Jothum Banja 10 - KITAWO MALEŊ Catholic

Tola kodi Yayir

¹ Rumacen pa Abimelek, Tola wod pa Puwa, aka nyakwar Dodo, janono pa Isakar oay thielo Isiraili. Go oyido bedo i Samir i piny matendere Efrayim.

² Go obedo jathum banja i Isiraili ma oro piero ario g'adek. Kenyo go otho aka oyiki go i Samir.

³ Rumacen pa Tola, Yayir ma wok i Giliad obedo jathum banja i Isiraili ma oro piero ario g'ario.

⁴ Yayir oyido nitie gi wote piero adek m'oyido jogweyo punde ma mon, wote oyido jonitie gi tindin madongo piero adek, m'ilwoŋo ni Havoth Yayir kiri konon, aka jonitie i lowo ma Giliad.

⁵ Yayir otho, aka oyiki go i Kamon.

Joisiraili jotimo reco kwoŋ Rwoth

⁶ Joisiraili kendo jotimo reco ruwaŋ Rwoth, aka jolamo Bal kodi Asitate were madhako, werin pa Josiria, werin pa Josidon, werin pa Jomowab, werin pa Joamon, kodi werin pa Jofilistia. Jojwango Rwoth, aka jok'olamo go.

⁷ Nge pa Rwoth oliel kwoŋ Joisiraili, aka ojwango jo i cingi Jofilistia kodi Joamon.

⁸ I oro no joŋidho to jodiyo Joisiraili. Ma oro apar g'aboro jodiyo Joisiraili je m'oyido jonitie kalo malawa Yordan i lowo pa Joamor, manitie i Giliad.

⁹ Joamon joŋado Yordan lweny gi nono pa Yuda, nono pa Benyamin kodi nono pa Efrayim; ma Joisiraili jobedo i litho madwoŋ swa.

¹⁰ Joisiraili joywak ri Rwoth ka jowaco ni, “Watieko timo reco kwoŋin, kwoŋbedo wajwango Were mawan to walamo Bal.”

¹¹ Rwoth owaco ri Joisiraili ni, “Akibotho win kwoŋ Jomisir, Joamor, Joamon, kodi Jofilistia?

¹² Josidon bende jok'odiyo win, to wiywak ran, aka abotho win wok i cingi jo.

¹³ Kucel witieko jwangan aka wilamo werin man; riameno akilamedo botho win.

¹⁴ Kadhi wiywak win ri werin ma witieko yero; weyi jowobothi win wok i litho mewin.”

¹⁵ Joisiraili jowaco ri Rwoth ni, “Watieko timo reco; tim riwan gimaber rin je, to mondo both wan ndelo me!”

¹⁶ Ameno jokwanyo woko werin makicar je m'oyido nitie i dier jo, aka jolamo Rwoth. Kenyo Rwoth k'onyalo ciro neno Isiraili ka candere.

¹⁷ Kenyo olwoŋi Joamon lweny, aka joketho kambi i Giliad, aka Joisiraili jocokere kanyacel to joketho kambi i Mizipa.

¹⁸ Jomituka pa ji ma Giliad jopenjo ni, “Ŋa ma lacako lweny kwoŋ Joamon? Ŋat'otim bino bedo jatel pa ji je ma jobedo i Giliad.”