel. Go oyido obedo nyathi pere kende. Yefitha oyido ongoye gi wode kosa nyare man.

³⁵ Munyo Yefitha oneno nyare, Yefitha oyeco woko nangin pere to waco ni, “Awi, nyaran! Idwokan piny adieri; itieko lokirok ran teko madwoŋ. Kole atieko yawo dhokan ri Rwoth, aka akinyali umo kendo.”

³⁶ Nyare odwoko go ni, “Baba, itieko yawo dhokin ri Rwoth, tim ran paka dhokin owaco, paka nyo Rwoth otieko miyin loyo kwoŋ jokwor perin, Joamon.”

³⁷ Go owaco ri bamere ni, “Weyi otim ran gime. Weyi akadhi ma dwe ario abedi i kumo ri bedo nyako paran mambula wi gote, an kodi merin paran.”

³⁸ Yefitha odwoko ni, “Kadhi.” Kenyo Yefitha oweyo go kadho ma dwe ario, go kodi merin pere, aka oywaki kwoŋbedo nyako pere mambula wi gote.

³⁹ I gike ma dwe ario, go odwoko bongi bamere, m'otimo gi go paka go ociko. Go oyido fodi k'onindo gi jacwo. Ameno thenethene otwi i Isiraili nike

⁴⁰ ma ndelo aŋwen kisi oro nyir ma Isiraili jokadho to joywak ma poyo nyar Yefitha ma Giliad.