Joroma 10 - KITAWO MALEŊ Catholic

¹ Wutmera, ayenyo gi cunyan je ni ji paran je jowobothi! Neni paka akwayo Were rijo!

² Kole anyalo ridho ni cuny jo omaro Were, to maro pajo kicungi kwoŋ niaŋ m'otire.

³ Fodi jok'oniaŋ royo ma Were keth'iye gi go ji i tiro gine, aka wegi jotieko temo cwogo royo pajo; am'omiyo jok'ojolo royo ma Were keth'iye gine ji i tiro.

⁴ Kole Kristo am'obedo kama Cik gik'iye, ŋey nyaka dhano je ma yeyo wokethi i tiro gi Were.

Both obedo apa ji je

⁵ Musa ondiko kwoŋ wac ma bedo i tiro gi Were i winjo Cik ni, “Ŋata timo gima Cik waco, bino kwo gi Cik.”

⁶ To me a gima ndiko waco kwoŋ ketho dhano i tiro gi Were ro yeyo: “Ikir'iwaci i cunyin ni, ‘Ŋat'oidhi i polo?’ ” (Dwoŋ mere ni dwoko Kristo i piny ka).

⁷ “Kosa ni, ‘Ŋat'olori piny i bur maluth?’ ” (Dwoŋ mere ni kidho cerino Kristo kwoŋ jom'otho.)

⁸ Me a gima Ndiko waco: “Kole wac nitie cegin kodin, i dhokin kodi i cunyin.” (Dwoŋ mere ni wac ma yeyo ma wafonjo.)

⁹ Rupiri k'ituco gi dhokin ni, “Yesu meno Rwoth.” Aka iyeyo i cunyin nike Were ocerino go kwoŋ jom'otho, ibino both.

¹⁰ Ato dhano yeyo gi i cunye to ikwanyo woko banja kwoŋe; aka tuco gi dhoke to limo both.

¹¹ Kole ndiko waco ni, “Moro je ma yeyo go k'onwaŋ wickwot.”

¹² Me mako kwoŋ dhano je, rupiri pokirok ongoye i dier Joyuda kodi Jopath; Were acel am'obedo Rwoth pa ji je, aka go miyo dhano je ma lwoŋo go silwany.

¹³ Kole ndiko waco ni, “Nyatoro je m'olwoŋ nyingi Rwoth bino both”.

¹⁴ To jolwoŋ nedi ŋata fodi jok'oyeyo kwoŋe? Odoko joyey nedi ŋata fodi jok'owinjo wac ma mako kwoŋe? Odoko jowinji nedi m'ongoye ŋat'otito rijo mikwenda?

¹⁵ Aka jotiti nedi mikwenda, ka k'oor jo? Kole ondiki ni, “Bino pa joma kelo Wac Manyen Maber obedo gimaber ma nedi!”

¹⁶ To ki Joisiraili je ma jojolo Wac Manyen Maber. Isaya won owaco ni, “Rwoth, ŋat'oyeyo mikwenda mawan?”

¹⁷ Am'omiyo yeyo wok i winjo mikwenda, aka mikwenda wok i fonji kwoŋ Kristo.

¹⁸ To apenjo, obedo adieri ni jok'owinjo mikwenda? Kole jowinjo paka ndiko waco ni, “Derino ma dwondi jo olak i piny gipi, Wac pajo otundo i tum je ma piny.”

¹⁹ Odoko apenjo, kosa Joisiraili cango jok'oniaŋ? Kole Musa won gipi a marapena dwoko ni, “Abino miyo witim nyeko gi ji ma jok'obedo nono m'otire. Abino miyo win nge gi ji mamiŋ.”

²⁰ Aka Isaya nigi miseni madwoŋ ka waco ni, “Jom'onwaŋo jokirangan ama jonwaŋan; Amenyere ri jom'onwaŋo jokipenjan kada.”

²¹ To ma mako kwoŋ Isiraili go waco ni, “Atiŋo cingan malo ndelo gipi ri ji ma jocay kendo ma jopiem.”