Jolevi 15 - KITAWO MALEŊ Catholic

Koco ma tuti macwer wok i delkwoŋ jo

¹ Rwoth oluwo gi Musa kodi Aron, ka waco ni:

² Luw win gi Joisiraili aka wiwaci rijo ni, “Ka nyatoro moro je nitie gi tuti macwer wok kwoŋe, tuti loko go makoc.

³ Koco macwer tuti pere obedo me: Obedi ni kwoŋe cwer tuti, kosa kwoŋe ocungo cwer tuti, obedo koco rigo.

⁴ Kisi kitanda moro je ma ŋata cwero tuti onind'iye labedo makoc; aka kisi gimoro je ma go obed'iye labedo makoc.

⁵ Nyatoro moro je m'ogey kitanda pere ripo lwoko nangin pere, to lwokere gi pi, aka labedo makoc tundo othieno.

⁶ Ŋat'obedi i wi gimoro je ma ŋata cwero tuti obed'iye ripo lwoko nangin pere, to lwokere gi pi, aka labedo makoc tundo othieno.

⁷ Ŋat'ogey delkwoŋ ŋata cwero tuti ripo lwoko nangin pere, to jolwokere gi pi, aka labedo makoc tundo othieno.

⁸ Ka ŋata cwer tuti oŋuli law kwoŋ ŋat'olony, kenyo go ripo lwoko nangin pere, to lwokere, aka labedo makoc tundo othieno.

⁹ Kwot gal moro je ma ŋata cwero tuti obed'iye labedo makoc.

¹⁰ Dhano moro je m'ogey gimoro je manitie i ŋange labedo makoc tundo othieno, aka dhano moro je m'otiŋ nger gino ripo lwoko nangin pere, to jolwokere gi pi, aka labedo makoc tundo othieno.

¹¹ Ŋatimoro je ma ŋata cwero tuti ogey ma k'ologo cinge, ripo lwoko nangin pere, to lwokere gi pi, aka labedo makoc tundo othieno.

¹² Atawo ma lowo moro je ma ŋata cwero tuti ogey iripo baro woko; aka kisi atawo ma yath iripo lwoko gi pi.”

¹³ “Ka ŋata cwer tuti olony kwoŋ tuti pere, go ripo kwano ndelo abirio ma lonyirok pere; aka ma ridho lonyo pere, go lalwoko nangin pere to lwokere i waŋ pi ma mol, aka labedo lony.

¹⁴ I ndelo mar'aboro go latero akurin ario kosa njiwin ario, aka labino ruwaŋ Rwoth i dhiot ma Wema ma romo to miyo jacway ri Were i wi migam.

¹⁵ Jacway ri Were i wi migam lamiyo jo, acel ri mic ma cwako reco kodi acel ri mic awaŋa; to jacway ri Were i wi migam miyo cowirok ma lonyo rigo ruwaŋ Rwoth kwoŋ tuti pere.”

¹⁶ “Ka dhano ojayo, go ripo lwok, delkwoŋe gibe gi pi, aka labedo makoc tundo othieno.

¹⁷ Nanga moro je kosa pien ma go ojayo iye iripo lwoko gi pi, aka labedo makoc tundo othieno.

¹⁸ Ka jacwo onindo gi dhako to jayo, joje joripo lwoki gi pi, aka jolabedo makoc tundo othieno.”

¹⁹ “Ka dhako ruko dwe, go labedo i koco pere ma ndelo abirio, aka ŋat'ogey go labedo makoc tundo othieno.

²⁰ Kisi gima go onindi iye je i hongo ma go ruko dwe, labedo makoc; aka kisi gima go obed'iye je bende labedo makoc.

²¹ Dhano moro je m'ogey kitanda pere ripo lwoko nangin pere, to lwokere gi pi, aka labedo makoc tundo othieno.

²² Ŋat'ogey gimoro je ma dheno obed'iye ripo lwoko nangin pere, to lwokere gi, aka labedo makoc tundo othieno.

²³ Obedi kitanda kosa kisi gima go obed'iye, ŋat'ogey labedo makoc tundo othieno.

²⁴ Ka jacwo moro onindo gi go, to remo dwe geyo go, go labedo makoc ma ndelo abirio; aka kitanda je ma jalo onind'iye, labedo makoc.”

²⁵ “Ka dhako ocwero remo ma ndelo kweth, ma kalo hongo ma ruko dwe pere, kosa ka remo ocwer kwoŋe loyo hongo ma ruko dwe pere, ndelin no je ma go lamedo cwer remo go lamedere bedo makoc; paka i ndelin ma ruko dwe pere.

²⁶ Kisi kitanda ma go onind'iye i ndelin no je ma remo cwer kwoŋe, ilatero paka kitanda makoc; aka kisi gimoro je ma go obed'iye labedo makoc, paka koco ma ruko dwe.

²⁷ Ŋat'ogey gigipiny me labedo makoc, aka lalwoko nangin pere, to lwokere gi pi, aka labedo makoc tundo othieno.

²⁸ Ka go olony i ruko dwe pere, go lakwano ndelo abirio, aka rumacen go labedo m'olony.

²⁹ I ndelo mar'aboro go latero akurin ario kosa njiwin ario to miyo jacway ri Were i wi migam i dhiot ma Wema ma romo.

³⁰ Jacway ri Were i wi migam lamiyo acel ri mic ma cwako reco kodi man ca ri cowirok awaŋa; aka jacway ri Were i wi migam lamiyo cowirok ma lonyo rigo ruwaŋ Rwoth kwoŋ koco pere.”

³¹ “Ameno apaka wilapoko Joisiraili kwoŋ koco pajo, ŋey jokiri jowotho i koco pajo, ka jokoco kabedo paran manitie i dier jo.”

³² “Me obedo cik ri ŋata tuti cwer kwoŋe, ŋat'ojayo, to bedo makoc,

³³ ri dhako ma two dwe, ri nyatoro, jacwo kosa dhako ma tuti cwer kwoŋe, kodi ri jacwo m'onindi gi dhako makoc.”