Jolevi 17 - KITAWO MALEŊ Catholic

Leŋo ma remo

¹ Rwoth oluwo gi Musa ka waco ama:

² Luw gi Aron kodi wote kodi Joisiraili je aka wac rijo ni: Me a gima Rwoth omiyo or ka waco ama:

³ Ka nyatoro moro ma ot pa Isiraili othum merikwa kosa wod rombo kosa diel i kambi, kosa woko ma kambi,

⁴ to weyo ma k'okelo i dhiot ma Wema ma romo, miyo paka mic ri Rwoth ruwaŋ kabedo pa Rwoth, labedo gi banja ma oyo remo; aka go lapokere woko kwoŋ ji pere.

⁵ Ŋey Joisiraili jowokeli cowirok pajo m'oyido jomiyo i sa kam'othangere, to jomiyo Rwoth, bongi jacway ri Were i wi migam i dhiot ma Wema ma romo, to jomiyo paka mic ma siem ri Rwoth.

⁶ Jacway ri Were i wi migam lakiro remo kwoŋ migam pa Rwoth manitie i dhiot ma Wema ma romo, to jowaŋo bor ri ŋwece kur mamit ri Rwoth.

⁷ Aka ŋey jokiri jowomiy cowirok pajo ri jwogi diegi, ma jokocere gine. Me wobedi cik rijo cil gi cil i luse pajo je.

⁸ Aka wac rijo kendo ni: Nyatoro moro je ma ot pa Isiraili kosa jokicar ma jobedo i dier jo m'omiy mic awaŋa kosa cowirok,

⁹ to weyo ma k'okelo i dhiot ma Wema ma romo, miyo paka cowirok ri Rwoth, lapokere woko kwoŋ ji pere.

Camo remo m'ocer

¹⁰ Ka nyatoro moro je ma ot pa Isiraili kosa jokicar ma jobedo i dier jo ocamo remo moro je, alacomo waŋan kwoŋ ŋato m'ocami remo, t'apoko go woko kwoŋ ji pere.

¹¹ Rupiri kwo ma del nitie i remo; aka atieko miyo go riwin ma timo cowirok ma cwako reco ri kwo mewin i wi migam; kole paka kwo, obedo remo ama timo cowirok ma cwako reco.

¹² Riameno atieko waco ri Joisiraili: Ongoye dhano kwoŋ win ma wocam remo, kosa jakicar moro je ma bedo i dier win ma wocam remo.

¹³ Aka nyatoro moro je kwoŋ Joisiraili, kosa jokicar ma jobedo i dier jo, ma jadwar m'oneki ogwaŋ kosa winyo m'icamo, lakonjo woko remo mere to umo gi lowo.

¹⁴ Rupiri kwo pa cwec moro je, nitie i remo mere; riameno atieko waco ri Joisiraili ni: Jokiripi camo remo cwec moro je, rupiri kwo pa kisi cwec obedo remo mere; ŋat'ocami lapokere woko kwoŋ ji pere.

¹⁵ Dhano moro je, jopiny kosa jokicar, m'ocami gima won otho kende kosa gim'ogwaŋe mager joneko, ripo lwoko nangin pere, to lwokere gi pi, aka go labedo makoc tundo othieno; nyaka to lony.

¹⁶ To ka go k'olwoko jo, kosa k'olwokere, go latiŋo reco pere.