Joroma 14 - KITAWO MALEŊ Catholic

Wikiri withum banja ri omin win

¹ Joli win i dier win ŋata nyap i yeyo; to wikiri wipiem gine kwoŋ paro pere.

² Yeyo pa ŋat'acel yeyo go camo gimoro je, to ŋata nyap i yeyo camo fufa aŋweta kende.

³ Ŋata camo gimoro je wokiri wocayi dhano ma kitim ameno; aka ŋata camo fufa kende wokiri wothum banja ri ŋata camo gimoro je, kole Were otieko jolo go.

⁴ In iŋa m'ithumo banja ri jatic pa ŋatiman? Rwoth pere won ama nyalo ridho paka go tiyo maber kosa ma kiber odoco. Aka bino konyo go wocungi, rupiri Rwoth nyalo miyo go cungo matek.

⁵ Ŋat'acel paro ni ndelo acel loyo ndelo man je, kareno ŋatiman paro ni ndelo je rom. Dhano je ripo bedo gi paro pere m'oridho matek.

⁶ Ŋata paro kwoŋ ndelo moro ni loyo nyawote timo ameno ka miyo Rwoth dwoŋ, ŋata camo gimoro bende timo ameno ka miyo Rwoth dwoŋ, rupiri go foyo Were ro cemo no. Onyo ŋata kwero camo gigipiny moro bende timo ameno ma miyo Rwoth dwoŋ, aka foyo Were.

⁷ Ongoye moro kwoŋ wan ma won kwo ri wac pere kende; odoko ongoye ma tho rigo won kende.

⁸ Ka wakwo, meno wakwo ri Rwoth odoko ka watho, meno bende watho ri Rwoth. Am'omiyo, kada wakwo kosa watho, je wabedo apa Rwoth.

⁹ Kole Kristo otho to cerino ŋey wobedi Rwoth pa jomakwo kodi jom'otho je.

¹⁰ Onyo raŋo m'ithumo banja ri omerin? Aka in! Raŋo m'icayo omerin? Kole wajoje wabino cungo i nyim Were, go wothum riwan banja.

¹¹ Kole ndiko waco ni, “ ‘Paka akwo,’ Rwoth waco, ‘dhano je bino guro conge i ruwaŋan, Aka dhano je bino tuco ni abedo Were.’ ”

¹² Am'omiyo, dhano je kwoŋ wan bino tito gima mako kwoŋ kwo pere ri Were.

Ikir'imiy omerin wopodhi

¹³ Am'omiyo wawey win thumo banja ri jowoti wan. Kucel, me a gima wiripo ridho: Wikiri witim gimoro je ma miyo nyawoti win cer, kosa podho i gimarac.

¹⁴ Riwirok paran kanyacel gi Rwoth Yesu miyan aŋeyo adieri ni ongoye gimakoc; kwanyo woko ka dhano oyeyo nike gimoro koc aka gino lokere makoc rigo.

¹⁵ K'imiyo nyawotin ramirok ro gim'icamo, meno kere ikitim gino gi mar. Ikir'imiy cemo m'icamo wokel ri nyawotin ma Kristo otho rigo podho.

¹⁶ Ikir'imiy gim'itero paka ber wolimi nyinge marac.

¹⁷ Kole Ker pa Were k'obedo nyaka cemo gi oro gir'amadha, t'obedo tiro kodi siem kodi kisangala i Cuny Maleŋ.

¹⁸ Aka ŋata tiyo ri Kristo i royo me Were jolo, odoko ji bende foyo go.

¹⁹ Am'omiyo, ndir je wakidhi win ri gigipiny ma kelo siem aka konyo wawegi i miyirok meni ayin.

²⁰ Ikir'inyek tic pa Were ro wac cemo. Cemo je nyalo bedo ni olony acama, to kibedi gim'otire camo gimoro ma bino miyo dhano man podho i gimarac.

²¹ Gim'otire a weyo camo riŋo, madho vini, kosa timo gimoro man je ma miyo omerin podho, kosa cunye ŋedhere, kosa lokere manyap i yeyo.

²² In gi yeyo? Ere maki yeyo perin no paka gim'iwon iridho ruwaŋ Were. Jasilwany a ŋata kiwinji banja i cunye ka timo gima go ofoyo!

²³ To ka nyatoro ganagana kwoŋ gima go camo, Were thumo banja loyo go ka ocamo gino, rupiri tim pere k'ocungo kwoŋ yeyo. Aka gimoro je ma k'ocungo kwoŋ yeyo meno reco.