Jolevi 24 - KITAWO MALEŊ Catholic

Kuro talin

¹ Rwoth oluwo gi Musa ka waco ni:

² Miy Joisiraili or ŋey jowokeli rin mo mangil ma yath oliv ri talin, ma lielo talin ma jokitho.

³ Aron wokethi malo i wi Wema ma romo, woko ma nanga m'oliero ruwaŋ Kakan ma Cikirok, woliel wok othieno tundo odikin ruwaŋ Rwoth makitho; aka wobedi cik ma cil gi cil i luse mewin je.

⁴ Go laketho talin i wi raŋaw talin ma zahabu macil ruwaŋ Rwoth makitho.

Mugat m'imiyo Rwoth

⁵ Ilakwanyo moko m'onuŋere, t'ibako muma apar g'ario mere; kisi muma wotim gi kilo ario.

⁶ Ikethi jo i bol ario, aucel i kisi bol, i wi meza ma zahabu macil ruwaŋ Rwoth.

⁷ Ikethi buban macil i kisi bol acel, wobedi paka mic i kawaŋ mugat, paka mic awaŋa ri Rwoth.

⁸ Kisi ndelo ma sabato Aron lacano jo ruwaŋ Rwoth hongo je paka miyirok pa Joisiraili, paka cikirok ma cil gi cil.

⁹ Jolabedo ri Aron kodi nyikwaye, ma jolacamo jo i Kabedo Maleŋ, rupiri jobedo adec maleŋ loyo rigo wok mic awaŋa ri Rwoth, ma cil gi cil.

Ranen ma gir'acula m'otire kodi madhedhe

¹⁰ Jal moro ma min oyido obedo Jaisiraili aka bamere oyido obedo Jamisir ofudhere i dier Joisiraili; to cako gorok gi Jaisiraili moro i kambi.

¹¹ Okewo pa Joisiraili oluwere kicar kwoŋ Were kalamo Were. To jokelo go bongi Musa, aka nyingi min oyido Selomith, nyar Dibiri, janono pa Dan.

¹² Okethi go i twec, cuka Rwoth oyawo rijo paro pere.

¹³ Rwoth oluwo gi Musa ka waco ama:

¹⁴ Woth woko jaluwirok kicar kwoŋ Were no woko ma kambi; aka weyi jono je ma jowinjo munyo lamere jowokethi cingi gin i wiye, aka weyi cokirok gibe jowocadhi go gi telin.

¹⁵ Aka luw gi Joisiraili, i wac rijo ni: Nyatoro moro je m'olam Were latiŋo reco pere.

¹⁶ Ŋat'oluwere kicar kwoŋ nyingi Rwoth, latho adieri, cokirok gibe lacadho go gi telin adieri. Jokicar kanyacel gi jopiny, ka joluwere kicar i nyingi Rwoth, ibino neko go.

¹⁷ Nyatoro moro je m'oneki dhano, ilaneko go adieri.

¹⁸ Nyatoro moro je m'oneki ogwaŋ ripo culo, kwo ri kwo.

¹⁹ Nyatoro moro je m'omiy nyawote ŋolo, paka go otimo bende wotim rigo nger no.

²⁰ K'oturo coko, wotur coko pere bende, k'ofudho waŋ dhano, wofudhi waŋe bende, k'omuko lak dhano, womuki lake bende, nger ŋolo ma go omiyo nyawote, ama bende womiy go.

²¹ Nyatoro moro m'oneki ogwaŋ ripo culo; to nyatoro m'oneki dhano, iripo neko.

²² Wibedi gi cik acel ri jakicar kodi ri japiny: Kole An abedo Rwoth Were mewin.

²³ Musa oluwo ameno ri Joisiraili; to jowodho woko jaluwirok kicar kwoŋ nyingi Were woko ma kambi, to jocadho go gi telin cuka otho. Ji ma Isiraili jotimo paka Rwoth oyido owodho or ri Musa.