Jafonji 1 - KITAWO MALEŊ Catholic

Kwo bukony

¹ Me wac pa Jafonji, wod Daudi, kere i Yerusalem.

² Pilok ma gik pilok apaka Jafonji owaco, pilok ma gik pilok, kisi gimoro je obedo pilok.

³ Dhano olim magowa aŋo i tic pere je, ma go oyo rigo kwok i ceŋ maliel?

⁴ Luse kadho, aka luse bino, to piny doŋ cil gi cil.

⁵ Waŋceŋ wok to waŋceŋ podho, aka kwakere i kabedo mere kama wok'iye gine.

⁶ Koyo kudho yupiny, aka kadho thoko yumalo, koyo minere kadho, aka koyo gik kam'ocako minirok'iye gine.

⁷ Malawin je jomol i nam, kucel nam kipoŋ, i kabedo ma malawin mol'iye, kenyo jomedo mol'iye.

⁸ Gigipiny je jolocere, ma dhano kinyal waco, waŋ jo kiyeŋ gi neno, kosa ithi jo kipoŋ gi winjo wac.

⁹ Gimoro je m'otieko bedo ama labedo, aka gimoro je m'otiek timo am'ila timo; aka ongoye gimanyen i pendi waŋceŋ.

¹⁰ Nitie gimoro m'ilawaco ni, “Neni, gime nyen?” Oyido je nitie con, i hongo macene, mafodi wan.

¹¹ Gigipiny macon kipoy, aka gigipiny ma labino bende k'opoy, gi jono ma jobedi rumacen.

Jafonji kaŋasa kwo

¹² An, Jafonji, oyido abedo kere ma Isiraili paka rom i Yerusalem.

¹³ Amiyo cunyan dwaro gi rango gi rieko kisi gimoro je manitie i pendi polo, obedo tic matek ma Were otieko miyo ji ni jowooli gine.

¹⁴ Atieko neno tic je ma jotieko timo i pendi waŋceŋ, aka neni, kisi gimoro je obedo pilok gi riemo koyo.

¹⁵ Gim'okom kinyal twenyo, aka gim'ongoye kinyal kwano.

¹⁶ Atieko luwo g'adundo paran ni, “E atieko nwaŋo rieko madwoŋ, maloyo apa kisi dhano je m'open bedo ran i Yerusalem gipi aka cunyan otieko neno rieko gi ŋeyo mathoth.

¹⁷ Aka amiyo cunyan ŋeyo rieko gi ŋeyo neko gi miŋo. Aniaŋ ni me bende obedo riemo koyo.”

¹⁸ Kole i rieko mathoth nitie aŋedha cuny mathoth, aka ŋatimoro je ma medo ŋeyo, medo kumo.