Isaya 6 - KITAWO MALEŊ Catholic

Menyirok pa Were gi lwoŋo pa Isaya

¹ I oro ma Kere Uziya otho i iye, aneno Rwoth obedo i kom pere ma dhum, malo aka otiŋere malo, aka kanzu pere opoŋo Ot pa Were gipi.

² Thoko go oyido nitie cwec ma jobwombi gin m'ilwoŋo ni Serafim; kisi acel oyido nigi bwombe aucel. Kisi cwec oyido umo waŋe gi bwombe ario, umo kwoŋe gi bwombe ario, aka ay gi bwombe ario.

³ Acel oyido lwoŋo nyawote to waco ni, “Maleŋ, Maleŋ, Maleŋ! Rwoth pa lwak jolweny! Dwoŋ pere opoŋ i piny gibe.”

⁴ Derino ma dwondi jo omiyo kindi miango ma dhiot yengirok, aka yiro opoŋ i Ot pa Were.

⁵ Kenyo awaco ni, “Kidamba ran! Kole arwenyo, kole abedo jacwo ma dhoke koc, aka abedo i dier ji ma dhok gin koc, kucel waŋan otieko neno Kere, Rwoth pa lwak jolweny!”

⁶ Kenyo acel kwoŋ cwec ma jabwombe oay to pie kwoŋan, oyido otiŋo cuk mac i cinge m'okwanyo wok i migam gi lew tala ario.

⁷ Ogeyo dhokan gi cuk mac aka owaco ni, “Neni ee, paka gime ogeyo dhokin, okwanyo woko banja perin, aka reco perin ocwaki.”

⁸ Kenyo awinjo dwondi Rwoth ka penjo ni: “Ŋa m'alaoro? Ŋa ma labedo jamikwenda mawan?” Adwoko ni, “An e! Oran!”

⁹ Ameno go owaco ran ni, “Kadhi, aka ilawaco ri ji gime.” “Winji win noknok, to wikiri winiaŋ, Neni win noknok, to wikiri wiŋey.”

¹⁰ “Loki paro pa ji mamiŋ, cul ithi gin, neki waŋ gin, ŋey jokiri jowoneni gi waŋ gin, jokiri jowowinji gi ithi gin, aka jokiri jowoniaŋ gi paro pajo, aka jowire wobothi jo.”

¹¹ Kenyo apenjo ni, “Kiri keraŋo Awi Rwoth?” Aka go odwoko ni, “Cuka tindin madongo othangere, m'ongoye ji ma jobed'iye, aka udi ongoye ji, to lowo doŋ nono kicutho.

¹² Cuka Rwoth oriem woko ji bor swa, to lowo gipi doŋ nono.

¹³ Makada nende acel kwoŋ ji apar odoŋ, ilawaŋo go kendo, paka olwa m'otoŋ, to conge doŋ m'ocungo, rijo, conge obedo kodhi maleŋ.”