Isaya 54 - KITAWO MALEŊ Catholic

Mar pa Rwoth ri Isiraili

¹ Wer, Awi dhako ma k'onywol; mwoc gi wer aka iywaki malo, in ma ŋedi k'oramin! Onyo pama ilabedo gi nyithindho kweth, loyo dhako m'otieko nywomirok, Rwoth waco.

² Loki wema perin malac, aka weyi nanga ma geŋo kam'ibed'iye woyar woko; ikir'ipan, loki mabor thondhe perin, aka iridhi loce perin.

³ Ilayawo kew perin i thenge maracuc gi maracam, ji perin joladwoko i lowo, ma nonin man oyido jobed'iye. Ji jolabedo i tindin ma pama obedo gundin.

⁴ Ikir'ibedi gi lworo, kole wickwot kilamakin; Ikir'ilacere, wickwot kilamakin. Wiyin lawil gi wickwot ma soye perin, aka ikilawinjo wickwot ro bedo citho.

⁵ Kole jacwec perin obedo cworin, Rwoth pa lwak jolweny obedo nyinge; Were Maleŋ pa Isiraili obedo Jaboth perin, ilwoŋo go ni Were ma piny gibe.

⁶ Kole Rwoth otieko lwoŋin, paka dhako m'ojwangi aka cunye ramo, paka dhako ma fodi soye k'oriemi woko, Were perin waco.

⁷ I hongo macek ajwangin, to, gi wor madwoŋ alacokin.

⁸ I keme paran m'opoŋ de oy ma hongo macek, apano rin waŋan, to alamako kodin wor gi mar makiwire, Rwoth, Jaboth perin waco.

⁹ Me cal hongo pa Nowa ran, m'akwoŋere ni pi ma hongo pa Nowa wokiri woum piny, ameno akwoŋere ni akilamako nge kodin kendo, aka akilabwokin kendo.

¹⁰ Gote gi tendere jonyalo barok, to mar paran makiwire rin k'oeye kwoŋin; aka alakuro cikirok paran ma siem, Rwoth ma mako wor kodin waco.

Yerusalem manyen

¹¹ Rwoth waco, Awi Yerusalem, tindi madwoŋ ma candere aka ongoye ŋat'okony, ongoye ŋat'oyom cunyin. Alageto kindi ot perin kendo gi telin ma welo.

¹² Alageto acurcur perin gi telin ma welo, waŋkace perin gi telin maliel paka mac, kodi cel perin je gi telin ma welo.

¹³ “Rwoth lafonjo nyithindho perin je, aka nyithindho perin jolabedo joŋaŋo madwoŋ.

¹⁴ Ilagetere m'ocwiny i tiro, ilabedo bor g'adica, aka lworo k'omakin, gi kwoŋ acanda, rupiri k'ocore cegin bongin.

¹⁵ Ka moro okwinyin, meno k'owoki bongan, aka moro otugila lweny kodin, lapodho kwoŋbedo in.

¹⁶ Neni, aŋat'acweyo jandijo, ma buko cuk mac, to wodho gilweny ri atoŋa mere. Atieko bende cweyo janek ma reyo woko.

¹⁷ Ongoye gilweny m'ilathedho ma lweny kodin ma lakiyindira, aka ilawiro woko lew je m'oay kwoŋin i thumo banja. Me alunja pa ŋecin pa Rwoth, gi gwok pajo wok bongan.” Rwoth waco.