Isaya 8 - KITAWO MALEŊ Catholic

Wod pa Isaya paka ranyuth ri ji

¹ Kenyo Rwoth owaco ran ni, “Kwany tele mapando aka indik'iye gi nyikuta madongo ni, ‘Apa Maher Salal Hasbaz.’

² Nwaŋ cwo ario, Uriya jacway ri Were i wi migam gi Zekaria wod pa Jeberekia, jowobedi paka jokony ma jogenere.”

³ Rumacen ma hongo moro dhako paran ogamo iye to nywolo nyathi majayac. Kenyo Rwoth owaco ran kendo ni, “Cwoki nyingi nyathi ni, Maher Salal Hasbaz.

⁴ Kole mafodi nyathi k'oŋeyo ywak ni baba kosa ni mama, ilatiŋo woko lim ma Damasiko gi ma Samaria je ruwaŋ kere ma Asiria.”

Kere ma Asiria bino

⁵ Rwoth oluda luwo kodan kendo ka waco ni,

⁶ “Kwoŋbedo ji me jokwero pi ma wok i milelo Silowa ma mol moth, aka jokirin gi lworo ruwaŋ Rezin gi wod Remalia;

⁷ Rwoth kelo kwoŋ jo pi ma Malawa, ma dimeni aka thoth, kere ma Asiria gi jolweny pere je, aka laay kwoŋ jange je gi thenge je.

⁸ Laluwo i wi Yuda paka mikula ma tundo kiri i dwondi win, Awi Manwer, gi bwombin m'oyare umi thutho ma piny perin.”

⁹ Riwere win kanyacel i lworo, nonin je, ciki ithi win, piny mabor je. Yikere win lweny, aka ilaŋinyo win mathindho thindho, yikere win lweny, aka ilaŋinyo win mathindho thindho.

¹⁰ Tim win can kanyacel, to k'oyindira. Luw win wac, to kilatundo i kare, kole Were nigi wan.

Rwoth gwoko Isaya

¹¹ Kole Rwoth oluwo kodan gi cinge ma dimeni kwoŋan, to gwokan ni akir'awothi i yo pa ji me ka waco ni,

¹² “Ikir'iriwere i can pa ji aka Ikir'ilwor gima jolworo kosa ibwoki.

¹³ To Rwoth pa lwak jolweny kende ama iter paka ŋataleŋ, weyi go ama wobedi lworo gi bwok perin.

¹⁴ Go lalokere Kabedo Maleŋ, tele ma thumo banja, gi tele ma ceri ri kerin ario ma Isiraili, bwo gi mitego ri ji ma jobedo i Yerusalem.

¹⁵ Kweth jolacer, jolapodho to jotur. Jolamoko i bwo t'itero jo.”

Jofonjirok pa Isaya

¹⁶ Tweyi ranyuth, imwon fonji no i dier jofonjirok paran.

¹⁷ Alakuro Rwoth, go ma pano waŋe kwoŋ ot pa Yakobo, aka alaketho geno paran i go.

¹⁸ Neni, an gi nyithindho paran ma Rwoth omiyan, wabedo ranyuth gi gir'aura i Isiraili wok bongi Rwoth pa lwak jolweny, ma bedo wi Got Zayon.

¹⁹ To ka jowaci riwin penjo mikwenda wok bongi jothieth gi jojwok ma jomwoŋo aka jocur. To kere ji jokiripi rango Were pajo? Kendo joluw gi jom'otho ri jomakwo?

²⁰ Ri fonji gi mijulisi! Adieri ri wac ma joluwo me jokilaneno lero.

Hongo ma teko

²¹ Ji jolawotho i piny i litho madwoŋ gi kec, aka kec lamiyo jo nge to jokwoŋo kere pajo gi werin pajo. Jolaŋiyo malo i polo,

²² to joŋiyo piny, to jolaneno nyaka litho gi mudho, mudho ma nge, aka ilabolo jo i mudho mapek.