Isaya 48 - KITAWO MALEŊ Catholic

Were obedo jacwec gi jaboth

¹ Winji win gime, awi ot pa Yakobo, win m'ilwoŋo win gi nyingi Isiraili, kodi Yuda, ma wikwoŋere i nyingi Rwoth, aka wituco Were pa Isiraili, to, wikitim iy'adieri kosa m'otire.

² Wilwoŋere ni wibedo i tindi madwoŋ maleŋ, aka wigoŋere kwoŋ Were pa Isiraili, m'ilwoŋo ni Rwoth pa lwak jolweny.

³ Rwoth waco ri Isiraili ni, Cango con atuco gima latimere, awaco gi dhokan aka amiyo jowoŋeyere; kenyo atimo jo abwap aka jotundo i kare.

⁴ Rupiri oyido aŋeyo ni wijowictek, cuny win tek paka nyweny, aka wikitoy paka ywel.

⁵ Ameno aluwo kwoŋ jo riwin cango con, aka atito riwin mafodi jok'otundo i kare; ŋey wikiri wiwaci ni cal makicar mewin am'otimo jo, ni cal mewin m'opay gi cal mewin m'oleny ama jowodho or kwoŋ jo.

⁶ Witieko winjo, pama onyo neni win gime je; aka wik'otuci kamaler? Wok pama kadho yuwaŋe amiyo win winjo gigipiny manyen, gigipiny m'opanere mafodi wikuya.

⁷ Jocweyere pama, makiweno cango con, nyaka wiwinjo kwoŋe konon me, ŋey wikiri wiwaci ni, oyido atieko kiri ŋeyo jo.

⁸ Fodi wikiwinjo, aka fodi wikiŋeyo, wok cango ithi win oyido fodi k'oyawere. Rupiri aŋeyo ni di wibedo jobanirok, aka ni wok i nywolirok mewin, oyido ilwoŋo win ni jogwenyirok.

⁹ Ro nyingan, adhumo nge paran, ro pak paran adwoko cen ro win, ŋey akir'awey win woko.

¹⁰ Neni, atieko temo lonyo win, to makiweno paka ilonyo feza i mac, atieko temo win i kabangala ma candirok.

¹¹ Ro an won, kendo ro an won, atimo, rupiri inyalo nedi koco nyingan? Dwoŋ paran ak'omiy moro.

Siras, jatel ma Rwoth oyero

¹² Rwoth waco ni, Winjan win, Awi nyikway Yakobo, Isiraili, ji m'atieko lwoŋo jo! An ago, abedo marapena, aka abedo macowe.

¹³ Cingan am'ogeto misingi ma piny, aka cingan maracuc am'orieyo woko polo; k'alwoŋo piny gi polo, jowoay kiromo.

¹⁴ Cokere win, wijoje, aka wiwinji! Ŋa kwoŋ jo m'otieko tuco kamaler gigipiny me? Rwoth omaro go, go latimo atoŋa pere kwoŋ Babilon, aka badi go bino bedo kwoŋ Jokaldin.

¹⁵ An, won, aŋat'aluwo aka alwoŋo go, akelo go tundo ka, aka labedo gi loyo i gima go timo.

¹⁶ Core win cegin kodan, winji win gime! Wok i cakirok akiluwo aponda, aka je timere ma an bende aneno. Aka onyo pama Rwoth Were ooran gi Cuny pere.

¹⁷ Rwoth, Jaboth mewin, aka Were Maleŋ pa Isiraili waco, Abedo Rwoth, Were mewin, ma fonjo win ro bero mewin, aka telo win i yo ma wiripo luwo.

¹⁸ Kabedi oyido wiwinji or paran! Dinyo siem mewin omol ma kicwiy, paka malawa! Dinyo loyo obino riwin paka ulok ma nam

¹⁹ Nyithindho mewin dinyo jobedo kweth paka kwoyo, to nyikway win jobedo mathoth paka nyingi cemo. Dinyo nyingi jo k'orere woko, kosa di k'orey woko jo ruwaŋan.

²⁰ Wok win i Babilon, ngoye win kwoŋ Jokaldin! Koki win gi wac ma kisangala, tuci win, dhiri win wac kiri witum ma piny, wac win ni, “Rwoth otieko botho Yakobo ŋeca pere!”

²¹ Riyo k'oneko jo munyo jowotho i thim, go omiyo pi mol rijo wok i tele, go obaro woko tele to pi bayere woko.

²² Rwoth waco ni, “Siem ongoye ri jokidakana.”