Joroma 15 - KITAWO MALEŊ Catholic

Sangala jowotin makiweno wiwegi

¹ Wan ma wategino i yeyo waripo konyo joma nyap gi tiŋo bieto pajo. Kiripi ka wawegi wamiyere kisangala.

² Kucel, ŋat'acel acele kwoŋ wan ripo miyo jager pere kisangala ma konyo go, ŋey wodongi ŋato i yeyo.

³ Kole Kristo won k'omiyere kisangala. Kucel, obedo paka ondiki ni, “Yet ma jono joyetin gine omakan ayino.”

⁴ Kole gimoro je m'ondiki i kitawo maleŋ ondiki ma fonjo wan, ŋey walimi geno i diyo cuny kodi i meni ma Ndiko Maleŋ miyo wan.

⁵ Weyi Were ma jadiy cuny ji kendo jadwoki meni, womiy winyal bedo kanyacel i siem, munyo wiluwo ranen pa Yesu Kristo,

⁶ aka nyaka wijoje kanyacel, gi dwondi win acel, winyal pako Were kodi Ba Yesu Kristo Rwodhiwan.

Wac Manyen Maber ri Jopath

⁷ Am'omiyo jolere win paka Kristo ojolo wan, ma miyo Were dwoŋ.

⁸ Kole awaco riwin ni Kristo olokere jatic pa jom'othumere (Joyuda) ma nyutho nike Were genere, ma miyo cikirok pa Were m'otimo gi kwarere wan wotundi i kare,

⁹ bende gi miyo Jopath pako Were ro wor pere, paka ndiko waco ni, “Am'omiyo abino kethin walwa i dier Jopath, Abino wero munyo apako nyingin.”

¹⁰ Odoko waco ni, “Sangala win, wi Jopath, kanyacel gi ji pa Were m'oyer.”

¹¹ Odoko waco ni, “Paki win Rwoth, win Jopath je!” Aka weyi nonin je jowopaki go.

¹² Odoko Isaya waco ni, “Nyakwar Yese labino; Ibino tiŋo go malo wodhum Jopath, Aka Jopath jobino ketho geno pajo i go.”

¹³ Were ma geno wok bonge wonyali poŋo win gi kisangala je kodi siem cungo kwoŋ yeyo mewin, ŋey geno mewin womedere dongo gi meni pa Cuny Maleŋ.

Atoŋa m'omiyo Paulo ondiko gi miseni

¹⁴ Wutmera, awon anitie gi geno kwoŋ win, nike withoth gi bero, nike wipoŋ gi rieko, aka wiwegi winyalo fonjo jowoti win.

¹⁵ To kad'ameno, i balwa m'atieko ndiko riwin, abedo gi miseni kwoŋ gigipiny moro ma apoyo win, ro nema ma Were opokan

¹⁶ ma bedo jatic pa Kristo Yesu ma tiyo ri Jopath. Atiyo paka jacway ri Were i migam kareno atito Wac Manyen Maber ma wok bongi Were, ŋey Jopath jowobedi mic ma Were jolo, ma Cuny Maleŋ olonyo rigo.

¹⁷ Am'omiyo, i Kristo Yesu, anyalo bedo g'atoŋa ma yumirok gi tic paran ri Were.

¹⁸ Aka akibino yumirok gi giman makiweno gima Kristo otieko timo munyo oran i miyo Jopath winjo Were, gi wac kodi tim,

¹⁹ gi meni ma wok'iye ranyuth kodi gir'aura, gi meni pa Cuny Maleŋ pa Were. Gino omiyo kama awoth'iye je, cako Yerusalem tundo Ilirikam, atieko tito Wac Manyen Maber kwoŋ Kristo kicutho.

²⁰ Am'omiyo gim'asa yenyo timo obedo tito Wac Manyen Maber kama fodi k'owinj'iye kwoŋ Kristo, ŋey akir'alwowere kwoŋ tic ma ŋatiman otieko cako.

²¹ Ato ndiko waco ni, “Joma fodi k'owaci rijo kwoŋ go jobino neno, aka joma fodi jok'owinjo jobino niaŋ.”

Paulo cano kidho wendo yu Roma

²² Meno a gim'onwaŋo omonan ndir madit bino bongi win.

²³ To paka acowo tic paran iy'adec me, odoko paka atieko yenyo bino neno win oro mathoth,

²⁴ onyo ageno timo ameno pama. Amito neno win ka amako royo ma kidho yu Sipeyin, winyal konyan i nger ma kidho koro, k'atieko ye kisangala i liewo win hongo m'oromo.

²⁵ Gunyo ni, akidho Yerusalem tiyo ri ji pa Were koro.

²⁶ Kole kitipa pa jom'oyeyo ma Makedonia kodi piny pa Jogris joridho paro ma miyo mic ma konyo jocandi i dier ji pa Were ma Yerusalem.

²⁷ Jo wegi joridho timo ameno; aka i adieri joripo konyo jo; kole Joyuda jopoko silwany pajo kodi Jopath, am'omiyo Jopath bende joripo konyo Joyuda gi silwany pajo ma gigipiny ma piny.

²⁸ K'acowo tic me, kareno atieko tero rijo pesa m'ocoki rijo, nyaka abino mako yo ma kidho Sipeyin, t'aliewo win k'akidho yukorago.

²⁹ K'abino bongi win, aŋeyo ni alabino gi silwany pa Kristo m'opoŋ.

³⁰ Wutmera, agoyo riwin koko, i Rwoth Yesu Kristo kodi kwoŋ mar pa Cuny Maleŋ; riwere win kodan i kwayo m'ocwiny bongi Were,

³¹ nike go wokuran i bero kwoŋ joma jok'oyeyo i Yuda, ŋey ji pa Were jowojoli tic paran i Yerusalem.

³² Am'omiyo alabino bongi win gi kisangala m'opoŋ, k'obedo mito pa Were, kareno awinjo siem i wendo paran bongi win.

³³ Were ma kelo riwan siem wobedi kodi wijoje. Ameno.