Joefeso 2 - KITAWO MALEŊ Catholic

Wok i tho tundo i kwo

¹ I ndir m'okadho oyido witho i cuny win ro turo cik kodi timo reco.

² I ndir no oyido wiluwo yo mareco manyapiny; oyido wiluwo rwoth ma dhumo ker ma hongo malo, cuny ma pama dhumo ji ma jocayo Were.

³ Aka wajoje oyido wacale jo, munyo watimo gima cuny wan mareco oyido tero wan'iye, aka watimo gima delkwoŋ wan gi paro mawan oyenyo. Paka joman je, di wabende walimo gir'acula pa Were.

⁴ To Were m'oŋaŋ gi ŋono, i mar pere madwoŋ m'omaro gine wan,

⁵ kad'oyido watho i cuny wan ro turo cik ma waturo, omiyo walimo kwo kanyacel gi Kristo; aka wiboth cungo kwoŋ nema pa Were.

⁶ Aka Were ocerino wan gi Kristo, to ketho wan kanyacel gine i kabedo ma polo i Kristo Yesu.

⁷ Otimo ama ma nyutho nema pere m'oŋaŋ m'oasere, munyo timo riwan bero i Kristo Yesu.

⁸ Kole ro nema am'omiyo wiboth cungo kwoŋ yeyo; aka me k'obedo tim mewin wiwegi, t'obedo mic pa Were.

⁹ K'obedo ro tim, ma moro d'opakere gine.

¹⁰ Wabedo cwec pa Were, aka ocweyo wan i Kristo Yesu, ni wabedi gi tim mabeyo, ma cango go oyiko con ni wabedi gine.

Ji acel i Kristo

¹¹ Am'omiyo win Jopath, ma Joyuda jolwoŋo ni joma k'othumere, aka wegi jolwoŋere ni jom'othumere (gima mako kwoŋ gima wegi jotimo gine delkwoŋ gin) poyi win gima cango oyido wibedo.

¹² Poyi win ni i hongo no oyido fodi winitie bor gi Kristo. Onwaŋo wijokicar aka oyido wikikwanere paka jokweth pa Isiraili. Oyido wingoye i cikirok, kodi geno, kendo oyido wingoye gi Were i piny.

¹³ To pama, i Kristo Yesu, win m'onwaŋo win bor, onyo okeli win cegin, ro remo pa Kristo.

¹⁴ Kole Kristo won am'obedo siem mawan, m'oriwo Joyuda gi Jopath kanyacel. Go oturo woko cel m'oyido kelo pokirok aka miyo jo bedo jokwor.

¹⁵ Okwanyo woko Cik pa Joyuda gi thenethene mere gi delkwoŋe, ŋey woloki nonin ario me ji acel i go, to kelo siem.

¹⁶ Tho pa Kristo wi musalaba oreyo woko dakirok; to riwo nonin ario no gi Were i del acel.

¹⁷ Ameno Kristo obino to tito Wac Manyen Maber riwin m'oyido wibor gi Were, gi kelo siem ri jom'oyido jo nicegin gi Were.

¹⁸ I Kristo wajoje wan gi thwolo i Cuny Maleŋ acel ma kidho bongi Were Bawan.

¹⁹ Am'omiyo, pama onyo wikibedo Jopath kosa jokicar kendo; to wibedo ji acel gi ji pa Were; jopeco pa Were.

²⁰ Wibende oger win i misingi ma jomoor kodi jotuci wac Were jokunyo aka tele ma mako tielo ot meno Yesu Kristo won gipi.

²¹ Ot gipi cungo m'oriwere i go, to dongo paka ot maleŋ i Rwoth.

²² Wibende oger win i go, ŋey wibedi Ot ma Were bed'iye i Cuny Maleŋ pere.