Jolevi 18 - KITAWO MALEŊ Catholic

Nger weco m'okwer

¹ Rwoth oluwo gi Musa ka waco ama:

² Luw gi Joisiraili aka iwaci rijo ni: An abedo Rwoth Were mewin.

³ Wikiri witim paka ji ma piny Misir kama cango wibed'iye jotimo, aka wikiri witim paka ji ma Kanan jotimo, kam'ater'iye win. Wikiri wiluw cik pajo.

⁴ Kur win or paran kodi luwo cik paran, wiwoth i jo: An abedo Rwoth Were mewin.

⁵ Wikuri cik paran kodi or paran; ka witimo ameno, wilakwo: An abedo Rwoth.

⁶ Wongoye moro kwoŋ win ma wocore bongi wat pere yawo kinyoro pere. An abedo Rwoth.

⁷ Ikir'iyaw kinyoro pa benin, kosa kinyoro pa yokin; go obedo yokin, ikir'inindi gi go.

⁸ Ikir'iyaw kinyoro pa cipa benin; meno obedo kinyoro pa benin.

⁹ Ikir'iyaw kinyoro pa nyamin in, nyar benin kosa nyar yokin, obedi ni onywol peco kosa wiloka.

¹⁰ Ikir'iyaw kinyoro pa nyakwarin mapa wodin kosa mapa nyarin, rupiri kinyoro pajo obedo kinyoro perin won.

¹¹ Ikir'iyaw kinyoro pa nyar benin, meno obedo nyamin in, ma benin am'onywolo.

¹² Ikir'iyaw kinyoro pa wayin, go obedo wat pa benin macegin.

¹³ Ikir'iyaw kinyoro pa nyamin yokin, rupiri go obedo wat pa yokin macegin.

¹⁴ Ikir'iyaw kinyoro p'omin benin, ikir'icore bongi cege, go obedo wayin.

¹⁵ Ikir'iyaw kinyoro pa ciwodin, go obedo cipa wodin; ikir'inindi gi go.

¹⁶ Ikir'iyaw kinyoro pa cipa omin in; meno bedo kinyoro p'omin in.

¹⁷ Ikir'iyaw kinyoro pa dhako gi nyare je; aka ikir'inywom nyakware mapa wode kosa nyakware mapa nyare; jobedo wat pere macegin; meno bedo kidakana.

¹⁸ Ikir'inywom nyamin dhako perin, bedo nyek nyamin, yawo kinyoro pere kafodi nyamin go kwo.

¹⁹ Ikir'icore cegin gi dhako yawo kinyoro pere i koco pere ka ruko dwe.

²⁰ Ikir'inindi gi cipa wat perin, t'iloko kwo perin makoc gi go.

²¹ Ikir'imiy nyathi perin kad'acel paka cowirok ri were Molek, aka wikiri wikoci nyingi Were mewin: An abedo Rwoth.

²² Ikir'inindi gi jacwo nyawotin paka gi dhako; obedo mienirok.

²³ Ikir'inindi g'ogwaŋ moro je t'iloko kwo perin makoc gine, aka dhako moro bende wokiri womiy kwo pere ri ogwaŋ nindo gine; obedo nywowirok.

²⁴ Wikiri wilokere makoc i gimoro je kwoŋ me, rupiri i tim me je nonin m'acegin riemo woko ruwaŋ win jotieko kocere gine.

²⁵ Ameno lowo olokere makoc; t'amiyo go gir'acula ro reco mere, aka piny oŋoko woko ji ma jobed'iye.

²⁶ Riameno wiripo kuro cik kodi or paran aka wikiri witim gigipiny ma mienirok me kad'acel, obedi japiny kosa jakicar ma bedo i dier win

²⁷ (kole ji ma jotelo bedo riwin i lowo no jotimo gimienirok me je, to joloko lowo makoc)

²⁸ ka k'obedo ameno, piny laŋoko win woko ro koco go, paka oŋoko woko nonin ma jopen bed'iye riwin.

²⁹ Rupiri ŋat'otim kad'acel kwoŋ gimienirok me, lapokere woko kwoŋ ji pere.

³⁰ Riameno kur win cik ma wikitimo kad'acel kwoŋ kula ma mienirok me m'otimi mafodi win, aka wikiri wikocere gi jo: An abedo Rwoth Were mewin.