Jolevi 4 - KITAWO MALEŊ Catholic

Mic ma cwako reco

¹ Rwoth oluwo gi Musa, ka waco ama:

² Luw gi Joisiraili iwaci rijo ni: Ka moro otimo reco ma k'oŋeyo to turo or pa Rwoth moro je, gi timo acel kwoŋ gigipiny ma kiripi timo.

³ Ka jacway ri Were i wi migam m'owir gi mo am'otimo reco, to kelo banja kwoŋ ji, go lamiyo rwath m'ongoye gi ŋolo paka mic ma cwako reco ri Rwoth.

⁴ Go lakelo thwon i dhiot ma wema maleŋ ruwaŋ Rwoth, laketho cinge i wic thwon; aka ilathumo thwon ruwaŋ Rwoth.

⁵ Jacway ri Were i wi migam m'owir gi mo lakwanyo remo moro to kelo i Wema ma romo.

⁶ Jacway ri Were i wi migam lalutho lwet cinge i remo to kiro remo moro dibirio ruwaŋ Rwoth yuwaŋ nanga m'oliero i Kabedo Maleŋ.

⁷ Jacway ri Were i wi migam laketho remo moro i tunge migam ma buban maŋwe kur manitie ruwaŋ Rwoth i Wema ma romo. Aka remo m'odoŋ go lakonjo i tiendi migam ma mic awaŋa, manitie i dhiot ma Wema ma romo.

⁸ Go lawaro woko bor je ma thwon ma mic ma cwako reco; bor je ma umo gigipiny ma iye,

⁹ roge ario je kodi bor mere, kodi adec maber loyo ma cuny,

¹⁰ paka ikwanyo wok i thwon ma cowirok ma siem. Jacway ri Were i wi migam lawaŋo i wi migam ma mic awaŋa.

¹¹ To pien thwon kodi riŋo mere, wic mere, olenge, gigipiny ma iye, kodi woyo mere,

¹² thwon gibe m'odoŋ, go latiŋo woko kam'olony woko ma kambi, kam'idhur'iye buru, aka ilawaŋo gi yen kam'ikonj'iye buru.

¹³ Ka lwak Joisiraili gibe jotimo reco ma jok'ogendera to panere i waŋ jo, to jotimo gimoro acel kwoŋ gigipiny ma or pa Rwoth kwero timo aka jobedi gi banja;

¹⁴ ka joniaŋ rumacen reco ma jotimo, kenyo lwak lakelo rwath ri mic ma cwako reco ruwaŋ Wema ma romo.

¹⁵ Jodongo pa lwak jolaketho cingi jo i wic thwon ruwaŋ Rwoth, aka ilathumo ruwaŋ Rwoth.

¹⁶ Jacway ri Were i wi migam lakelo remo thwon moro i Wema ma romo.

¹⁷ Jacway ri Were i wi migam lalutho lwet cinge i remo to kiro dibirio ruwaŋ Rwoth kodi yuwaŋ nanga m'oliero.

¹⁸ Go laketho remo moro i tunge migam manitie ruwaŋ Rwoth i Wema ma romo. Aka remo m'odoŋ go lakonjo i tiendi migam ma mic awaŋa manitie i dhiot ma Wema ma romo.

¹⁹ Go lawaro woko bor mere je to waŋo i wi migam.

²⁰ Go latimo gi thwon me paka otimo gi thwon ma mic ma cwako reco. Jacway ri Were i wi migam lamiyo mic ma cwako reco pajo, aka ilacwako rijo.

²¹ Go latiŋo thwon me gibe to tero woko ma kambi, aka lawaŋo paka thwon marapena; obedo mic ma cwako reco pa lwak.

²² Ka jadhum otimo reco, ma go k'oŋeyo, to timo acel kwoŋ gigipiny ma or pa Rwoth Were pere kwero to bedo jabanja,

²³ tekin go niaŋ kwoŋe, go lakelo paka mic pere wod diel m'ongoye gi ŋolo.

²⁴ Go laketho cinge i wic diel, aka ilathumo kam'ithum'iye mic awaŋa ruwaŋ Rwoth, paka mic ma cwako reco.

²⁵ Jacway ri Were i wi migam lakwanyo remo moro gi lwet cinge to ketho i tunge migam ma mic awaŋa, aka remo m'odoŋ go lakonjo i tiendi migam ma mic awaŋa.

²⁶ Bor mere je go lawaŋo i wi migam, paka bor ma cowirok ma siem. Ameno jacway ri Were i wi migam lamiyo mic ma cwako reco pere, aka ilacwako rigo.

²⁷ Ka nyatoro kwoŋ ji ma lowo me otimo reco ma k'oŋeyo, gi timo acel kwoŋ gigipiny ma or pa Rwoth kwero, to bedo jabanja,

²⁸ tekin go niaŋ kwoŋe, go lakelo min diel m'ongoye gi ŋolo paka mic, ri reco ma go otimo.

²⁹ Go laketho cinge i wic mic ma cwako reco, aka ilathumo i kabedo ma mic awaŋa.

³⁰ Jacway ri Were i wi migam lakwanyo remo moro gi lwet cinge to ketho i tunge migam ma mic awaŋa. Aka remo m'odoŋ go lakonjo i tiendi migam.

³¹ Go lawaro woko bor mere je, paka waro ma mic ma siem, aka jacway ri Were i wi migam lawaŋo i wi migam ri ŋwece kur mamit ri Rwoth. Ameno jacway ri Were i wi migam lamiyo mic ma cwako reco rigo, aka ilacwako rigo.

³² Ka mic m'ikelo paka mic ma cwako reco obedo rombo, ripo bedo min rombo m'ongoye gi ŋolo.

³³ Ilaketho cingin i wic mic no, aka ilathumo paka mic ma cwako reco kam'ithum'iye mic awaŋa.

³⁴ Jacway ri Were i wi migam lakwanyo remo ma mic ma cwako reco moro gi lwet cinge to ketho i tunge migam ma mic awaŋa. Aka remo m'odoŋ go lakonjo i tiendi migam.

³⁵ Go lawaro woko bor je, paka bor ma wod rombo ma cowirok ma mic ma siem. Jacway ri Were i wi migam lawaŋo i wi migam, paka mic m'iwaŋo ri Rwoth. Ameno jacway ri Were i wi migam lamiyo mic ma cwako reco perin ri reco m'itimo, aka ilacwako rin.