Jafonji 8 - KITAWO MALEŊ Catholic

Winji kere

¹ Ŋa ma cal dhano mariek? Aka ŋa m'oŋeyo tito dwoŋ ma gimoro? Rieko miyo waŋ jo leny, aka waŋtek pere wire.

² Awaco ni, winji wac ma wok i dhok kere, r'atoŋa ma cikirok pa Were.

³ Ikir'ikwakere eye ruwaŋe, ikir'imena gimarac, kole go latimo gimoro je ma go mito.

⁴ Kwoŋbedo wac pa kere nitie gi meni, aka ŋa m'openji go ni, “Itimo aŋo?”

⁵ Ŋata winjo or, k'oŋey gimarac, cuny ŋatariek oŋeyo sawa m'otire gi yo m'otire.

⁶ Kole kisi gimoro nitie gi hongo mere ma ripo gi yo, kwoŋbedo teko pa ji dwoŋ kwoŋ jo.

⁷ Adieri, go kuya gima labedo, kwoŋbedo ŋa m'owaci rigo paka labedo?

⁸ Ongoye dhano ma nigi meni kwoŋ koyo, manyalo kweyo koyo, ongoye ŋata nigi meni kwoŋ ndelo ma tho, ongoye kisewila kama lweny ogunj'iye, aka kidakana kinyal botho wegi mere.

Jokidakana gi joma timo gim'otire

⁹ Atieko neno gime je, aka atieko ketho cunyan i kisi tic je ma timere i pendi waŋceŋ, kareno ŋatimoro nigi meni kwoŋ jomegi ma timo rijo gimarac.

¹⁰ Aka i nger no, atieko neno k'iyiko jokidakana. Oyido jomaro donjo gi wok i Kabedo Maleŋ, aka wiy ji owil gi jo i tindi madwoŋ kama jotim'iye nger gino. Me bende obedo pilok.

¹¹ Kwoŋbedo thumo banja kwoŋ tim marac kitim i kwakirok, riameno cuny ji oyikere timo gimarac.

¹² Makada nende jareco otim reco dimiya acel to medo kwo. Kucel aŋeyo ni labedo maber gi jono ma jolworo Were, rupiri jocungo gi lworo ruwaŋ go,

¹³ to k'obedi maber gi jokidakana, kosa hongo pajo k'obedi malac paka tipo, rupiri jokicungi gi lworo ruwaŋ Were.

¹⁴ Nitie pilok ma timere i piny, ni nitie joma timo gim'otire ma gigipiny timere rijo paka tim pa jokidakana, aka nitie jokidakana ma gigipiny timere rijo paka tim pa joma timo gim'otire. Awaco ni me bende obedo pilok.

¹⁵ Onyo ayere gi kisangala, rupiri ongoye gimaber ri ji i pendi waŋceŋ loyo cemo, medho gi bedo gi kisangala, kole meno labedo gi dhano i olo pere hongo je ma kwo pere ma Were miyo go i pendi waŋceŋ.

¹⁶ Munyo amiyo cunyan ŋeyo rieko, gi neno gima timere i piny, anwaŋo ni wor g'odieceŋ waŋ dhano ngoye nindo.

¹⁷ Kenyo aparo kwoŋ tic pa Were je, ni ongoye ŋata nyalo nwaŋo gima timere i pendi waŋceŋ, kwoŋbedo makada nende dhano ool nedi rango, kucel go k'onwaŋ, aka makada nende ŋatariek opar ni oŋeyo, kucel go k'onyal nwaŋo.