Isaya 61 - KITAWO MALEŊ Catholic

Wac maber ma gonyirok

¹ Cuny pa Rwoth Were nitie kwoŋan, kwoŋbedo Rwoth owiran gi mo, ooran kelo wac manyen maber ri ji m'idiyo, yomo cuny joma cuny jo otur, tito gonyirok pa joma jonitie i twec, gi gonyo joma jotudere.

² Go ooran tito oro ma Rwoth nyutho ji pere wor, gi ndelo ma culo kwor pa Were mawan, kodi yomo cuny ji je ma joywak.

³ Miyo ji ma joywak i Zayon, kisangala gi forok i kabedo pa rem, mo ma wir i kabedo pa ywak, bujwenge ma pak i kabedo ma cuny manyap. Kenyo nyaka wonyali lwoŋo jo ni olwa ka jotimo gim'otire, ma Rwoth won am'opidho, ŋey wonyali miyo go dwoŋ.

⁴ Jolageto tindin madongo macene kendo, jolatiŋo malo kam'oyido osika con, jolayiko tindin madongo m'obedo gundin, ma jorere i luse kweth.

⁵ Jopath jolatic riwin, to jokwayo mwendi mewin, jowiloka jolafur gi dhok mewin to jolwero lisik vini mewin.

⁶ To win, ilalwoŋo win ni jocway ri Were i wi migam pa Rwoth, ilalwoŋo win ni ŋecin pa Were mawan, wilawinjo cwe ma lim pa nonin man, aka wilakwoto i ŋaŋo pajo.

⁷ I kabedo pa wickwot mewin, wilalimo lim mirundi ario, i kabedo pa bwon, wilasiemere i lowo mewin won, riameno i lowo mewin won, wilalimo lim mirundi ario, kisangala mewin labedo cil gi cil.

⁸ Kole an Rwoth, amaro tiro, adaki kwo gi timo gi komo; alamiyo ji paran kemba iy'adieri, aka alatimo gi jo cikirok ma cil gi cil.

⁹ Kisi nono laŋeyo nyikway jo, aka ji jolaŋeyo nyithindho pajo. Ji je ma joneno jolaŋeyo, ni jobedo ji ma Rwoth otieko miyo silwany.

¹⁰ Alafore tektek i Rwoth, adundo paran gipi layodere i Were paran; kole go otieko rukan gi law ma both, go otieko uman gi kanzu ma tiro, paka jamweha koda wiye sangaria, paka mweha kikere gi thiwino pere.

¹¹ Kole paka lowo miyo kodhi twi to dongo, paka ndelo miyo gim'ocwoy'iye twi, ameno apaka Rwoth Were lamiyo tiro gi pak kitula ruwaŋ nonin je.