Joebulaniya 13 - KITAWO MALEŊ Catholic

Nger ma kisangala Were

¹ Medere win gi marok paka wutmere i Kristo.

² Wiy win wokiri wowili gi jolo jowiloka i pecin mewin; kole nitie jomoro ma jotieko timo ameno to jojolo jomalaika ma jok'oŋeyo.

³ Poyi win joma nitie i twec paŋini winitie i twec gi jo. Poyi win joma candere, paŋini wicandere gi jo.

⁴ Ji je joripo miyo nywomirok dwoŋ, aka jacwo gi dhako joripo kurok i nywomirok pajo i leŋo, rupiri Were bino thumo banja ri jocot kodi joma turo cik ma nywomirok.

⁵ Kur win kwo mewin ma wikimunyere i maro pesa, aka gima winigine worom win. Kole Were owaco ni. “Akibino weyo win; ak'ojala win.”

⁶ Weyi wabedi miseni, to wawaco ni, “Rwoth obedo jakony paran, akibino bedo malwor! Aŋo ma dhano nyalo timo ran?”

⁷ Poyi win jotel mewin macon, ma jotito riwin wac pa Were. Pari win paka kwo pajo obedo aka wimaki kiti yeyo pajo.

⁸ Yesu Kristo kiwire nyoro, konon, kodi cil gi cil.

⁹ Wikiri wiyey fonji m'opokere ma k'otire woyway win wok i royo m'otire. Ber ka cuny wan onwaŋo meni wok i nema pa Were, makiweno i kuro cik ma mako kwoŋ cemo, ma kikony kada joma kuro cik ago.

¹⁰ Wanitie kodi migam ma cowirok ma joma cwayo ri Were i wema Manyayuda k'oyey jo cem'iye.

¹¹ Jadwoŋ pa jocway ri Were i wi migam Manyayuda tero remo le i Kabedo Maleŋ M'oasere to cwayo paka cowirok ri reco; aka riŋo le no iwaŋo woko ma kambi pa ji.

¹² Am'omiyo Yesu bende otho woko ma waŋkac ma tindi, ŋey wolwoki woko reco pa ji gi remo pere won ma miyo ji leŋo.

¹³ Am'omiyo, weyi wakidhi bonge woko ma kambi pa ji wabedi kanyacel gine i wickwot pere.

¹⁴ Ato tindi ma yindira ongoye riwan i piny ka, to kwanyo woko warango tindi ma bino ayino.

¹⁵ Am'omiyo, weyi hongo je wacway pak ri Were paka cowirok mawan i Yesu Kristo, ma cal olemo ma nyak wok i dhok wan ka watuco nyinge.

¹⁶ Wiy win wokiri wowili gi timo bero kodi konyo jowoti win gi gima winigine, rupiri kiti cowirok no ama sangala Were.

¹⁷ Winji win jotel mewin, odoko bedi win ma wimwol rijo, rupiri jo jokuro win paka joma ripo tito ri Were kite ma jotiyo gine. Ka wiwinjo jo, aka jobino timo tic pajo gi kisangala; makiweno gi cuny jo m'ocile, aka meno kinyal konyo win.

¹⁸ Kway win riwan ma wikikeŋ. Waŋeyo ni paro ma cuny wan otire, aka wamito timo gim'otire hongo je.

¹⁹ Aka amedo kwayo win ni bedi win munyo wikwayo Were wonyali oran bongi win mayot.

Kwayo ma cego

²⁰ Onyo weyi Were ma jasiem, m'ocerino Rwodhiwan Yesu kwoŋ jom'otho, Yesu m'obedo Jakwath rombo Madwoŋ ro remo pere ma ridho cikirok makirum,

²¹ womiy win gimaber ma wiyenyo ŋey witim gima go mito. Weyi go wotim i wan gima sangala go i Yesu Kristo, aka dwoŋ wobedi rigo cil gi cil. Ameno.

Wac macowe

²² Akwayo win, jowotan, winjo mikwenda m'amiyo gine win miseni me ma widiyo cuny win; kole balwa ma andiko riwin me obedo nyaka macek.

²³ Amito wiŋey ni omin wan Timothe otiek gonyo i twec. Ka go obino ma piyo, alabino gine neno win.

²⁴ Mothi riwan jotel mewin kodi ji pa Were je. Jowoti wan ma Italia bende jodhiro riwin moth pajo.

²⁵ Weyi nema pa Were wobedi gi wijoje. Ameno.