Joebulaniya 9 - KITAWO MALEŊ Catholic

Lamo ma piny kodi ma polo

¹ Cikirok marapena oyido nitie gi cik ma lamo Were kodi kalamo ma dhano ama ogero.

² Oger wema ma Were bed'iye ama: I kisika marapena oyido nitie raŋaw tala, meza, kodi mugat m'icwayo ri Were. Kenyo oyido ilwoŋo ni Kabedo Maleŋ.

³ Yuŋey nanga mar'ario oyido nitie kisika m'ilwoŋo ni Kabedo Maleŋ Maloyo.

⁴ Kenyo oyido nitie migam ma zahabu m'iwaŋ'iye buban, kodi sanduku ma cikirok, m'oum thenge je gi zahabu. I sanduku no oyido nitie atawo ma zahabu gi manu i iye kodi luth pa Aron ma boke oloth kwoŋe, kodi telin ario m'ondiki kwoŋe wac ma cikirok.

⁵ Wi sanduku oyido nitie Kerubim ario ma nyutho dwoŋ pa Were, ma joyaro bwombi jo kam'icwak'iye reco kenyo. To me kaya hongo ma tit'iye gimoro je.

⁶ Munyo otiek timo can me je, jocway ri Were i wi migam bin jodonjo i diro ma woko ndelo je timo tic pajo;

⁷ to jadwoŋ pa jocway ri Were i wi migam kende am'oyido donjo i kisika ma iye aka bin timo ameno dicel i oro acel. Go kidonji m'ongoye remo ma go kidho cwayo ri Were kwoŋ reco pere won kodi reco pa ji ma jotimo munyo jokuya nike oyido jotimo gimarac.

⁸ Gi gigipiny me je, Cuny Maleŋ oyido nyutho ji nike royo ma donjo i Kabedo Maleŋ Maloyo oyido fodi k'oyaw ri ji.

⁹ Gino oyido obedo cal ma nyutho ndir ma pama. Dwoŋ mere ni cowirok ma mic kodi le m'oyido icwayo ri Were kinyal miyo cuny ŋata lamo Were bedi m'olony kicutho.

¹⁰ Jobedo nyaka cemo, gir'amadha, kodi tim m'omore ma lonyo del. Gino je oyido obedo nyaka cik ma woko, m'onwaŋo tiyo nyaka tundo ndir ma cikirok manyen oyido kidho caker'iye.

¹¹ Aka Kristo obino paka jadwoŋ pa jocway ri Were i wi migam, ma gigipiny mabeyo ma pama nitie, am'omiyo wema ma go tiy'iye ŋon m'ocowere aka didwoŋ m'oasere (ji ama jok'otimo, odoko k'obedo ma cwec me).

¹² Kristo k'odonjo i Kabedo Maleŋ Maloyo gi remo diegi kodi roci cwayo jo wi migam; to okwanyo remo pere won ama odonjo gine i kabedo no, aka dicel makicutho, to nwaŋo riwan gine kwo makirum.

¹³ Kole remo diegi kodi apa thwondhe, kodi buru pa roya m'owaŋ t'ikiro kwoŋ jom'oyido jok'olony paka cik yenyo, olonyo jo munyo kwanyo woko cilo ma woko i cik manyadini.

¹⁴ Kosa to remo pa Kristo m'omiyere i leŋo cungo kwoŋ tic pa Cuny ma cil gi cil, nyalo lonyo paro ma cuny wan kalo kenyo didi, kwoŋ tim m'othotho, ŋey watiy ri Were makwo!

¹⁵ Ro wac me Kristo obedo jatim can ma miyo cikirok manyen wotiy, ŋey joma Were olwoŋo jowonyal limo silwany ma Were ociko. Kole go otieko tho paka cul ma gonyo ji woko kwoŋ kibenga ma jotimo munyo oyido jonitie i cikirok marapena.

¹⁶ Kama nitie iye wac pa jatho m'ondiko, ripo bedo gima nyutho ni ŋato otieko tho adieri.

¹⁷ Ato ndiko no ongoye kony kafodi won mere k'otho, aka kitiy ka ŋato fodi k'otho.

¹⁸ Meno am'omiyo cikirok marapena k'oridhi ma remo fodi ongoye m'ooy.

¹⁹ Munyo Musa otieko waco ri ji or je paka okethi i Cik, okwanyo remo roci to ruwo gi pi, to kiro kwoŋ kitawo ma Cik kodi kwoŋ ji je gi cangwe m'obil, kodi lwodo ma yer rombo m'obokere.

²⁰ Aka go owaco ni, “Me a remo ma tweyo cikirok ma Were ooro win mako.”

²¹ I royo acel, Musa okiro remo kwoŋ wema ma Were bed'iye kodi kwoŋ gigipiny je m'oyido ioro ma lamo Were.

²² Ato, i Cik pa Musa, cegin kisi gimoro iripo lonyo gi remo; aka reco oyido kicwaki ka remo fodi k'ooy.

Cowirok pa Kristo kwanyo woko reco

²³ Gigipiny me, ma jobedo nyaka cal ma gigipiny ma polo, onwaŋo ripo lonyo jo i kite no. To gigipiny ma polo yenyo cowirok mabeyo loyo meno.

²⁴ Ato Kristo k'odonjo i Kabedo Maleŋ ma ji ama jotimo, m'obedo nyaka cal pa kabedo mar'adieri mere. Go odonjo i polo won kama go pama ocung'iye riwan ruwaŋ Were.

²⁵ Jadwoŋ pa jocway ri Were i wi migam mapa Joyuda yado donjo i Kabedo Maleŋ Maloyo gi remo ma k'obedo apere won kisi oro. To Kristo k'odonjo i polo miyirok kisi oro be.

²⁶ Kole di go ocandere dikweth wok cuka cwey piny. To, go onenere dicel makicutho, i gik ndir ma rumacen, ma kwanyo woko reco cungo kwoŋ cowirok ma kwo pere won.

²⁷ Paka okethi ri dhano je tho dicel, to Were thumo rigo banja,

²⁸ apaka Kristo bende ocway go dicel paka cowirok ma kwanyo woko reco pa ji kweth; aka go odoko bino nenirok mar'ario, ki ma tiŋo reco kendo, to ma botho joma jokuro go ayin.