Isaya 58 - KITAWO MALEŊ Catholic

Riyo kec mar'adieri

¹ Koki malo, ikir'iliŋ! Tiŋi dwondin malo paka gwara, tuci ri ji paran reco pajo, ri ot pa Yakobo reco pajo.

² Kucel jorangan kisi ndelo, aka josangala mito ŋeyo yo paran, paŋini piny ma timo gim'otire, aka jok'ojwango cik pa Were pajo. Jokwayan thumo banja gi tiro, aka josangala bino cegin gi Were.

³ Ji jopenjere ni, “Raŋo wariyo kec aka ikineni? Raŋo wamwole, to Rwoth kiŋey?” Neni, i ndelo ma wiriy'iye, wirango gigipiny mewin ma siemo win, aka widiyo jotic mewin je.

⁴ Neni, wiriyo to wicako dhaw gi gorok, gi gorok g'adonde ma kidakana. Nger riyo kec paka mewin i ndelo me, k'omiy dwondi win winjirok malo.

⁵ Me a nger riyo kec m'ayero, ndelo ma dhano ber womwoli'ye? Ni obedo kulo wiy win piny paka dudi m'oriewere, to wiruko kutiya to wibedo i buru? Winolwoŋ gime ni obedo riyo kec, gi ndelo ma yere ri Rwoth?

⁶ Me ka riyo kec ma Rwoth mito: Kwanyo woko ngoye pa tiro, gonyo jotwec, weyo jom'idiyo bedo gi thwolo, gi kwanyo woko bieto pajo?

⁷ K'obedo camo cemo mewin kanyacel gi joma kec neko, gi rwako jacandi ma bu peco i ot mewin; ka wineno jokinyoro, wiruk jo, aka wikiri wikwer konyo wade mewin won?

⁸ Ameno nyaka lero mewin laliel paka ŋamba, aka adhola mewin lacango piyo. Jaboth mewin latelo yuwiy win, aka dwoŋ pa Rwoth lagwoko win yucen.

⁹ Kenyo ka wikwayo, Rwoth ladwoko win, wilaywak ri kony, aka go ladwoko ni, An e. Ka wikwanyo woko okol i dier win, cimirok gi lwet win, gi luwo gimarac,

¹⁰ Ka winomiy joma kec neko cemo, to widewo kwoŋ joma nitie i litho, nyaka lero mewin lawok i mudho, to kumo mewin bedo paka odieceŋ.

¹¹ Rwoth latelo win noknok, to yeŋo mito mewin gi gigipiny mabeyo, to loko cokin mewin matek. Wilacale ndelo m'ikonj'iye pi, paka waŋ pi, ma pi mere kicwiy.

¹² Gundin mewin macene ilageto kendo, wilageto kendo kindi udi ma luse ma cango. Ilalwoŋo win joyiki gim'otur, joyiki royin m'ibed'iye.

Kemba ma kuro Sabato

¹³ Weyi win cayo Sabato, to wiwire kwoŋ timo gima wimito i ndelo paran maleŋ, lwoŋo win sabato ni kisangala, to wimiyo ndelo pa Rwoth dwoŋ, miy win dwoŋ, ma wikitimo gimewin won, ma sangala win, kosa widwaro siemirok, kosa wiluwo gima bukony.

¹⁴ Kenyo nyaka wilakisangala i Rwoth, aka alamiyo win dwoŋ i piny, alamiyo win silwany gi lowo m'amiyo kwari win Yakobo, kole dhok Rwoth otieko luwo.