Jolevi 11 - KITAWO MALEŊ Catholic

Ogwaŋe m'olony kodi makoc

¹ Rwoth oluwo gi Musa kodi Aron aka owaco rijo ni:

² Luw win gi Joisiraili wiwaci rijo ni: Me ogwaŋe ma jonyalo camo kwoŋ cwec je manitie i piny.

³ Ogwaŋ moro je ma tiende opokere, manitie gi par tiende, aka nyamo cemo dirio, nger no winyalo camo.

⁴ To kwoŋ ogwaŋe ma jonyamo cemo dirio kodi ma tiendi jo opokere, wikiripi camo me: Ŋamia, kwoŋbedo nyamo cemo dirio, to tiende k'opokere dirio, koc riwin.

⁵ Oyeyo ma tele, makada nende nyamo cemo dirio, to tiende k'opokere dirio; koc riwin.

⁶ Oculu, makada nende nyamo cemo dirio, tiende k'opokere dirio, koc riwin.

⁷ Mbiji, makada nende tiende opokere dirio aka nitie gi par tiende, to kinyam cemo dirio; koc riwin.

⁸ Wikiripi camo riŋo pajo kosa mako ma jotho, jokoc riwin.

⁹ Me winyalo camo kwoŋ gima kwo i pi. Gima nitie gi thwoke kodi magambala, i nam kosa i malawa, winyalo camo.

¹⁰ Gim'ongoye gi thwoke kodi magambala i nam kosa i malawa, kwoŋ gima wotho i pi kodi makwo i pi, jobedo amien riwin.

¹¹ Jobedo amien riwin, wikiripi camo riŋo pajo, aka ma jotho wiripo tero paka amien.

¹² Kisi gim'ongoye gi thwoke kosa magambala ma kwo i pi obedo amien riwin.

¹³ Aka me winyin ma jobedo amien riwin, wikiripi camo, jokoc riwin. Ango, acut, naminaka,

¹⁴ otengo m'obokere kodi otengo macol gi nger je,

¹⁵ nger agak je,

¹⁶ bwoŋ maya, nger tula je, winyin ma nam,

¹⁷ tula mathindho kodi madongo, magwi,

¹⁸ gweno ma pi, tula ma thim, acut ma camo jo

¹⁹ mbuluku, nger acik je, kilapembe, kodi kilafundo.

²⁰ Cwec ma jobwombi gin je ma jowotho gi tiendi jo aŋwen jokoc riwin.

²¹ Kucel kwoŋ cwec ma jobwombi gin aka jowotho gi tiendi jo aŋwen, winyalo camo ma tiendi jo olwowere, aka joay malo.

²² Me kwoŋ jo, winyalo camo, nger bonyo je, nger senene je, nger nyenje je, nger otwoŋo je.

²³ To ma jobwombi gin man je aka jonitie gi tiendi jo aŋwen, jokoc riwin.

²⁴ Me gima loko win makoc, ŋat'ogey m'otho labedo makoc tundo othieno.

²⁵ Ŋat'ogey m'otho je ripo lwoko nangin pere, aka labedo makoc tundo othieno.

²⁶ Ogwaŋe je ma tiende k'opokere dirio, aka ongoye gi par tiende, kosa kinyam cemo dirio, koc riwin, ŋat'ogey m'otho je labedo makoc.

²⁷ Ogwaŋe je ma jowotho gi lwet tiendi jo, kwoŋ ogwaŋe ma jotiendi gin aŋwen, jokoc riwin, ŋat'ogey m'otho labedo makoc tundo othieno.

²⁸ Ŋat'ogey m'otho ripo lwoko nangin pere, aka labedo makoc tundo othieno.

²⁹ Kwoŋ cwec ma jolak piny i lowo, me jokoc riwin; fuko, oyeyin, nger ragwe je,

³⁰ kambelimbeli, ŋec, kikome, othiololo, kodi ŋokino.

³¹ Me jokoc riwin, kwoŋ ogwaŋe ma jolak piny; ŋat'ogey m'otho labedo makoc tundo othieno.

³² Gima jopodh'iye je ka jotho labedo makoc, obedi atewe ma mbawo, nanga, pien, kutiya, gimoro je m'itiyo gine, iripo lwoko, aka nyaka wotiy gine. Labedo makoc tundo othieno to bedo m'olony.

³³ K'opodho iy'atewe ma lowo, labedo makoc, aka iripo baro woko.

³⁴ Cemo moro je ma pi ooy'iye wok iy'atewe no labedo makoc, kosa gir'amadha moro je m'oyido nitie i nger atewe no labedo makoc.

³⁵ Kisi gima delkwoŋ jo opodh'iye labedo makoc, obedi kendo kosa sigiri, kosa degi, iripo turo woko, jokoc riwin.

³⁶ Waŋ pi kosa kacoko pi labedo m'olony, to gim'ogey delkwoŋ jo iye labedo makoc.

³⁷ Ka delkwoŋ jo opodho i kodhi m'iripo cwoyo, labedo m'olony.

³⁸ To k'oyido okethi pi i kodhi, to delkwoŋ jo podh'iye, labedo makoc.

³⁹ Ka ogwaŋ ma wicamo otho, ŋat'ogey delkwoŋe je labedo makoc tundo othieno.

⁴⁰ Joma jocam riŋo mere joripo lwoko nangin pajo aka jolabedo makoc tundo othieno; jono ma jotiŋ delkwoŋe joripo lwoko nangin pajo aka jolabedo makoc tundo othieno.

⁴¹ Cwec je ma jolak piny jobedo amien, wikiripi camo.

⁴² Cwec ma jowotho gi iy jo, ma jowotho gi tiendi jo aŋwen, kosa jonitie gi tiendi jo kweth, cwec je ma jolak piny, wikiripi camo, kole jobedo amien riwin.

⁴³ Wikiripi kelo amien kwoŋ win gi cwec ma jolak; wikiripi kocirok gi jo, aka wibedi makoc.

⁴⁴ Kole an, abedo Rwoth Were mewin, lokere win maleŋ, aka wibedi maleŋ, kole Aleŋ. Wikiripi kocirok gi cwec ma lak piny.

⁴⁵ Kole An abedo Rwoth, m'awodho win wok i lowo ma Misir, bedo Were mewin, riameno bedi win maleŋ, kole Aleŋ.

⁴⁶ Me cik ma mako kwoŋ ogwaŋe, winyin, kodi kisi cwec ma wotho i pi, kodi cwec je ma jolak piny,

⁴⁷ ma ketho pokirok i dier gimakoc kodi gim'olony, i dier cwec makwo m'icamo kodi ma kicam.