Isaya 52 - KITAWO MALEŊ Catholic

Were labotho Yerusalem

¹ Cew, cew, bedi matek kendo, Awi Zayon! Ruk nangin perin maŋon, awi Yerusalem, tindi madwoŋ maleŋ. Kole ji ma jok'othumere gi jomakoc jok'obin bongin.

² Teŋi woko fukefuke kwoŋin, aka ay malo, awi Yerusalem manitie i twec, gony woko lijegere i ŋuti win, Awi ji ma Yerusalem ma jonitie i twec.

³ Kole me apaka Rwoth waco, “Otana win m'ongoye cul, aka ilabotho win m'ongoye pesa.

⁴ Me apaka Rwoth Were waco. Cango con, ji paran wegi joloro piny i Misir bedo paka jopath gi mito pajo, to Asiria otero jo gi mbaka m'ongoye cul.

⁵ Onyo riameno atimo aŋo ka, Rwoth waco, ŋiyo k'itero ji paran ma bu cul? Jotel mewin jocur gi litho, aka kisi ndelo jomedo cayo nyingan.

⁶ Riameno ji paran jolaŋeyo nyingan, i ndelo no jolaŋeyo ni an Were, aŋat'aluwo, An e.”

⁷ Nga ŋon wi gote, masembo pa jamikwenda ma tuco wac maber, ma tuco siem, kelo wac maber ma bero, tuco both, aka waco ri Zayon ni, “Were perin dhumo.”

⁸ Winji win, jokur mewin jotiŋo dwondi gin malo, jowero kanyacel ro kisangala; kole joneno awaŋ g'awaŋ, dwoko pa Rwoth i Zayon.

⁹ Mwoc dwondi win kanyacel gi wer, win gundin ma Yerusalem! Kole Rwoth otieko yomo cuny ji pere, go otieko botho Yerusalem.

¹⁰ Rwoth otieko rieyo bade maleŋ, ruwaŋ nonin je, aka tielo je ma piny laneno, both pa Were mawan.

¹¹ Eye win, wok win dicel, wikiri wigeyi gimakoc, eye win i dier jo, aka lokere win m'olony, win ma witiŋo atewe pa Rwoth.

¹² Waŋin me wikilawok i kwakirok; wikilatemo kwalok. Kole Rwoth Were mewin latelo win, aka Were pa Isiraili lagwoko win gi yucen.

Ŋeca ma candere

¹³ Neni, ŋeca paran labedo gi loyo i tic pere, ilaworo go t'imiyo go dwoŋ, aka labedo malo swa.

¹⁴ Paka ji kweth jodhier munyo joneno go, cal pere oyido onyekere m'okalo cal pa dhano, aka neno pere okalo apa wot cwo.

¹⁵ Ameno bende apaka nonin joladhier ro go, aka kerin jolamwono dhok gin ro go; rupiri jolaneno gigipiny mafodi k'owaci rijo, aka jolaniaŋ gigipiny m'oyido fodi jok'owinjo.