Isaya 49 - KITAWO MALEŊ Catholic

Isiraili, lero ri nonin je

¹ Winjan win, piny ma yuthengi nam, win ji ma wiwok bor! Rwoth olwoŋan mafodi k'onywolan, mafodi anitie i iy mama go ocwoko nyingan.

² Otimo dhokan paka abor mabith, opanan i tipo ma par cinge; ocweyan paka asere m'owidhere, i mikoro pere okanan.

³ Go owaco ran ni, “Ibedo ŋeca paran, Isiraili, ma lakelo ran dwoŋ.”

⁴ To awaco ni, “Atieko tic ma nono, atieko oro meni paran, m'ongoye gim'alimo gipilok, kucel adieri, tim paran Rwoth oneno, aka kemba paran nigi Were paran.”

⁵ Onyo pama, Rwoth waco, go m'ocweyan i ici bedo ŋeca pere, ma dwoko Yakobo bonge, aka ni wonyali coko rigo Isiraili. Kole anwaŋo dwoŋ ruwaŋ Rwoth, aka Were paran otieko lokere meni paran.

⁶ Rwoth waco ran ni, “Obedo gima sew ni iripo bedo ŋeca paran, tiŋo malo nonin pa Yakobo, gi dwoko Joisiraili ma joboth. Alamiyo in paka lero ri nonin, ŋey both paran wotundi i tielo je ma piny.”

⁷ Rwoth waco, Jaboth pa Isiraili aka Ŋataleŋ pere, ri ŋat'icayo swa, aka nonin jodak, ŋeca pa jodhum ni, “Kerin jolaneno to joay, jodhum jolakule piny, kwoŋbedo Rwoth ma timo adieri, Were Maleŋ pa Isiraili m'otieko yerin.”

Iladwoko nyithindho pa Zayon peco

⁸ Me apaka Rwoth waco, “I hongo ma ŋono atieko dwokin, itieko ndelo ma both akonyin, atieko kurin t'amiyin, paka cikirok ri ji, ma cako piny, ma poko lim m'ojwangere.

⁹ Awaco ri jotwec ni, ‘Kadhi win.’ Awaco ri jono ma jonitie i mudho ni, ‘Wok win woko i lero.’ Jolacemo i yo malomalo, jolacemo kiri i wi tendere maler.

¹⁰ Kec kosa riyo k'oneki jo, weyo malieth kosa ceŋ k'orwadhi jo piny, kole ŋata mako gi jo wor ama latelo jo, aka latelo jo kadho i waŋ pi ma mol.”

¹¹ “Alawiro gote paran je jowobedi royo, aka ngudin paran madongo ilatiŋo malo.

¹² Neni, ji paran jolawok bor swa, aka neni, jolawok yumalo gi yupodho ceŋ, gi wok i lowo ma Siyene yupiny.”

¹³ Wer, Awi polo! Koki ro kisangala, Awi piny! Weyi gote jowomwoci gi wer, kole Rwoth otieko yomo cuny ji pere, aka lamako wor gi ji pere ma jocandere.

¹⁴ To, Zayon waco ni, “Rwoth otieko jwangan, Rwoth paran wiye owil kodan.”

¹⁵ Dhako wiye nyalo wil gi nyathi pere ma dhoth, kosa nyalo weyo ma k'omako wor gi nyathi ma iye? To makada nende dhako wiye nyalo wil gi nyathi pere, kucel wiyan k'owil kodin.

¹⁶ Neni, atieko ndiko nyingin i par cingan, initie i paro paran noknok.

¹⁷ Joma getin jokengila joma joreyin, aka jono ma jothangin jolakadho bor kwoŋin.

¹⁸ Tiŋi waŋin malo thoko akinen, joje jocokere, jobino bongin. Rwoth waco ni, kafodi go kwo, ilaruko joje kwoŋin paka thiwino, paka ilatweyo jo kwoŋin paka mweha.

¹⁹ Adieri piny perin m'oyido orere aka odoŋ gunda, onyo pama labedo madiny, ri jono ma jobedi kenyo. Aka jono m'oyido jomwonyo win woko jolabedo bor koro.

²⁰ Nyithindho m'onywol jo i hongo ma litho jolawaco k'iwinjo ni, kabedo me diny ran; tim ran kabedo man ma bed'iye!

²¹ Kenyo ilapenjere i cunyin ni, “Ŋa m'onywolo ran nyithindho me je? Oyido aywak aka akinywol, oyido ajawiloka aka obolan, to ŋa won m'opidho nyithindho me je? Oyido adoŋ kendan, onyo nyithindho me jowok kune?”

²² Me apaka Rwoth Were waco ri ji pere. Acegin tiŋo cingan ri nonin, t'atiŋo ranyuth paran ri ji, ŋey jowokeli wotin i kor jo, aka nyiki win ilatiŋo i goki jo.

²³ Kerin gi nyamicalin jolabedo jonywol rin, jolakule piny rin miyin dwoŋ, jolamwole nyutho wor pajo rin, to jonaŋo fukefuke ma tiendin. Kenyo ilaŋeyo ni Abedo Rwoth, aka jono ma jokuro kony paran jok'obedi i wickwot.

²⁴ Inyalo mayo jalweny gima go onyaga? Inyalo botho jotwec wok i cingi ŋatatek aka ger?

²⁵ To me apaka Rwoth waco ama: Kiri jotwec pa siragama ilamako woko, aka ilamayo ŋatatek aka kiri gima go onyaga. Alalweny gi ŋata lwenyo kodin, aka alabotho nyithindho perin.

²⁶ Alamiyo jono ma jodiyin camo delkwoŋ jo, aka jolamer gi remo pajo paka jomer gi vini. Kenyo ji je jolaŋeyo ni, Abedo Rwoth, Jaboth perin, aka Jagony perin, Jameni pa Yakobo.