Joroma 6 - KITAWO MALEŊ Catholic

Tho ro reco to bedo gi kwo i riwirok gi Kristo

¹ Onyo wawaci nedi? Nike wamedere gi timo gimarac aka ŋey nema pa Were bende womedere?

² K'ameno be! K'inen watieko tho ma nyutho kwero gimarac, wanyalo nedi doko medirok gi timo gimarac?

³ Kole adieri wiŋeyo gime ni: Munyo walimo batisimo i riwirok gi Kristo Yesu, walimo batisimo i riwirok gi tho pere bende.

⁴ Riameno, batisimo mawan nyutho ni oyiki wan bende gi Yesu kendo wariwere gine i tho pere, ŋey paka Kristo ocerino kwoŋ jom'otho ro meni pa Bamere M'oasere, ameno bende wanyalo bedo i kwo manyen.

⁵ Ato ka wariwere gi Yesu i tho paka go otho, meno bende apaka wabino riwere gine i cerino ma cale apere.

⁶ Aka waŋeyo ni kwo mawan macon otiek neko gi Kristo wi musalaba, ŋey meni ma miyo del timo gimarac wonyali rere woko, aka ŋey wakiri wadoko wabedi ŋecin pa gimarac.

⁷ Kole ka dhano otho meno otiek gonyo go kwoŋ meni ma gimarac.

⁸ Aka ka watieko tho gi Kristo, wan gi yeyo nike bende wabino kwo gine.

⁹ Kole waŋeyo ni Kristo ocerino kwoŋ jom'otho aka kilatho kendo; tho ongoye gi meni kwoŋe kende.

¹⁰ Tho ma go otho oyido obedo tho ma kwero gimarac dicel makicutho; aka kwo ma go onyo nitie gine obedo ri Were.

¹¹ I royo acel wibende wiripo tere paka jom'otieko tho ma nyutho kwero gimarac aka onyo jokwo ri Were i Kristo Yesu.

¹² Gimarac odoko wokiri wodhum i delkwoŋ win ma tho me, kareno witimo gim'awanya mere yenyo.

¹³ Odoko wikiri wimiy gimarac adec ma delkwoŋ win moro woor i timo kidakana, kucel miy win Were kwo mewin, paka ji m'okwany jo i tho t'ikelo jo i kwo, aka miy win go kwo mewin gipi woor i atoŋa m'otire.

¹⁴ Gimarac wokiri wodhum win paka onyo wikibedi i meni pa cik, to i nema pa Were ayino.

Ŋecin pa tiro

¹⁵ Kere onyo aŋo m'odoŋ? Watim reco ni rupiri wakinitie i meni pa cik to i nema pa Were ayino? Be!

¹⁶ Wikuya nike ka wimiyere paka ŋecin ma winjo nyatoro, meno adieri wibedo ŋecin pa rwoth ma wiwinjo no, kosa apa gimarac ma kelo tho, kosa apa winjo Were ma kelo riwin tiro i waŋe?

¹⁷ To Were wofoy ni yado oyido wibedo ŋecin pa gimarac, to pama wiwinjo adieri m'ifonjo win gi cuny win je.

¹⁸ Aka paka otiek gonyo win woko kwoŋ gimarac, pama onyo wilokere ŋecin pa tiro.

¹⁹ Aoro wac manyadhanodhano ro nyapo ma winigine ma niaŋ. Paka yado oyido wimiyere ibedo ŋecin pa kidakana, kodi turo cik pa Were, onyo pama bende wiripo miyirok paka ŋecin pa tiro ri atoŋa ma lonyo.

²⁰ Munyo oyido wibedo ŋecin pa gimarac, oyido wingoye i tiro.

²¹ Onyo bero aŋo ma wilimo i timo gigipiny ma kelo riwin wickwot? Kole gima wok i gigipiny no obedo tho!

²² To paka onyo otiek theko win gi gimarac to wibedo ŋecin pa Were, bero ma winigine onyo obedo lonyo, ma i gike bino miyo wilimo kwo makirum.

²³ Kole kemba pa gimarac obedo tho; to mic ma Were miyo wan obedo kwo makirum i Kristo Yesu Rwoth mawan.