Jolevi 1 - KITAWO MALEŊ Catholic

Mic awaŋa gikululu

¹ Rwoth olwoŋo Musa, aka oluwo gi go i wema maleŋ, ka waco ama:

² Luw gi Joisiraili, aka iwaci rijo ni: Ka nyatoro kelo mic mar'ogwaŋ ri Rwoth, ripo bedo mic ma dhiaŋ, kosa rombo kosa diel.

³ Ka mic pere obedo mic awaŋa ma dhiaŋ, ripo bedo rwath m'ongoye gi ŋolo. Go won wokel i dhiot ma Wema ma romo, ŋey wojol rigo ruwaŋ Rwoth.

⁴ Go laketho cinge i wic mic awaŋa, t'ijolo rigo ma cwako reco pere.

⁵ Go lathumo rwath ruwaŋ Rwoth, aka jocway ri Were i wi migam, wot Aron, jolakelo remo, to jokiro thoko migam manitie i dhiot ma Wema ma romo.

⁶ Go bino daŋo pien mere, to yaŋo i muma mathindho thindho.

⁷ Wot Aron jolacwinyo mac i wi migam, to jocano i wiye yen.

⁸ Jocway ri Were i wi migam, wot Aron jolacano mumin, wic, kodi bor i wi yen, i mac i wi migam.

⁹ To gigipiny ma iye kodi olengin mere iripo lwoko gi pi. Kenyo jacway ri Were i wi migam lawaŋo gipi i wi migam, paka cowirok awaŋa, mic m'owaŋ gi mac, maŋwe kur mamit ri Rwoth.

¹⁰ Ka mic pere obedo rombo kosa diel, ripo bedo ma wode m'ongoye gi ŋolo.

¹¹ Aka go lathumo i thengi migam yumalo ruwaŋ Rwoth. Jocway ri Were i wi migam, wot Aron jolakiro remo mere thoko migam.

¹² Go layaŋo i muma mathindho thindho, jacway ri Were i wi migam laketho gi wic mere kodi bor mere i wi yen manitie i mac i wi migam.

¹³ To gigipiny ma iye kodi olenge mere go lalwoko gi pi. Jacway ri Were i wi migam lawaŋo gipi i wi migam paka cowirok awaŋa, mic m'owaŋ gi mac, maŋwe kur mamit ri Rwoth.

¹⁴ Ka mic pere ri Rwoth obedi winyo, go layero akuro kosa njiwa.

¹⁵ Jacway ri Were i wi migam lakelo i wi migam, to turo ŋute, to waŋo i wi migam. Remo mere ilakiro i thengi migam.

¹⁶ Go lafudho kasekero mere to budho yer mere, aka labolo i thengi migam yuwok ceŋ, kama buru oy'iye.

¹⁷ Go labaro diere gi bwombe, to kiripi coto diere wopokere, aka jacway ri Were i wi migam lawaŋo i wi migam i wi yen i mac, paka cowirok awaŋa, mic m'owaŋ gi mac, maŋwe kur mamit ri Rwoth.